ភ្នំពេញ៖ រាជរដ្ឋាភិបាលសហព័ន្ធ អាល្លឺម៉ង់ ​និងអូស្រ្តាលីតាមរយៈអង្គការ GIZ បានផ្ដល់ជំនួយ​ជា​សម្ភារការិយាល័យចំនួន ​៥៩មុខ ជូនដល់ ​ស្ថាប័នមូលនិធិជាតិជំនួយសង្គម របស់កម្ពុជា។ ការប្រគល់សម្ភារការិយាល័យនេះ ​ប្រព្រឹត្តិទៅនៅថ្ងៃទី ២១ ​ខែមីនា ឆ្នាំ ​២០២៣។

ជាការរួមចំណែកជាមួយរាជរដ្ឋាភិបាលកម្ពុជា ជាពិសេសក្នុងវិស័យជំនួយសង្គមជួយដល់ ប្រជាពលរដ្ឋ​ក្រីក្រ ​និងងាយរងគ្រោះ រាជរដ្ឋាភិបាលសហព័ន្ធ ​អាល្លឺម៉ង់​ និងអូស្រ្តាលី តាមរយៈអង្គការ GIZ ​បានផ្ដល់​ជំនួយ​ជា​សម្ភារការិយាល័យចំនួន ​៥៩មុខសរុបជាទឹកប្រាក់ប្រមាណ ៧ម៉ឺនដុល្លារ ​ជូនដល់​ ស្ថាប័នមូលនិធិជាតិជំនួយសង្គម។

ឯកឧត្តម ឈួរ សុបញ្ញា ក្នុងនាមជាប្រតិភូរាជរដ្ឋាភិបាលទទួលបន្ទុកជាអគ្គនាយកមូលនិធិជាតិ​ជំនួយ​សង្គម ចាត់ទុកការផ្តល់ជំនួយនេះ ​ជាការរួមចំណែកដ៏សំខាន់ ​ក្នុងការធានាប្រសិទ្ធភាពការងារ របស់មូលនិធិជាតិជំនួយសង្គម។

ឯកឧត្តមបន្តថា​ ការផ្ដល់ជំនួយ ក៏ស្របតាមអនុស្សារណៈដែលបានព្រមព្រាងគ្នាកន្លងមក ដោយ​ផ្តោតលើ ៣ចំណុចធំៗ ​ក្នុងគោលដៅកែប្រែឱ្យស្ថាប័នមូលនិធិជាតិ​ជំនួយសង្គម ក្លាយ​ជាស្ថាប័ន​ឌីជីថល។

ក្នុងឱកាសផ្ដល់ជំនួយសម្ភារជូន មូលនិធិជាតិជំនួយសង្គមនេះ លោកស្រី Corinna Heineke តំណាង​អង្គការ GIZ បានបង្ហាញនូវភាពមោទកភាព ​ដែលបានរួមចំណែកជួយដល់រាជរដ្ឋាភិបាលកម្ពុជា ជា​ពិសេសជួយគាំទ្រដល់ ​មូលនិធិជាតិជំនួយសង្គម។

លោកស្រីបន្តថា GIZ នឹងបន្តកិច្ចសហការល្អប្រសើរ ជួយដល់មូលនិធិជាតិជំនួយសង្គម ធ្វើ​យ៉ាងណា​ឱ្យទាំងមន្រ្តី ទាំងប្រព័ន្ធមានប្រសិទ្ធផល ​ប្រសិទ្ធភាព ​ឆ្លើយតបគ្នា ដើម្បី​អន្តរាគមន៍​ជួយដល់ប្រជាពលរដ្ឋ។

មូលនិធិជាតិជំនួយសង្គម ជាស្ថាប័នថ្មីមាន តួនាទីក្នុងការផ្ដល់​អន្តរាគមន៍​ជំនួយសង្គម និង​សន្តិសុខសង្គម ​ដើម្បី​លើក​កម្ពស់​សុខុមាលភាព​ របស់​ប្រជាជនក្រីក្រ ​និងងាយរងគ្រោះ និងបើក​ផ្ដល់ប្រាក់សោធនជូនមន្ត្រីរាជការស៊ីវិល​ និងអតីតយុទ្ធជនផងដែរ ។

បច្ចុប្បន្ន មូលនិធិជាតិជំនួយសង្គម ​កំពុងអនុវត្តកម្មវិធីជំនួយសង្គម ដូចជា កម្មវិធី​ឧបត្ថម្ភ​សាច់ប្រាក់​ជូនគ្រួសារក្រីក្រ ​និងងាយរងគ្រោះក្នុងអំឡុងពេល​ ប្រយុទ្ធនឹងជំងឺកូវីដ-១៩ ​កម្មវិធី​ឧបត្ថម្ភ​ សាច់ប្រាក់​ជូន​ស្ត្រីមានផ្ទៃពោះ ​និងកុមារអាយុក្រោម២ឆ្នាំ ​កម្មវិធី​ឧបត្ថម្ភ​សាច់ប្រាក់ ជូន​គ្រួសារ​ងាយរងហានិភ័យ​ ក្នុងអំឡុងពេល​មាន​សម្ពាធអតិផរណា និងកម្មវិធីរបបសន្តិសុខសង្គមផងដែរ៕ អត្ថបទ៖ គឹមហុក