មណ្ឌលគិរី៖ នៅថ្ងៃនេះ គណៈកម្មាធិការជាតិរៀបចំការបោះឆ្នោត (គ.ជ.ប) បានដំណើរប្រឡង​ជ្រើសរើស​មន្រ្តីលេខាធិការដ្ឋាននៃគណៈកម្មការរៀបចំការបោះឆ្នោតខេត្តរបស់ខ្លួន ដើម្បី​បម្រើ​ដល់ការបោះឆ្នោតជ្រើសរើសតំណាងរាស្រ្ត នីតិកាលទី៧។

ជារៀងរាល់ដំណើរការបោះឆ្នោត គណៈកម្មាធិការជាតិរៀបចំការបោះឆ្នោត (គ.ជ.ប) ដែលជា​ស្ថាប័នទទួលខុសត្រូវក្នុងការចាត់ចែងស្របតាមច្បាប់ ​នៅថ្ងៃទី២០ ខែមីនា ​ឆ្នាំ២០២៣នេះ តាម​បណ្តាលេខាធិការដ្ឋានរៀបចំការបោះឆ្នោតខេត្តនៅទូទាំងប្រទេស បានដំណើរការប្រឡង​ជ្រើសរើស​មន្រ្តីលេខាធិការនៃគណៈកម្មការរៀបចំការបោះឆ្នោតខេត្តព្រមគ្នា។

ជាក់ស្តែង ឯកឧត្តម ហ៊ែល សារ៉ាត់ សមាជិក គ.ជ.ប បានអញ្ជើញបើកវិញ្ញាសា និងពិនិត្យដំណើរ​ការប្រឡង​នៅខេត្តមណ្ឌលគិរី​ ដែលមានបេក្ខជនចូលរួមចំនួនជិត ៤០នាក់។

ឯកឧត្តម ហ៊ែល សារ៉ាត់ បញ្ជាក់ថា ក្នុងដំណាក់កាលប្រឡងជ្រើសរើសមន្រ្តីលេខាធិការដ្ឋាន​រៀបចំ​ការបោះឆ្នោតនាពេលនេះ មានតួនាទី​ និងភារកិច្ចដ៏សំខាន់ ដើម្បីឲ្យដំណើរការឆ្ពោះទៅ​រកការ​បោះឆ្នោតស្របតាមច្បាប់ ​និងធានាថា​មន្រ្តីទាំងអស់មានសមត្ថភាពពេញលេញ។

ជាមួយគ្នា បេក្ខជនដែលបានចូលរួមប្រឡង បានឲ្យដឹងថា ការសម្រេចចិត្តចូលរួមនៃការប្រឡងនេះ ដោយ​សារពួកគាត់មានបំណងរួមចំណែក​ធ្វើឲ្យដំណើរការបោះឆ្នោត​នាពេលខាងមុខកាន់​តែមាន​ភាពល្អប្រសើរ។

គួរបញ្ជាក់ថា ការបោះឆ្នោតជ្រើសរើសតំណាងរាស្រ្ត ​នីតិកាលទី៧ គ.ជ.ប រៀបចំការជ្រើសរើស​មន្រ្តីជិត១៥ម៉ឺននាក់​ ដែលជាតម្រូវការចំពោះមុខ ​ដើម្បីធានាដល់ដំណើរទាំងមូល​នៃការបោះឆ្នោត​ជ្រើសរើសតាំងតំណាងរាស្រ្ត ​ក៏ដូចជាការិយាល័យបោះឆ្នោតនៅទូទាំងប្រទេសជាង ២ម៉ឺន​ការិយាល័យ​ផងដែរ។

ការបោះឆ្នោតជ្រើសរើសតំណាងរាស្រ្ត ​នីតិកាលទី៧​ នឹងប្រព្រឹត្តទៅនៅថ្ងៃទី២៣ ​ខែកក្កដា ឆ្នាំ២០២៣ ​ខណៈប្រជាពលរដ្ឋមានឈ្មោះក្នុងបញ្ជីចំនួនជាង ៩លាន៧សែននាក់៕