ភ្នំពេញ៖ អង្គការស្បៀង និងកសិកម្ម នៃសហប្រជាជាតិ (FAO) បានអះអាងថា នឹងបន្តសហការជាមួយរាជរដ្ឋាភិបាលកម្ពុជា ដើម្បីធ្វើការគាំទ្រ និងអភិវឌ្ឍន៍វិស័យកសិកម្ម ពិសេសការផ្លាស់ប្តូរទៅលើប្រព័ន្ធស្បៀងនៅកម្ពុជាឲ្យកាន់តែល្អប្រសើរឡើងបន្ថែមទៀត។

នៅក្រោយចប់ពិធីកាត់ខ្សែបូ និងសម្ពោធជាផ្លូវការនូវអគារការិយាល័យរបស់អង្គការស្បៀង និងកសិកម្ម នៃសហប្រជាជាតិប្រចាំកម្ពុជា ដែលមានទីតាំងស្ថិតក្នុងក្រសួងកសិកម្ម រុក្ខាប្រមាញ់ និងនេសាទ កាលពីល្ងាចថ្ងៃទី២០ ខែមីនាកន្លងទៅនេះលោក ជុង ជីនគីម (Jong-Jin Kim) ឧបការី តំណាងអគ្គនាយក និងជានាយកអង្គការ FAO ប្រចាំតំបន់អាស៊ី និងប៉ាស៊ីហ្វិក បានមានប្រសាសន៍ប្រាប់ក្រុមអ្នកសារព័ត៌មានថា អង្គការ FAO គឺជាដៃគូយូអង្វែងរបស់ប្រទេសកម្ពុជា។ លោកបានឲ្យដឹងថា ក្នុងឆ្នាំ២០២៣នេះ អង្គការ FAO រំពឹងថា នឹងអនុវត្តគម្រោងដែលមានថវិកាសរុបជិត ៦០លានដុល្លារអាមេរិក ដែលកើនឡើង ១២០ភាគរយនៅក្នុងផលប័ត្ររបស់អង្គការ FAO ប្រចាំកម្ពុជាបើធៀបនឹងឆ្នាំមុន។ ការអនុម័តថ្មីៗនេះ ដោយមូលនិធិអាកាសធាតុបៃតង (GCF) លើគម្រោង PEARL ដែលមានមូលនិធិ ៤៣លានដុល្លារ ដែលផ្ដោតលើការបង្កើនសមត្ថភាពបន្សំររបស់ប្រជាជនក្នុងតំបន់ក្នុងការប្រយុទ្ធប្រឆាំងនឹងការប្រែប្រួលអាកាសធាតុ គឺជាគម្រោងដ៏ធំបំផុតរបស់អង្គការក្នុងអំឡុងពេលនេះ។

នៅក្នុងពិធីនេះ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា ក្នុងនាមក្រសួងកសិកម្ម លោកនឹងធ្វើការយ៉ាងជិតស្និទ្ធជាមួយអង្គការ ក៏ដូចជាដៃគូអភិវឌ្ឍន៍ ដើម្បីបង្កើនការប្រកួតប្រជែងនៃផលិតផលកសិកម្ម ដោយធ្វើឲ្យប្រសើរឡើងនូវផលិតភាព និងគុណភាពនៃផលិតផល។ ឯកឧត្តមបានបន្ថែមថា ក្រសួងនឹងពង្រឹងកិច្ចសហប្រតិបត្តិការថែមទៀត ដើម្បីលើកកម្ពស់ការប្រើប្រាស់ដី ព្រៃឈើ និងធនធានជលផលប្រកបដោយនិរន្តរភាពដើម្បីជំរុញដល់ការនាំចេញផងដែរ។

សូមបញ្ជាក់ថា អង្គការ FAO មានវត្តមាននៅកម្ពុជាចាប់តាំងពីឆ្នាំ១៩៧៩ ហើយមានការិយាល័យដែលដំណើរការពេញលេញនៅក្នុងរាជធានីភ្នំពេញចាប់តាំងពីឆ្នាំ១៩៩៤។ ក្នុងរយៈពេលជាង ៣០ឆ្នាំកន្លងមកនេះ អង្គការ FAO បានផ្តល់ជំនួយដល់ការអភិវឌ្ឍន៍ជាតិដែលជាអាទិភាពសម្រាប់ប្រទេសកម្ពុជាតាមរយៈជំនួយសង្រ្គោះបន្ទាន់ និងបច្ចេកទេសក្នុងវិស័យជាច្រើន រួមមានផលិតភាព និងពិពិធកម្មកសិកម្ម ប្រព័ន្ធភាពសាស្រ្ត ផលិតកម្មសត្វនិងសុខភាពសត្វ ការគ្រប់គ្រងធនធានជលផល និងព្រៃឈើ សន្តិសុខស្បៀង សុត្ថិភាពចំណីអាហារ និងការអភិវឌ្ឍន៍កសិឧស្សាហកម្មខ្នាតតូច៕