អ៊ុយក្រែន៖ ប្រធានាធិបតីរុស្ស៊ីលោក វ្ល៉ាឌីមៀ ពូទីន បានធ្វើទស្សនកិច្ចទៅកាន់ទីក្រុង Mariupol ភាគខាងកើតប្រទេសអ៊ុយក្រែនដែលស្ថិតក្រោមការគ្រប់គ្រងរបស់ក្រុងមូស្គូ ធ្វើឲ្យមានការតវ៉ាពីរដ្ឋាភិបាលអ៊ុយក្រែន។ ការិយាល័យប្រធានាធិបតីរុស្ស៊ីកាលពីថ្ងៃអាទិត្យ បានប្រកាសអំពីដំណើរទស្សនកិច្ចរបស់លោក ពូទីន ទៅកាន់ទីក្រុង Mariupol ក្នុងតំបន់ Donetsk ដែលលោកបានដាក់បញ្ចូលជាឧសបសម្ព័ន្ធជាឯកតោភាគីកាលពីខែកញ្ញា។
នេះជាដំណើរទស្សនកិច្ចលើកដំបូង ទៅកាន់តំបន់របស់គ្រប់គ្រងដោយរុស្ស៊ីនៅក្នុងប្រទេសអ៊ុយក្រែន ដែលត្រូវបានរាយការណ៍ចាប់តាំងពីទីក្រុងមូស្គូ ចាប់ផ្តើមការវាយលុករបស់ខ្លួនកាលពីជាង ១ឆ្នាំមុនកន្លងទៅនេះ។ វីដេអូដែលចេញផ្សាយដោយការិយាល័យប្រធានាធិបតីបង្ហាញលោក ពូទីន បានបើករថយន្តជុំវិញទីក្រុងនៅពេលងងឹត ខណៈលោកទទួលសេចក្តីរាយការណ៍ដោយឧបនាយករដ្ឋមន្ត្រីលោក Marat Khusnullin ដែលអង្គុយនៅកៅអីអ្នកដំណើរខាងមុខ។ ទីប្រឹក្សាប្រធានាធិបតីអ៊ុយក្រែនលោក Mykhailo Podolyak បានសរសេរលើបណ្តាញTwitter ថា ឧក្រិដ្ឋជនតែងតែត្រលប់ទៅទីតាំងឧក្រិដ្ឋកម្ម។ លោកទំនងជានិយាយសំដៅទៅលើការចេញដីកាចាប់ខ្លួនលោក ពូទីន របស់តុលាការព្រហ្មទណ្ឌអន្តរជាតិពីបទសង្ស័យប្រព្រឹត្តឧក្រិដ្ឋកម្មសង្គ្រាម។
មុនពេលទៅធ្វើទស្សនកិច្ចនៅទីក្រុង Mariupol លោក ពូទីន កាលពីថ្ងៃសៅរ៍បានធ្វើដំណើរទៅកាន់តំបន់គ្រីម៉េ ដែលរុស្ស៊ីបានដាក់បញ្ចូលជាឧបសម្ព័ន្ធឧបទ្វីបនេះ ពីប្រទេសអ៊ុយក្រែនជាឯកតោភាគីក្នុងឆ្នាំ២០១៤។ ក្រសួងការពារជាតិរបស់ចក្រភពអង់គ្លេសបាននិយាយកាលពីថ្ងៃអាទិត្យថា អាជ្ញាធរនៅផ្នែកមួយដែលស្ថិតក្រោមការគ្រប់គ្រងរបស់រុស្ស៊ីក្នុងតំបន់ Zaporizhzhia បានប្រកាសជាឯកតោភាគី ជាវិធានការបណ្តោះអាសន្នត្រូវយកទីក្រុង Melitopol ដែលខ្លួនដណ្តើមគ្រប់គ្រងបានធ្វើជារដ្ឋធានីរបស់នៃតំបន់នេះ។ ចំណាត់ការនេះធ្វើឡើង ខណៈកងកម្លាំងអ៊ុយក្រែននៅតែរក្សាការគ្រប់គ្រងទីក្រុង Zaporizhzhia នៃតំបន់នេះ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
