​ហៃទី៖ ពលរដ្ឋ​ហៃ​ទី​ដែល​ពោរពេញ​ដោយ​ភាព​អស់​សង្ឃឹម​ជាច្រើន​គ្រួសារ បាន​រត់គេច​ចេញពី​តំបន់​ជាយក្រុង​ផេ​ហ្សិ​ន​វី​ល ( Petion-Ville ) ក្នុង​រដ្ឋធានី​របស់​ប្រទេស​នេះ​កាលពី​ថ្ងៃ​ចន្ទ ក្រោយ​ឧបទ្ទវហេតុ​ហិង្សា​ជាច្រើន​បាន​កើត​ឡើង​កាលពី​ព្រឹក​ថ្ងៃ​ចន្ទ​នោះ​។

​សារព័ត៌មាន Reuters បាន​បង្ហាញ​ពី​ជន​ស៊ីវិល​ពោរពេញ​ដោយ​ទុក្ខ​ព្រួយ និង​ភាព​ស្លន់ស្លោ​កាន់​របស់​របរ បាន​ព្យា​យាម​​រត់គេច​ចេញពី​តំបន់​ហ៊ុម​ព័ទ្ធ​ដោយ​អំពើ​ហិង្សា​របស់​ក្រុម​អន្ធពាល​។​ យោង​តាម​សារព័ត៌មាន​ក្នុងស្រុក មនុស្ស ​៩​នាក់​ត្រូវ​បាន​បាញ់សម្លាប់ ហើយ​សាកសព​មួយ​ចំនួន​បាន​ឆេះ​ខ្លោចកាលពី​ថ្ងៃ​ចន្ទ​នៅ​ក្នុង​ភូមិ​ផេ​ហ្សិ​ន​វី​ល (Petion-Village)​។ អ្នក​ឃើញ​ហេតុការណ៍​បាន​ប្រាប់​សារព័ត៌មាន Reuters ថា​ ពួកគេ​បាន​ឃើញ​សាកសព​ត្រូវ​ភ្លើង​ឆេះ​ ៤​នាក់​នៅ​ក្នុង​រថយន្ត​មួយ​គ្រឿងដែល​ភ្លើង​បាន​ឆេះ​ផង​ដែរ​។​ សារព័ត៌មាន​ក្នុងស្រុក​បាន​រាយការណ៍​ថា រថយន្ត​យ៉ាងហោចណាស់​ ២០​គ្រឿង​ត្រូវ​បាន​ភ្លើង​ឆេះ​កាលពី​ថ្ងៃ​សុក្រ​ ទី​១៧​មីនា​។ ​ក្រុម​អាជ្ញាធរ​ហៃ​ទី​ពុំបាន​ផ្ដល់​ព័ត៌មាន​ផ្លូវការ​អំពី​រលក​ថ្មី ​នៃ​អំពើ​ហិង្សា​នៅ​ក្នុង​រដ្ឋធានី​ព័រ​អូ​ប្រាំង (Port-au-Prince) ​នោះ​ទេ។

​គួរ​ឲ្យ​ដឹងថា អំពើ​ហិង្សា​កើត​ចេញ​ពី​ក្រុម​ជន​អន្ធពាល​បាន​កើន​ឡើង​នៅ​ក្នុង​ប្រទេស​ហៃ​ទី ចាប់​តាំង​ពី​ការ​ធ្វើឃាត​ប្រធានាធិបតី Jovenel Moise ក្នុង​ឆ្នាំ​២០២១ ដែល​នាំ​ឲ្យ​មាន​វិបត្តិ​នយោបាយ​ ដែល​ក្រុម​ឧក្រិដ្ឋជន​ឆ្លៀតឱកាស​ពង្រីក​ការគ្រប់គ្រង​ដែនដី​នៅ​ក្នុង​ប្រទេស​នេះ។ ​អំពើ​ហិង្សា​ដ៏​រ៉ាំរ៉ៃ​បង្កឡើង​ដោយ​ក្រុម​ជន​អន្ធពាល បាន​បណ្ដាល​ឲ្យ​អាជ្ញាធរ​រដ្ឋាភិបាល​មិន​អាច​គ្រប់គ្រង​ដែនដី​ជាច្រើន​របស់​ប្រទេស​នេះ ហើយ​ការ​ផ្ទុះ​ជម្លោះ​ដ៏​បង្ហូរ​ឈាម​រវាង​គូប្រជែង​ក្រុម​នេះបាន​ឆក់​យក​ជីវិត​មនុស្ស​រាប់​រយ​នាក់ ​និង​រាប់​ពាន់​នាក់​ទៀត​ត្រូវ​ភៀសខ្លួន​៕

អត្ថបទ៖ សុខមាន