​ប៉ាគីស្ថាន៖ អតីត​នាយករដ្ឋមន្ត្រី​​ប៉ា​គី​ស្ថាន​លោក Imran Khan បាន​និយាយ​កាលពី​ថ្ងៃអាទិត្យ ទី​១៩ ខែមីនាថា ​លោក​នឹង​ចាត់វិធានការ​តាមផ្លូវ​ច្បាប់​លើ​នគរបាល​ ដែល​បាន​សម្រុកចូល​លំនៅឋាន​របស់លោកកាលពី​ថ្ងៃ​សៅរ៍​។ លោក Khan បានប្រកាស​ពី​ផែនការ​រៀបចំ​ការប្រមូល​ផ្តុំគ្នា​ជា​សាធារណៈ​នៅ​ថ្ងៃ​ពុធ ទី​២២ ខែមីនានៅ​ទីក្រុង Lahore​។

លោក​បានធ្វើ​សេចក្តីថ្លែងការណ៍​នេះ​នៅក្នុង​សុន្ទរកថា​ផ្សាយ​ផ្ទាល់​នៅលើ​បណ្តាញ Youtube មួយថ្ងៃ​បន្ទាប់ពី​ក្រុម​អ្នកគាំទ្រ​របស់លោក​បាន​ប៉ះទង្គិច​ជាមួយ​នគរបាល​នៅ​លំនៅឋាន​ក្នុង​ទីក្រុង Lahore ។ នគរបាល​បាន​សម្រុក​ចូលទៅក្នុង​លំនៅឋាន​របស់លោក Khan ហើយ​បាន​ប៉ះទង្គិច​ជាមួយ​ក្រុម​អ្នកគាំទ្រ​បន្ទាប់ពីលោក Khan បានមក​ដល់ទី​ក្រុង Islamabad ដើម្បី​បង្ហាញខ្លួន​នៅ​តុលាការ​ក្នុងការ​ដោះស្រាយ​ការចោទប្រកាន់​ ពីបទ​លក់​អំណោយ​រដ្ឋ​ដោយ​ខុសច្បាប់​ដែល​ផ្តល់ឱ្យ​លោក​ដោយ​ឥស្សរជន​បរទេស ក្នុងអំឡុងពេល​លោក​កំពុងកាន់​តំណែង​។ លោក Khan និយាយថា លោក​បាន​អនុវត្តតាម​នីតិវិធី​ច្បាប់​ក្នុងការ​ទទួលបាន​អំណោយ​ទាំងនោះ​។​

​រដ្ឋមន្ត្រីក្រសួង​ព័ត៌មាន​ប្រចាំខេត្ត Punjab លោក Amir Mir បាន​និយាយថា នគរបាល​បាន​ទៅដល់​ខាងក្រៅ​លំនៅឋាន​​របស់លោក Khan ដើម្បី​ប្រមូល​ភស្តុតាង​អំពី​ការវាយប្រហារ​លើ​នគរបាល និង​អ្នក​ដែល​ត្រូវ​ស្វែងរក​ចាប់ខ្លួន​នៅក្នុង​ករណី​ផ្សេងៗ​។ លោក Khan ដែល​ត្រូវបាន​បាញ់​ពេល​លោក​កំពុង​ធ្វើ​យុទ្ធនាការ​កាលពី​ខែវិច្ឆិកា បាន​និយាយ​នៅក្នុង​បទសម្ភាសន៍​ថា ការគំរាមកំហែង​ដល់​អាយុជីវិត​របស់លោក​គឺ​ធំ​ជាង​ពេលមុន ហើយ​បាន​អះអាង​ដោយ​ពុំបាន​ផ្តល់​ភស្តុតាង​ថា ​គូប្រជែង​នយោបាយ​របស់លោក និង​យោធា​មានបំណង​រារាំង​លោក​មិន​ឲ្យ​ឈរឈ្មោះ​ក្នុងការ​បោះឆ្នោត​នៅ​ចុងឆ្នាំ​នេះ​។ រដ្ឋមន្ត្រីក្រសួង​ព័ត៌មាន​របស់​​ប៉ា​គី​ស្ថាននិយាយថា រដ្ឋាភិបាល​ពុំមាន​ជាប់​ពាក់ព័ន្ធ​ចំពោះ​ចំណាត់ការ​របស់​នគរ​បាល​នោះទេ ហើយ​និយាយថា ​នគរបាល​បាន​អនុវត្តតាម​សេចក្តី​បង្គាប់​របស់​តុលាការ​៕

អត្ថបទ៖ ប៊ុនថន