កំពង់ចាម៖ រាជរដ្ឋាភិបាលនៃព្រះរាជាណា​ចក្រ​កម្ពុជា ​តាមរយៈគោលនយោបាយគណបក្ស​ប្រជាជនកម្ពុជា ដែលបានទទួលសំឡេង​គាំទ្រ​ដ៏ច្រើន​លើសលុប ក្នុងការបោះឆ្នោតជាច្រើនអាណត្តិ ​ដោយមាន​សម្តេចតេជោ ហ៊ុន សែន ប្រធានគណបក្ស ជានាយករដ្ឋមន្ត្រី ប្រជាជនរស់នៅក្នុង​សុខសន្តិភាព ​និងប្រទេសជាតិ​មានការអភិវឌ្ឍរីកចម្រើនទៅមុខ ជាលំដាប់។

មានសាសន៍បែបនេះ ខណៈឯកឧត្តមបណ្ឌិត ម៉ឹង មករា ប្រធានក្រុមការងារជនបង្គោលចុះជួយស្រុកជើងព្រៃ ខេត្តកំពង់ចាម តំណាងដ៏ខ្ពង់ខ្ពស់ឯកឧត្តមបណ្ឌិត ហ៊ុន ម៉ាណែត សមាជិកអចិន្ត្រៃយ៍គណបក្ស និងជាប្រធានយុវជនគណបក្សប្រជាជនកម្ពុជា នាចុងសប្ដាហ៍នេះ បានជួបសំណេះសំណាល និង​ពិសារអាហារសាមគ្គី ជាមួយយុវជនគណបក្សឃុំផ្តៅជុំ ស្រុកជើងព្រៃ ខេត្តកំពង់ចាម ចំនួន៦៣០នាក់ នៅស្នាក់ការគណបក្សស្រុកជើងព្រៃ ក្នុងនោះក៏មានអតីតសកម្មជន​យុវជន​គណបក្សភ្លើងទាន​ដែលបានចូលរួមជីវភាពជាមួយគណបក្សប្រជាជនកម្ពុជាផងដែរ។

កម្មវិធីជួបជុំនេះធ្វើឡើងក្នុងគោលបំណងពង្រឹងសាមគ្គីភាពផ្ទៃក្នុង របស់សកម្មជនគណបក្សបក្ស​មូលដ្ឋាន​ ក្រុមយុវជនគណបក្សមូលដ្ឋាន ទាំងសមាជិកចាស់និងសមាជិកថ្មីទាំងអស់ និង​ក្រុមការងារជនបង្គោលគណបក្ស ដើម្បីធ្វើយ៉ាងណារក្សាឱ្យបាននូវគោលជំហរស្រលាញ់បក្ស ដើរតាមគោលនយោបាយបក្ស ​និងគិតគូរដល់បុព្វហេតុជាតិមាតុភូមិ ជាធំ ព្រោះគណបក្សប្រជាជន​កម្ពុជា ប្រសូតចេញពីប្រជាជន និងដើម្បីប្រជាជន។

ឯកឧត្តមបណ្ឌិត ម៉ឹង មករា បានពាំនាំការសួរសុខទុក្ខ ​និងការនឹករលឹកពី ឯកឧត្តមបណ្ឌិត ហ៊ុន ម៉ាណែត ​ជូនចំពោះបងប្អូនយុវជន និងសមាជិក សមាជិកា គណបក្សទាំងអស់ ដែលមានវត្តមាន​ក្នុងកម្មវិធីនេះ។

ឯកឧត្តមបណ្ឌិត ម៉ឹង មករា ក៏បានសំណេះសំណាល ​និងពន្យល់យុវជន និងសមាជិក សមាជិកា​គណបក្ស អំពីសារសំខាន់នៃការចូលរួមជីវភាពជាមួយគណបក្សប្រជាជនកម្ពុជា ដែលជា​គណបក្សធំជាងគេ ​មានសមាជិកច្រើនជាងគេ​ មានគោលនយោបាយច្បាស់លាស់ និងមាន​សក្តានុពល​ភាពជាងគេ ក្នុងការគ្រប់គ្រង ដឹកនាំនិងកសាងជាតិ។ រាជរដ្ឋាភិបាល នៃព្រះរាជាណា​ចក្រ​កម្ពុជា តាមរយះគោលនយោបាយគណបក្សប្រជាជនកម្ពុជា ដែលបានទទួលសំឡេង​គាំទ្រ​ដ៏ច្រើន​លើសលុប ក្នុងការបោះឆ្នោតជាច្រើនអាណត្តិ ​ដោយមាន ​សម្តេចតេជោ ហ៊ុន សែន ប្រធានគណបក្ស ជានាយករដ្ឋមន្ត្រី ប្រជាជនរស់នៅក្នុងសុខសន្តិភាព និងប្រទេសជាតិ​មានការអភិវឌ្ឍរីកចម្រើនទៅមុខ ជាលំដាប់។

