ទួរគី៖ កិច្ចព្រមព្រៀងអនុញ្ញាតឱ្យមានការនាំចេញគ្រាប់ធញ្ញជាតិអ៊ុយក្រែន ពីកំពង់ផែសមុទ្រខ្មៅដែលត្រូវផុតកំណត់កាលពីថ្ងៃសៅរ៍ត្រូវបានបន្ថែមពេល។ វាត្រូវបានធ្វើឡើងបន្ទាប់ពីកិច្ចចរចាជាច្រើនថ្ងៃ ដែលត្រូវបានសម្របសម្រួលដោយប្រទេសទួរគីដើម្បីបន្ថែមពេលវេលាដល់កិច្ចព្រមព្រៀងនេះ។
ប្រធានាធិបតីទួរគីលោក Tayyip Erdogan បានប្រកាសបន្តជាថ្មីកាលពីថ្ងៃសៅរ៍ ប៉ុន្តែលោកពុំបានបង្ហាញពីរយៈពេលនៃការបន្ថែមពេលសម្រាប់រយៈពេលប៉ុន្មានថ្ងៃនោះទេ។ ទីក្រុងមូស្គូបាននិយាយថា ខ្លួននឹងមិនជំទាស់ទៅនឹងកិច្ចព្រមព្រៀងដែលនឹងត្រូវបន្តរយៈពេល ៦០ថ្ងៃនោះទេ ខណៈមន្ត្រីអ៊ុយក្រែនបាននិយាយថា ភាគីទាំងពីរបានព្រមព្រៀងរយៈពេល ១២០ថ្ងៃ។ កិច្ចព្រមព្រៀងនេះត្រូវបានផ្តួចផ្តើមឡើងដោយរុស្ស៊ី និងអ៊ុយក្រែនក្រោមការសម្របសម្រួលដោយអង្គការសហប្រជាជាតិ និងប្រទេសទួរគីក្នុងខែកក្កដា ហើយបានបន្តរយៈពេល ១២០ថ្ងៃបន្ថែមទៀតនៅក្នុងខែវិច្ឆិកា។
កិច្ចព្រមព្រៀងនេះត្រូវបានបង្កើតឡើង ដើម្បីប្រយុទ្ធប្រឆាំងនឹងវិបត្តិស្បៀងអាហារសកល ដែលត្រូវបានបញ្ឆេះដោយការវាយលុករបស់រុស្ស៊ីលើអ៊ុយក្រែនកាលពីខែកុម្ភៈឆ្នាំមុន និងការបិទច្រកសមុទ្រខ្មៅ។ អង្គការសហប្រជាជាតិបាននិយាយថា កិច្ចព្រមព្រៀងនេះបានអនុញ្ញាតឱ្យមានការផ្គត់ផ្គង់គ្រាប់ធញ្ញជាតិ និងស្បៀងអាហារចំនួន ២៥លានតោន ក្នុងអំឡុងពេលកិច្ចព្របព្រៀងពីរលើកដំបូងរបស់ខ្លួន ដោយបានជួយធ្វើឱ្យតម្លៃស្បៀងអាហារពិភពលោកធ្លាក់ចុះ និងធ្វើឱ្យទីផ្សារមានស្ថិរភាព៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
