ភ្នំពេញ៖ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការប្រចាំការក្រសួងសុខាភិបាល តំណាងឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល នាព្រឹកថ្ងៃទី២១ ខែមីនា ឆ្នាំ២០២៣នេះ បានអនុញ្ញាតឱ្យលោកស្រី Haruko KAMEI ប្រធានអង្គការ JICA ប្រចាំនៅកម្ពុជា និងលោក Mazamasa SANUI ដែលទើបទទួលបានការតែងតាំងជាប្រធានអង្គការ JICA ថ្មី ប្រចាំ​នៅកម្ពុជា ចូលជួបសម្តែងការគួរសម ​និងជម្រាបលា ក្នុងឱកាសដែលលោកស្រីត្រូវ​បាន​បញ្ចប់​អាណត្តិ​ដឹកនាំអង្គការ JICA ដោយជោគជ័យក្នុងរយៈពេល២ឆ្នាំ ​៥ខែកន្លងមក ព្រមទាំងបានណែនាំប្រធានថ្មីរបស់អង្គការ JICA ​គឺលោក Mazamasa SANUI ។

ជា​កិច្ចចាប់ផ្តើម ​លោកជំទាវរដ្ឋលេខាធិការប្រចាំការ បានសម្តែងនូវការស្វាគមន៍យ៉ាង​កក់ក្តៅ​ដល់​លោកស្រី Haruko KAMEI និងកោតសរសើរដល់អង្គការ JICA ​ដែល​បាន​ផ្តល់នូវកិច្ច​សហការ​គាំទ្រ​យ៉ាងខ្លាំងក្លាដល់វិស័យសុខាភិបាល ​ជាពិសេសអង្គការ JICA មិនត្រឹមតែជួយគាំទ្រលើផ្នែក​ហេដ្ឋា​រចនាសម្ព័ន្ធ ​សុខាភិបាលប៉ុណ្ណោះទេ ​និងថែមទាំង​បាន​ផ្តល់នូវអ្នកជំនាញបច្ចេកទេស ព្រមទាំង​កិច្ចសហប្រតិបត្តិការក្នុងការអភិវឌ្ឍ​ធនធានមនុស្សក្នុងវិស័យសុខាភិបាល ​និង​គម្រោង​ពង្រឹង​ប្រព័ន្ធសុខាភិបាល​ជាអាទិភាពនានា​សំដៅលើកកម្ពស់សុខភាព ​និង​សុខុមាលភាព​ប្រជាជន​នៅទូទាំង​ប្រទេសកម្ពុជា។

ជាមួយគ្នានោះដែរ ​លោកស្រី Haruko KAMEI បាន​សំដែង​នូវ​អំណរគុណ ​ដល់ក្រសួងសុខាភិបាល ដែល​តែង​តែផ្តល់ការគាំទ្រ​សម្រប​សម្រួល​ដល់កិច្ច​សហប្រតិបត្តិការកន្លងមក។

លោកស្រី មាន​ក្តីសោមនស្សរីករាយជាពន់ពេក ​ដោយឆ្នាំនេះជាខួបលើកទី៧០ ​នៃ​ចំណងមិត្តភាព​រវាង​ប្រទេសជប៉ុន និងព្រះរាជាណាចក្រកម្ពុជា​ និងជាខួបគម្រប់៣០ឆ្នាំ នៃកិច្ចសហប្រតិបត្តិការ​របស់​ទីភ្នាក់ងារចៃកា និងរាជរដ្ឋាភិបាលកម្ពុជា។

លោកស្រីបានសំដែងនូវការកោតសរសើរដល់រាជរដ្ឋាភិបាលកម្ពុជា ​និងក្រសួងសុខាភិបាលកម្ពុជា ដែល​អាចគ្រប់គ្រងការរីករាលដាលនៃជំងឺកូវីដ-១៩ ​បានទាន់ពេល។

លោកជំទាវវេជ្ជបណ្ឌិត យក់ សម្បតិ្ត បានជម្រាបជូនភ្ញៀវអំពីបទពិសោធន៍​នៃការគ្រប់គ្រង ​ទប់ស្កាត់ ការ​រីករាលដាលជំងឺកូវីដ-១៩​ នៅកម្ពុជា​ក្នុងរយៈពេលជាង២ឆ្នាំកន្លងមក ដែលជោគជ័យ​នេះកើតឡើងពីការដឹកនាំដ៏ឈ្លាសវៃប្រកបដោយគតិបណ្ឌិតរបស់សម្តេច​តេជោ ​ហ៊ុន ​សែន នាយករដ្ឋមន្រ្តី ​។

លោកជំទាវរដ្ឋលេខាធិការ​ ក៏បានថ្លែងអំណរគុណអង្គការ JICA ​និងរដ្ឋាភិបាលជប៉ុន ដែល​បានផ្តល់ជាជំនួយសហ-ប្រតិបត្តិការដល់កម្ពុជាលើផ្នែកសុខភាពមាតា ​និងទារក ការសាង​សង់មន្ទីរពេទ្យ និងផ្តល់ជាឧបករណ៍បរិក្ខារពេទ្យជាច្រើន ក្រោមក្របខ័ណ្ឌជំនួយ​សហប្រតិបត្តិការ​បច្ចេកទេស និង​ជំនួយ​ឥតសំណង​ដល់វិស័យសុខាភិបាលនាពេលកន្លងមក ជាពិសេសក្នុងអំឡុងពេលប្រយុទ្ធប្រឆាំង នឹងជំងឺកូវីដ-១៩។

លោកជំទាវរដ្ឋលេខាធិការប្រចាំការក្រសួងសុខាភិបាល ក៏បានឯកភាពចំពោះការលើកឡើង​អំពី​កិច្ចសហប្រតិបត្តិការលើគម្រោងជាជំហាន​បន្ទាប់របស់អង្គការ JICA ក្នុងការផ្តល់ជា​ជំនួយ​លើ​ការសាងសង់មន្ទីរពេទ្យបន្ថែម ​ការផ្តល់ជាឧបករណ៍សម្រាប់គ្រប់គ្រង​សំណល់វេជ្ជសាស្ត្រ ការ​ពង្រឹង​បន្ថែមលើការគ្រប់គ្រងជំងឺមិនឆ្លង ​និង​ការចាត់​បញ្ជូន​ជំនាញការ ​ជាទីប្រឹក្សាផ្នែកសុខាភិបាល​មក​កម្ពុជា ​ព្រមទាំង​គម្រោង​បណ្តុះបណ្តាល​មុន ​នឹង​ការផ្តល់សេវា ​និង​សំណូមពរដល់​អង្គការ JICA បន្តការ​គាំទ្រ​កិច្ចសហ-ប្រតិបត្តិការនេះជាបន្តទៀត។

លោកជំទាវរដ្ឋលេខាធិការប្រចាំការក្រសួងសុខាភិបាល​ ក៏បាន​ជូនពរដល់លោកស្រី​អង្គការ JICA ទទួល​បានជោគជ័យថ្មីៗ ​ក្នុងភារកិច្ចថ្មីថែមទៀត៕អត្ថបទ រដ្ឋា