ក្នុងឱកាសនោះដែរ ក៏មានការចាក់បញ្ចាំងវីដេអូឯកសារ ស្តីពី "ឧត្តមភាពរបស់ សម្តេចតេជោ និង ឯកឧត្តមបណ្ឌិត ហ៊ុន ម៉ាណែត" ដោយបង្ហាញអំពីមហាវីរភាពរបស់ សម្តេចតេជោ ក្នុងការយក​ជីវិត​ទៅប្តូរដើម្បីតស៊ូរំដោះជាតិពីរបបប្រល័យពូជសាសន៍ ប៉ុល ពត ការកសាងប្រទេសជាតិ​ពី​បាតដៃ​ទទេរ រហូតមានការអភិវឌ្ឍរីកចម្រើនដល់សព្វថ្ងៃ ​និងជាពិសេសបាននាំយកសន្តិភាពពេញលេញ ដល់ប្រទេសជាតិ និងប្រជាជន តាមរយៈគោលនយោបានឈ្នះ-ឈ្នះ ធ្វើឲ្យមានឯកភាពជាតិ ឯកភាពទឹកដីទាំងមូល។

ឯកឧត្តមបណ្ឌិត ហ៊ុន ម៉ាណែត ​បុត្រច្បងរបស់សម្តេចតេជោ និងជាកុលបុត្រដ៏ឆ្នើមរបស់ប្រទេស​ជាតិ ដែលពោរពេញដោយចំណេះដឹងខ្ពង់ខ្ពស់ ​ទេពកោសល្យ ​ភាពប៉ិនប្រសព្វពីកំណើត និង​សមត្ថភាពពេញលេញ ក្នុងការដឹកនាំស្ថាប័នជាតិ ​ការបង្កើតអង្គភាពប្រឆាំងភេរវកម្ម និង​ការការទម្រង់ប្រព័ន្ធគ្រប់គ្រង់ក្នុងជួរកងខេមរភូមិន្ទ ធ្វើឲ្យវិស័យការពារជាតិមានភាពរឹងមាំ និងមានប្រសិទ្ធិភាពខ្ពស់។ ​សមត្ថភាពក្នុងការគ្រប់គ្រង់ប្រទេសជាតិពេលមានវិបត្តិ ជាពិសេស​យុទ្ធនាការប្រយុទ្ធប្រឆាំង​ជម្ងឺកូវីដ-១៩ ​ដែលបានជួយ​សង្គ្រោះជីវិត​ប្រជាពលរដ្ឋកម្ពុជាជាច្រើន ​និងមានភាពល្បីល្បាញ ទទួលស្គាល់លើឆាកអន្តរជាតិ។ ការរៀបចំរចនាសម្ព័ន្ធយុវជនគណបក្ស និងក្រុមចលនាយុវជនតាមមូលដ្ឋាន ដើម្បីធានាឲ្យមានការអភិវឌ្ឍន៍ជនបទដល់គ្រប់ទីកន្លែង។ វីរភាពទាំងនេះបញ្ជាក់បានថា ​ឯកឧត្តមបណ្ឌិត ហ៊ុន ម៉ាណែត ពិតជាបេក្ខភាព​សក្តិសម​ឥតខ្ចោះ ដែលត្រូវបានគណបក្សបោះឆ្នោតជ្រើសរើសជា ​បេក្ខភាពនាយករដ្ឋមន្ត្រីបន្តវេន​ នាពេលអនាគត។

ឯកឧត្តមបណ្ឌិត ម៉ឹង មករា ​ក៏បានលើកទឹកចិត្តឱ្យយុវជនគណបក្សទាំងអស់ ត្រូវធ្វើខ្លួនជាមន្ត្រីបក្ស​ដែលមានអត្តចរិតល្អ និងជាគម្រូ ​និងចូលរួមរាល់សកម្មភាពនយោបាយរបស់គណបក្ស ដើម្បី​ថែរក្សាសុខសន្តិភាព ​និង​សមិទ្ធផល​ទាំងឡាយដែលកើតចេញពីសន្តិភាព ​ជាពិសេសចូល​ប្រឡូក​ឲ្យជាប់លាប់ជាមួយប្រជាជន ​អាជ្ញារមូលដ្ឋាន ​និងក្នុងកិច្ចការសង្គម ដើម្បីជាចំណែកក្នុងការ​អភិវឌ្ឍ​សេដ្ឋកិច្ចនៅមូលដ្ឋាន ​និងធ្វើឲ្យកម្រិតជីភាពគ្រួសារប្រជាកសិករមានភាពប្រសើរ ផងដែរ។

ឯកឧត្តមបណ្ឌិត ម៉ឹង មករា បានថ្លែងថា "អ្វីៗអាចសម្រេចទៅបាន ​គឺមកពីកត្តាមនុស្សជាចម្បង មនុស្ស​ជាអ្នកគិត មនុស្សជាអ្នកធ្វើ ​បើយើងមានធនធានមនុស្ស ​ប្រទេសជាតិយើងនឹងមាន​សុខសន្តិភាព និងការអភិវឌ្ឍរីកចម្រើន"៕