ភ្នំពេញ៖ កងទ័ពកម្ពុជា និងកងទ័ពចិន នឹងធ្វើសមយុទ្ធរួមគ្នា ចាប់ពីថ្ងៃទី២៣ ខែមីនា ដល់ថ្ងៃទី៨ ខែមេសា ឆ្នាំ២០២៣នេះ ដើម្បីផ្លាស់ប្តូរបទពិសោធន៍គ្នាទៅវិញទៅមក និងដើម្បី លើកកម្ពស់សមត្ថភាពរបស់កងទ័ពកម្ពុជា ពុំមែនធ្វើឡើងក្នុងគោលបំណងគំរាមកំហែង ដល់ប្រទេសណានោះឡើយ។

ថ្លែងប្រាប់អ្នកសារព័ត៌មាន នៅក្នុងសន្និសីទសារព័ត៌មាន នាព្រឹកថ្ងៃទី២១ ខែមីនា ឆ្នាំ២០២៣នេះ ឧត្តមសេនីយ៍ទោ ថោង សូលីម៉ូ អ្នកនាំពាក្យអគ្គបញ្ជាការកងយោធពលខេមរភូមិន្ទ បានឲ្យដឹងថា កងទ័ពកម្ពុជាជាង៥០០នាក់ និងកងទ័ពចិនជាង២០០នាក់ នឹងធ្វើសមយុទ្ធរួមគ្នា ដែល​មាន​ឈ្មោះថា នាគមាស២០២៣ ក្រោមប្រធានបទ «ប្រតិបត្តិការការពារសន្តិសុខក្នុងព្រឹត្តិការណ៍ធំៗ និង​ការជួយសង្គ្រោះមនុស្សធម៌ នៃកងទ័ពប្រទេសទាំងពីរកម្ពុជា-ចិន»។

លោកឧត្តមសេនីយ៍ បានបន្តថា ​ការធ្វើនេះ គឺជាការគ្រោងទុកជាយូរណាស់មកហើយ​រវាង​កងទ័ព​នៃប្រទេសទាំងពីរ ពុំមែនធ្វើឡើងដោយចៃដន់នោះឡើយ។

លោកឧត្តមសេនីយ៍ទោ បានបញ្ជាក់បន្ថែមទៀតថា កងទ័ពទាំងពីរបានឯកភាពគ្នាធ្វើសមយុទ្ធ​នេះ​នៅមជ្ឃមណ្ឌលហ្វឹកហ្វឺនរបស់កងរាជអាវុធហត្ថ(ភ្នំជុំរីករាយ) ​ស្ថិតនៅក្នុងភូមិសាស្ត្រ ឃុំពាម ស្រុកសាមគ្គីមានជ័យ ​ខេត្តកំពង់ឆ្នាំង ​ខណៈសមយុទ្ធនេះគឺជាការផ្សារភ្ជាប់កិច្ច​សហប្រតិបត្តិការ​រវាងកងទ័ពប្រទេសទាំងពីរក្នុងការលើកកម្ពស់ទំនាក់ទំនងល្អ ​បង្កើនចំណងសាមគ្គីភាព​ មេត្រីភាព ការ​បណ្ដុះបណ្តាលចំណេះដឹង​ ចំណេះធ្វើ ផ្លាស់ប្ដូរបទពិសោធន៍ ​ចេះសម្របសម្រួល ចេះរស់នៅ​និងធ្វើការងាររួមគ្នា ​ជាមួយជាតិសាសន៍ជាច្រើនក្នុងពេលធ្វើប្រតិបត្តិការរួមគ្នា ​ក៏ដូចជាឆ្លើយតប ទៅនឹងបញ្ហាប្រឈមនានា ដែលមិនមែនជាប្រពៃណីជាដើម។

បើតាមអ្នកនាំពាក្យរបស់អគ្គបញ្ជាការនៃកងយោធពលខេមរភូមិន្ទរូបនេះ​ បានឲ្យដឹងផងដែរថា សមយុទ្ធនាគមាសរវាងកម្ពុជា-ចិន​ គឺបានធ្វើឡើងតាំងពីឆ្នាំ២០១៦ ​រហូតមកដល់ពេលនេះ​គឺមាន​បានចំនួន ៤លើករួចមកហើយ ​គឺនៅក្នុងឆ្នាំ២០១៦ ,២០១៨, ២០១៩ ​និងឆ្នាំ ២០២០ ។ ភាគីទាំងពីរបានផ្អាកចំនួនបីដង ​គឺនៅឆ្នាំ ២០១៧ ​ដោយជាប់រវល់ក្នុងយុទ្ធនាការបង្ក្រាបគ្រឿង​ញៀន​ និងការបោះឆ្នោតក្រុមប្រឹក្សាឃុំសង្កាត់។ ឆ្នាំ ២០២១ ​និងឆ្នាំ២០២២ ​ដោយសារតែ​ប្រទេស​ទាំងពីរ ប្រឈមនឹងការឆ្លងរីករាលដាលជំងឺកូវីដ-១៩៕ អត្ថបទ៖ បាន ចក់