សៀមរាប៖ ព្រះរាជាណាចក្រកម្ពុជារៀបចំព្រះរាជពិធី ប្រោសព្រះរាជទានព្រះអគ្គិជ័យកីឡា ដោយបានរៀបចំបួងសួងតាមក្បួនតម្រា តាមរយៈការដុតភ្លើងចេញពីកម្តៅព្រះអាទិត្យដោយផ្ទាល់ អស់រយៈពេលពីរយប់ ពីរថ្ងៃដើម្បីទទួលបានព្រះអគ្គិជ័យកីឡា សម្រាប់ការរត់ដង្ហែព្រះអគ្គិជ័យកីឡា។

ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានថ្លែងថា ព្រឹកនេះ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា យាង ជាព្រះរាជាធិបតីដ៏ខ្ពង់ខ្ពស់ ក្នុងព្រះរាជពិធីប្រោសព្រះរាជទាន «ព្រះអគ្គិជ័យកីឡា» ទៅកាន់​អត្តពលិក​ដើម្បីរត់ដង្ហែតាមបណ្តាប្រទេសអាស៊ាន ​មុននឹងនាំ​យក​ទៅបំភ្លឺពហុកីឡដ្ឋានជាតិ​មរតកតេជោ ​ដែលជាកន្លែងប្រកួតកីឡាស៊ីហ្គេមលើកទី៣២ ​និងអាស៊ានប៉ារ៉ាហ្គេមលើកទី១២ ក្នុងនាមកម្ពុជាជាម្ចាស់ផ្ទះ។

ឯកឧត្ដមបន្តថា ផ្ដើមចេញពីប្រវត្តិ និងខ្លឹមសារនៃ ព្រះអគ្គិជ័យកីឡា ​ព្រះរាជាណាចក្រកម្ពុជា​រៀបចំ​ព្រះរាជពិធី ប្រោសព្រះរាជទានព្រះអគ្គិជ័យកីឡា ​ដោយបានរៀបចំបួងសួងតាមក្បួនតម្រា តាមរយៈការដុតភ្លើងចេញពីកម្តៅព្រះអាទិត្យដោយផ្ទាល់អស់រយៈពេលពីរយប់ ​ពីរថ្ងៃ ដើម្បី​ទទួលបានព្រះអគ្គិជ័យកីឡាសម្រាប់ការរត់ដង្ហែព្រះអគ្គិជ័យកីឡា ឆ្ពោះទៅកាន់ការប្រារព្ធ​ពិធី​បើកនៃការប្រកួតកីឡាស៊ីហ្គេមលើកទី៣២​ និងអាស៊ានប៉ារ៉ាហ្គេមលើកទី១២។

ឯកឧត្ដម បញ្ជាក់ថា ព្រះរាជាធិបតីរបស់ព្រះអង្គ គឺជាប្រវត្តិសាស្ត្រថ្មីមួយទៀតរបស់កម្ពុជា​ក្នុង​សម័យកាលដែលប្រទេសជាតិមានសុខសន្តិភាព​ មានការរីកចម្រើនគ្រប់សព្វវិស័យ ព្រមទាំង​អាចរៀបចំវេទិកាជាតិ ​និងអន្តរជាតិជាច្រើនដើម្បី​ទទួលស្វាគមន៍មិត្ត​ និងភ្ញៀវទេសចរ​ពី​បណ្តាប្រទេសនានា មកកាន់ព្រះរាជាណាចក្រកម្ពុជា៕