ភ្នំពេញ៖ បណ្ដាសាលារៀនជាច្រើន ចាប់ផ្ដើមរៀបចំពិធីបុណ្យផ្កា ដោយភ្ជាប់ជាមួយពិធីសង្ក្រាន្ត ដើម្បីអបអរសាទរពិធីបុណ្យចូលឆ្នាំប្រពៃណីជាតិខ្មែរ ក៏ដូចជាបង្កើតឱកាសឱ្យ​សិស្សសិក្សា​ស្វែងយល់​បានកាន់តែច្រើនពីវប្បធ៌មជាតិ។

មុននឹងពិធីបុណ្យចូលឆ្នាំប្រពៃណីជាតិខ្មែរមកដល់ ​តាមសាលារៀនមួយចំនួន ក៏បានរៀបចំពិធីនានា​ដើម្បីផ្ដល់ភាពសប្បាយរីករាយជូនសិស្សានុសិស្សរបស់ខ្លួនផងដែរ។ ​ជាក់ស្ដែងសម្រាប់វិទ្យា ហ៊ុន សែនព្រែកកំពឹស ស្ថិតក្នុងខណ្ឌដង្កោ ​គឺនឹងរៀបចំពិធីនេះឡើងនៅថ្ងៃទី ៣០​ ខែមីនាខាងមុខ។ គិតត្រឹមពេលនេះ គឺសិស្សកំពុង​មមាញឹកក្នុងការតុបតែ​លម្អ សម្រាប់​រៀបចំពីធីបុណ្យផ្កា និងភ្ជាប់​ជាមួយពិធីសង្រ្កាន្តឆ្នាំថ្មី ​សម្រាប់សាលាបានប្រើប្រាស់​ ស្បូវ​យកមកតុបតែង និងមានការចងខ្សែ​រំលេចដោយក្រណាត់ពណ៌ ​និងជាពិសេសនោះគឺ ​ការ​ហ្វឹកហាត់​របាំ ​ក្បាច់រាំជាប្រពៃណីជាតិខ្មែរ ដែលតែងរាំកម្សាន្តក្នុងអំឡុងចូលឆ្នាំខ្មែរ។

លោក ស្រ៊ាង ម៉េងលី ជានាយកវិទ្យាល័យ ហ៊ុនសែន ព្រែកកំពឹស ​លើកឡើងថា ថ្ងៃទី ៣០ ខែមីនា គឺសាលារៀបចំបុណ្យផ្កា​នៅពេលព្រឹក រីឯពេលរសៀល ​សាលានឹងរៀបចំពិធីអបអរសាទរ​ចូលឆ្នាំ​ប្រពៃណីជាតិខ្មែរ។ ពេលរសៀល ​គឺនឹងភ្ជាប់ជាមួយ ល្បែងប្រជាប្រិយ​ ចោលឈូង បោះអង្គុញ ក៏ដូចជាការសម្ដែងរបាំ ​និងការរាំទម្រង់សិល្បៈប្រណៃជាតិខ្មែរ។​ ខណៈសិស្សក៏កំពុងហ្វឹកហាត់ រាំឱ្យបានត្រឹមត្រូវតាមក្បួនខ្នាតផងដែរ។

សម្រាប់សិស្សដែលបានចូលរួម ក្នុងការហ្វឹកហាត់ក្នុងការរាំរបាំ ក៏ដូចជារាំទម្រង់សិល្បៈប្រពៃណី​ជាតិខ្មែរ ​បានបង្ហាញនូវភាពសប្បាយចិត្ត ដែលសាលាអនុញ្ញាតឱ្យរៀបចំពិធីនេះឡើង។ ពួកគេលើកឡើងថា ​កម្មវិធីនឹងផ្ដល់ភាពសប្បាយរីករាយសម្រាប់សិស្សគ្រប់រូប ជាពិសេសធ្វើ​ឱ្យពួកគាត់​ជាយុវជន ស្វែងយល់​កាន់តែច្រើនពីសម្បត្តិវប្បធម៌​របស់ជាតិ។

ក្រសួងអប់រំ យុវជន និងកីឡា ​ក៏បានចេញសេចក្ដីណែនាំនាពេលថ្មីៗនេះ ដោយជំរុញលើកទឹកចិត្ត​ឱ្យ​គ្រប់សាលាទាំងអស់ ​បង្កបរិយាកាសដល់សិស្សក្នុងលេងល្បែងប្រជាប្រិយ ​និងសកម្មភាពនានា ដើម្បីអបអរសាទរពិធីបុណ្យចូលឆ្នាំប្រពៃណីជាតិខ្មែរ។ ​យ៉ាងណាម៉ិញក្រសួងអប់រំ ហាមប្រាម​ដាច់ខាត ក្នុងការលេងប៉ាតម្សៅ ជះទឹក​ ដែលពុំមែនជាវប្បធម៌របស់ខ្មែរ៕អត្ថបទ៖ គឹមហុក