ភ្នំពេញ៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានណែនាំឱ្យ ឱ្យការផលិតលើផលិតផលកសិកម្ម ផ្តោតលើគុណភាព ដើម្បីប្រកួតប្រជែងលើទីផ្សារ និងរិះរកមធ្យោបាយ ធ្វើយ៉ាងណាបន្ទាបតម្លៃនៃធាតុចូលកសិកម្ម ដើម្បីធ្វើឱ្យចំណូលរបស់កសិករមានកម្រិតខ្ពស់។

នៅក្នុងពិធីបើកសន្និបាតបូកសរុបការងារឆ្នាំ២០២២ និងលើកទិសដៅឆ្នាំ២០២៣ នៅព្រឹកថ្ងៃទី២១ ខែមីនានេះ ឯកឧត្តមរដ្ឋមន្រ្តី ឌិត ទីណា បានមានប្រសាសន៍ថា ស្របតាមគោល​នយោបាយ​កសិកម្មសម្រាប់ពេលអនាគត យើងទាំងអស់គ្នាត្រូវខិតខំយ៉ាងណាជំរុញ​ឲ្យមានការកើន​ឡើង​ថ្លៃកសិផល និងជួយសម្រាលបន្ទុកពាក់ព័ន្ធ​នឹងដើមទុន​ដែលរដ្ឋាភិបាល​អាចជួយដាក់​ថវិកាជាតិវិនិយោគវិស័យកសិកម្មឲ្យបានច្រើន។

ឯកឧត្តមរដ្ឋមន្រ្តី បានបន្ថែមទៀតថា ត្រូវបង្កើនផលិតភាពរបស់ប្រជាកសិករ ដើម្បីឲ្យពួកគាត់កើន​ចំណូលដើម្បី​ផ្គត់ផ្គង់​ជីវភាពរស់​នៅក្នុងក្រុមគ្រួសាររបស់គាត់។

លើសពីនេះទៀតនោះ ឯកឧត្តមរដ្ឋមន្រ្តីកសិកម្ម បានជំរុញនិងលើកទឹកចិត្តដល់មន្រ្តីទាំងអស់ ត្រូវផ្តល់ទំនុកចិត្តដល់អ្នកវិនិយោគទុន ​ដោយត្រូវបម្រើសេវាសាធារណៈឲ្យល្អប្រសើរ និង​ទាន់​ពេលវេលា ​ដើម្បីឆ្លើយតបសេចក្តីត្រូវការរបស់សាធារណៈជន សំដៅធ្វើយ៉ាងណាធានា​ឲ្យ​បាននូវស្ថិរភាពថ្លៃ​កសិផលចំពោះទីផ្សារក្នុងស្រុក​ និងជំរុញការផលិតចំពោះផលិតផលណា​ដែល​មានតម្លៃខ្ពស់សម្រាប់នាំចេញទៅកាន់ទីផ្សារអន្តរជាតិ៕អត្ថបទ៖ ឈិត បូរ៉ាវី