វ៉ូវីណាម៖ ដោយទទួលបានការឧបត្ថម្ភគាំទ្រពីគណៈកម្មាធិការជាតិ CAMSOC និងក្រសួងអប់រំ យុវជន និងកីឡា ក៏ដូចជាគណៈកម្មាធិការជាតិអូឡាំពិកកម្ពុជា សហព័ន្ធកីឡាវ៉ូវីណាមកម្ពុជានឹងរៀបចំការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៦ ឆ្នាំ២០២៣ ចាប់ពីថ្ងៃទី២៥ ដល់ថ្ងៃទី៣០ ខែមីនានេះដោយមានអត្តពលិក ៧ប្រទេសចូលរួម។
នេះបើតាមការបញ្ជាក់ឲ្យដឹងពីឯកឧត្តម អ៊ូ រតនា ប្រធានសហព័ន្ធកីឡាវ៉ូវីណាមកម្ពុជា ស្របពេលសហព័ន្ធបានទទួលការឧបត្ថម្ភសម្ភារស្បែកជើងពីក្រុមហ៊ុន ខេន ស្ព័ត ស៊ូ ខូអិលធីឌី សម្រាប់ផ្ដល់ជូនដល់កីឡាករ-កីឡាការិនីជម្រើសជាតិរបស់ខ្លួនធ្វើការហ្វឹកហាត់នៅមជ្ឈមណ្ឌលជាតិហ្វឹកហាត់កីឡា កាលពីល្ងាចថ្ងៃទី២០ ខែមីនា ឆ្នាំ២០២៣ ម្សិលមិញ។ ឯកឧត្តមបន្ដថា ការប្រកួតនេះមានអត្តពលិកប្រមាណ ២០០នាក់ចូលរួម ដែលជាវេទិកាមួយដ៏ល្អដើម្បីផ្លាស់ប្ដូរបទពិសោធន៍ និងវាស់ស្ទង់សមត្ថភាពសម្រាប់កីឡាករ-កីឡាការិនីរបស់ខ្លួន ត្រៀមឆ្ពោះទៅការប្រកួតកីឡាស៊ីហ្គេម លើកទី៣២ នៅកម្ពុជា ហើយក៏ជាការដុសខាតសមត្ថភាពមន្ដ្រីបច្ចេកទេស ត្រៀមទទួលរៀបចំព្រឹត្តិការណ៍ជាប្រវត្តិសាស្ដ្រនៅកម្ពុជាឲ្យទទួលបានជោគជ័យ និងល្អប្រសើរផងដែរ។
គួរដឹងថា កីឡាវ៉ូវីណាមគឺជាកីឡាដ៏មានសក្ដានុពលមួយរបស់កម្ពុជា ជាក់ស្ដែងកាលពីស៊ីហ្គេមលើកទី៣១ នៅវៀតណាម កីឡាវ៉ូវីណាមកម្ពុជាដណ្ដើមបានមេដាយច្រើនជាងគេ ក្នុងចំណោមកីឡាដណ្ដើមបានមេដាយជូនជាតិ ពោលគឺដណ្ដើមបានមេដាយសរុប ១៣គ្រឿង (មាស ៣ ប្រាក់ ២ និងសំរឹទ្ធ ៨)។ ដោយឡែកស៊ីហ្គេមនៅកម្ពុជា សហព័ន្ធបានដាក់គោលដៅដណ្ដើមមេដាយមាសយ៉ាងហោច ៩គ្រឿងក្នុងនាមម្ចាស់ផ្ទះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
