ភ្នំពេញ៖ ឯកឧត្តម ហ៊ុម ម៉ានី ប្រធានសហភាពសហព័ន្ធយុវជនកម្ពុជា នារសៀលថ្ងៃទី២០ ខែមីនា ឆ្នាំ២០២៣នេះ បានលើកឡើងពីការបញ្ចេញទស្សនៈរបស់សាធារណជន​ទាក់ទង​នឹងការ​បង្ហាញខ្លួនរបស់លោក ឯម រៀម ក្នុងរូបភាព​សំលៀកបំពាក់ (ដោយច្នៃចេញពីហូលខ្មែរ) បែបពាក់កណ្តាលខ្លួនក្នុងកម្មវិធីពានរង្វាន់ Pleng Music Award ឆ្នាំ២០២៣។

ឯកឧត្ដម បានចាត់ទុក ការបញ្ចេញទស្សនៈរបស់សាធារណជនពិតជាមានតម្លៃ ប៉ុន្ដែមិនគួរឲ្យការបញ្ចេញយោបល់ទាំងនោះ ក្លាយជាទំនាស់ ការរិតត្បិត ឬការបែកបាក់​ណាមួយ​ក្នុងសង្គមយើងឡើយ។

ឯកឧត្តម បានសរសេរថា ឯកឧត្ដម​បានតាមដានយ៉ាងយកចិត្តទុកដាក់នូវការផ្លាស់ប្តូរ​យោបល់គ្នា​ក្នុងចំណោមសាធារណជន​ ស្តីពីការបង្ហាញខ្លួនរបស់លោក ឯម រៀម ក្នុងរូបភាព​សំលៀកបំពាក់ (ដោយច្នៃចេញពីហូលខ្មែរ) ​បែបពាក់កណ្តាលខ្លួនក្នុងកម្មវិធីពានរង្វាន់ Pleng Music Award ឆ្នាំ២០២៣។

ឯកឧត្ដមថ្លែងថា៖«ខ្ញុំផ្ទាល់យល់ថា ការបញ្ចេញទស្សនៈទាំងនោះ ពិតជាមានតម្លៃ ប៉ុន្តែយើងមិន​គួរឲ្យការបញ្ចេញយោបល់ទាំងនោះ ក្លាយជាទំនាស់​ ការរិតត្បិត ឬការបែកបាក់ណាមួយ​ក្នុងសង្គមយើងឡើយ»។

ក្នុងន័យនេះ ឯកឧត្តម ហ៊ុន ម៉ានី ក៏បានស្នើឲ្យសាធារណជន ​មេត្តាចៀសវាងនូវការខ្វែងយោបល់គ្នានេះ ដោយគួរត្រឡប់មកស្វែងយល់បន្ថែមពីជំហរ ​និងភាពផ្សេងគ្នានៃគំនិត។

ឯកឧត្ដម សង្ឃឹមដែរថា ​អាជ្ញាធរមានសមត្ថកិច្ច ​និងអ្នកពាក់ព័ន្ធទាំងអស់ ជាពិសេស​ក្រសួង​សេនាធិការ ​អ្នករៀបចំកម្មវិធី រួមទាំងបុគ្គល​ ដែលជាកម្មវត្ថុផ្ទាល់ នឹងសហការ​សម្របសម្រួល​លើកិច្ចការនេះ ​ដើម្បីរកចំណុចរួម ដែលជាប្រយោជន៍សម្រាប់ជាតិ​យើងទាំងអស់គ្នា៕