សៀមរាប ៖ ដំណើរទស្សនកិច្ចសិក្សារបស់និសិ្សតអាហារូបករណ៍សម្តេចតេជោ និងសម្តេចកិតិ្តព្រឹទ្ធបណ្ឌិត មកកាន់ខេត្តសៀមរាប រយៈពេល០៣ថ្ងៃ កាលពីថ្ងៃទី១៧-១៨-១៩ ខែមីនា ឆ្នាំ២០២៣។

​ក្រោមការដឹកនាំ និងចង្អុលបង្ហាញដ៏ខ្ពង់ខ្ពស់របស់ឯកឧត្ដមបណ្ឌិត ហ៊ុន ម៉ាណែត ប្រធានសមាគមសិស្ស និស្សិតក្រីក្រ អាហារូបករណ៍សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន (ហៅកាត់ អ. ម. ត) លោក លាង សំណាត់ ប្រធានក្រុមការងារសិស្ស និស្សិត(អ.ម.ត)ខេត្តកំពត ខេត្តតាកែវ និងក្រុមការងារ បានដឹកនាំនិស្សិតអាហារូបករណ៍(អ.ម.ត) ខេត្តកំពត និងខេត្តតាកែវ សរុប​ប្រមាណ២៥០នាក់​ ធ្វើដំណើរទៅទស្សនកិច្ចនៅខេត្តសៀមរាប ដើម្បីចូលរួមអបអរសាទរខួបលើកទី១១២ ទិវាអន្តរជាតិ នារី ៨មីនា ឆ្នាំ២០២៣ ក្រោមប្រធានបទ«ស្រ្តីរួមគ្នា រក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល» និងបុណ្យចូលឆ្នាំថ្មី ឆ្នាំថោះ ប្រពៃណីជាតិនាពេលខាងមុខ។

ក្នុងដំណើរទស្សនៈកិច្ចនេះ លោក លាង សំណាត់ បានដឹកនាំនិស្សិតចូលទៅទស្សនានៅវិមាន ឈ្នះ-ឈ្នះ ដើម្បីអោយក្រុមការងារ និងនិស្សិតទាំងអស់បានស្វែងយល់ពីសារសំខាន់នៃសន្តិភាព ការបញ្ចប់សង្គ្រាមស៊ីវិលរយៈ​ពេល​ជិត៥០០ឆ្នាំនៅប្រទេសកម្ពុជា ការកសាងប៉ូលសេដ្ឋកិច្ច ការរៀបចំទីក្រុងឆ្លាតវៃ គុណតម្លៃនៃ​នយោបាយ​ឈ្នះ-ឈ្នះ​ តំបន់បេតិកភណ្ឌប្រវត្តិសាស្រ្ត ស្ថាបត្យកម្មសំណង់វិមានឈ្នះ-ឈ្នះ កីឡាដ្ឋាន មរតកតេជោ ការអភិវឌ្ឍ​ភូមិធម្មជាតិ និងបទពិសោធន៍ល្អលើការគ្រប់គ្រង និងពង្រឹងសាមគ្គីភាពក្រោម​ការដឹកនាំរបស់​សម្ដេច​អគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាល និងជាប្រធានគណបក្សប្រជាជនកម្ពុជា ។

តមកនៅព្រឹកថ្ងៃទី១៨ ខែមីនា ឆ្នាំ២០២៣ ក្រុមប្រតិភូ និងនិស្សិត អ.ម.ត ខេត្តកំពត ខេត្តតាកែវ និងខេត្តសៀមរាប បានជួបជុំគ្នាជិះកង់ សន្តិភាព ទស្សនាជុំវិញប្រាសាទអង្គរវត្ត និងប្រាសាទនានា ដែលជាបេតិកភណ្ឌជាតិ ក្រោម​បរិយាកាសរីករាយ និងស្និទ្ធស្នាល គួរជាទីមោទនៈ។

នារសៀលថ្ងៃដដែល ក្រុមប្រតិភូ អ.ម.ត បាននាំយកថវិកាឯកឧត្តមបណ្ឌិត ហ៊ុន ម៉ាណែត និងលោកជំទាវ ពេជ ច័ន្ទមុនី ចំនួន ៣០.០០០.០០០ (សាមសិបលានរៀល )ឧបត្ថម្ភដល់មន្ទីរពេទ្យកុមារអង្គរ ។ ឆ្លៀតក្នុងឱកាសនេះដែរ ឯកឧត្តមបាននាំយកនូវមតិផ្តាំផ្ញើរ សួរសុខទុក្ខរបស់ឯកឧត្តមបណ្ឌិត ហ៊ុន ម៉ាណែត និងលោកជំទាវ ជូនដល់លោក​ប្រធានមន្ទីរពេទ្យកុមារអង្គរ និងជូនពរអោយលោកប្រធាន និងសហការី នៃមន្ទីរពេទ្យកុមារអង្គរមានសុខភាពល្អ ដើម្បីបន្តបេសកកម្មដ៏មានសារប្រយោជន៍ជួយព្យាបាលកុមារទាំងអស់ដោយមិនប្រកាន់និន្នាការនយោបាយ។ នៅរាត្រីនោះដែរ ក្រុមប្រតិភូ អ.ម.ត បានជួបជុំគ្នាទទួលទានអាហារសាមគ្គីក្រោមម្លប់សន្តិភាព ក្នុងបរិយាកាស​ដ៏រីករាយក្រៃលែង៕ អត្ថបទ ៖ រដ្ឋា