បាល់ទាត់៖ ក្លឹប Tottenham Hotspur និងក្រុមហ៊ុនធានារ៉ាប់រងអាយុជីវិតអេអាយអេ (AIA) ប្រកាសគាំទ្រដល់អង្គការផ្កាយសមុទ្រកម្ពុជា។ Tottenham Hotspur នឹងពាក់អាវដែលបានបោះពុម្ពជាពិសេស ដោយមាននិមិត្តសញ្ញារបស់អង្គការផ្កាយសមុទ្រក្នុងការប្រកួត Premier League ជាមួយនឹង Sheffield United នៅថ្ងៃទី២ ខែឧសភា ឆ្នាំ២០២១។
ក្នុងនាមជាផ្នែកមួយនៃភាពជាដៃគូរយៈពេលវែងជាមួយក្លឹប Tottenham Hotspur ក្នុងការលើកកម្ពស់សុខភាព និងសុខុមាលភាពនៅទូទាំងតំបន់អាស៊ីប៉ាស៊ីហ្វិក ក្លឹបបាល់ទាត់ដែលមូលដ្ឋាននៅទីក្រុងឡុងដ៍មួយនេះ នឹងដាក់និមិត្តសញ្ញាអង្គការផ្កាយសមុទ្រជំនួសឲ្យនិមិត្តសញ្ញា របស់ក្រុមហ៊ុនធានារ៉ាប់រងអាយុជីវិត AIA នៅផ្នែកខាងមុខនៃអាវរបស់ក្រុម ហើយនឹងនៅលើផ្លាកដាក់ជុំវិញទីលានប្រកួត ដើម្បីផ្សព្វផ្សាយលើកកម្ពស់ការយល់ដឹង។ អាវកីឡាដែលត្រូវបានពាក់ក្នុងការប្រកួតនឹងត្រូវចុះហត្ថលេខាដោយកីឡាករ និងដាក់ដេញថ្លៃដើម្បីរៃអង្គាសថវិកាឲ្យអង្គការផ្កាយសមុទ្រ និងមូលនិធិរបស់ក្លឹប Tottenham Hotspur ដែលមានគោលដៅបង្កើតឱកាសនាំមកនូវការផ្លាស់ប្តូរក្នុងជីវិត ដល់ប្រជាជនក្នុងសហគមន៍មូលដ្ឋាន។ ក្រុមហ៊ុនធានារ៉ាប់រងអាយុជីវិតអេអាយអេ ខេមបូឌា បានសហការជាមួយនឹងអង្គការផ្កាយសមុទ្រអស់រយៈពេលជាច្រើនឆ្នាំមកហើយ ហើយគ្រូបង្វឹកសម្រាប់ការអភិវឌ្ឍន៍បាល់ទាត់ពិភពលោករបស់ក្លឹប Tottenham Hotspur ក៏បានចំណាយពេលនៅទីក្រុងភ្នំពេញធ្វើការជាមួយកីឡាករ និងគ្រូបង្វឹកស្ម័គ្រចិត្តជាច្រើន ដើម្បីគាំទ្រដល់គំនិតផ្ដួចផ្ដើមបាល់ទាត់ថ្នាក់មូលដ្ឋាន របស់អង្គការផ្កាយសមុទ្រផងដែរ។
កញ្ញា ជួប វិច្ឆិកា ប្រធានប្រចាំប្រទេសរបស់អង្គការផ្កាយសមុទ្របានបន្ថែមថា “ពួកយើងសូមថ្លែងអំណរគុណយ៉ាងជ្រាលជ្រៅ ចំពោះការគាំទ្រដ៏មានតម្លៃមួយនេះ តាមរយៈភាពជាដៃគូរបស់យើងជាមួយនឹងក្លឹប Tottenham Hotspurs និងក្រុមហ៊ុនអេអាយអេ ខេមបូឌា។ ការដាក់បង្ហាញនិមិត្តសញ្ញារបស់អង្គការផ្កាយសមុទ្រ លើអាវកីឡាកំឡុងពេលការប្រកួត EPL គឺកិត្តិយសដ៏ធំធេងមួយសម្រាប់អង្គការរបស់យើង កុមារ និងប្រជាជនកម្ពុជាទាំងអស់ផងដែរ។ វាមិនត្រឹមតែបង្ហាញពីការទទួលស្គាល់ អំពីការងាររបស់យើងប៉ុណ្ណោះទេ ប៉ុន្តែវាក៏ជាការជម្រុញទឹកចិត្តយ៉ាងខ្លាំងមួយ ដើម្បីឲ្យយើងបន្តគាំទ្រដល់កុមារក្រីក្ររាប់ពាន់នាក់នៅកម្ពុជា ដោយបង្កើតឲ្យមានការផ្លាស់ប្តូរចាប់ពីកុមារម្នាក់ទៅ។ សូមបញ្ជាក់ថា អង្គការផ្កាយសមុទ្រប្រើប្រាស់ការអប់រំ ដើម្បីផ្លាស់ប្រែជីវិតរបស់កុមារក្រីក្ររាប់ពាន់នាក់នៅកម្ពុជា ដែលជាប្រទេសមួយមានកុមារជិត ៤៩% កំពុងរស់នៅក្នុងភាពក្រីក្រពហុសមាសភាគ។ គំនិតផ្ដួចផ្ដើមអប់រំរបស់អង្គការមួយនេះ បានផ្លាស់ប្តូរជីវិតសិស្សានុសិស្សរាប់រយនាក់ក្នុងមួយឆ្នាំ ដែលពួកគេធ្លាប់បោះបង់ការសិក្សា រឺមិនធ្លាប់បានចូលរៀនសូត្រពីមុនមកទេ។ សិស្សទាំងនេះទទួលបានឱកាសក្នុងការចូលរៀនថ្នាក់អប់រំពន្លឿន និងការគាំទ្រដ៏សំខាន់ផ្សេងទៀត ដូចជាការថែទាំសុខភាពអាហារូបត្ថម្ភ និងការអភិវឌ្ឍន៍ការងារ៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
