​អាមេរិក៖ ប្រធានាធិបតី​សហរដ្ឋអាមេរិក​លោក Joe Biden កាលពី​ថ្ងៃ​ចន្ទ​បាន​ចុះហត្ថលេខា​លើ​ច្បាប់​មួយ ជា​ច្បាប់​តម្រូវឱ្យមាន​ការចេញ​ផ្សាយ​សម្ភារៈ​ស៊ើបការណ៍​សម្ងាត់ ​លើ​ការ​ជាប់​ពាក់ព័ន្ធ​រវាង​ការ​ផ្ទុះ​ឡើង​ជំងឺ​រាតត្បាត ​Covid-19 និង​មន្ទីរ​ពិសោធន៍​នៅ​ទីក្រុង​អ៊ូ​ហាន​។

លោក Biden បាន​និយាយ​នៅក្នុង​សេចក្តីថ្លែងការណ៍​ថា យើង​ចាំបាច់​ត្រូវ​ឈាន​ទៅ​ដល់​កម្រិត​ប្រភព​ដើម​នៃ​វីរុស Covid-19 រួម​ទាំង​ការ​ជាប់​ពាក់ព័ន្ធ​ដ៏​មាន​សក្តានុពល​ទៅដល់​វិទ្យាស្ថាន​នៅ​ទីក្រុង​អ៊ូ​ហាន​។ លោក​ប្រធានាធិបតី​និយាយ​ថា លោក​ចែករំលែក​គោលដៅ​របស់​សភា​នៃ​ការ​ចេញ​ផ្សាយ​ព័ត៌មានឱ្យបាន​ច្រើន ​តាម​ដែល​អាចធ្វើ​ទៅបាន​អំពី​ប្រភព​ដើម​នៃ​វីរុស Covid-19។ លោក Biden និយាយ​ថា នៅ​ឆ្នាំ​២០២១ បន្ទាប់ពី​បាន​ចូលកាន់​តំណែង លោក​បាន​ដឹកនាំ​សហគមន៍​ស៊ើបអង្កេត​ឱ្យ​ប្រើ​ប្រាស់​រាល់​ឧបករណ៍​ទាំងអស់ ដែល​មាន​ក្នុង​ដៃ​ដើម្បី​ធ្វើការ​ស៊ើបអង្កេត​។ ការងារ​នោះ​កំពុង​បន្ត ប៉ុន្តែ​ធ្វើ​តាម​លទ្ធភាព​ដែល​អាច​ធ្វើ​ទៅ​បាន នឹង​ត្រូវ​ចេញផ្សាយ​ដោយ​មិន​បង្ក​គ្រោះថ្នាក់​ដល់​សន្តិសុខ​ជាតិ​។ ច្បាប់​នេះ​បាន​បង្ក​ហានិភ័យ​ផ្នែក​នយោបាយ​សម្រាប់​លោក Biden ដែល​កំពុង​ចរចា​នូវ​ទំនាក់ទំនង​ដ៏​លំបាក​ជាមួយ​មេដឹកនាំ​ចិន​លោក Xi Jinping​។

ទីក្រុង​ប៉េកាំង​បាន​បដិសេធ​យ៉ាង​ដាច់​ណាត់​នូវ​លទ្ធភាព​ដែល​ថា ​មានការ​បែក​ធ្លាយ​ក្នុង​អំឡុងពេល​ស្រាវជ្រាវ​នៅ​មន្ទីរ​ពិសោធន៍​ទីក្រុង Wuhan អាច​បង្ក​ឲ្យ​មាន​ជំងឺ​រាតត្បាត​ជាស​កល​នោះ​។ យោង​តាម​ការ​ប្រមូល​ទិន្នន័យ​ជា​ផ្លូវការ​បាន​ឲ្យ​ដឹង​ថា ការ​ផ្ទុះ​ឡើង​វីរុស Covid-19 បាន​ចាប់ផ្តើម​នៅ​ឆ្នាំ២០១៩ នៅ​ទីក្រុង​អ៊ូ​ហាន ប្រទេស​ចិន​ភាគ​ខាងកើត បណ្តាល​ឲ្យ​មាន​អ្នក​ស្លាប់​ជិត ៧​លាន​នាក់​នៅ​ទូទាំង​ពិភពលោក​រហូតមកដល់​ពេលនេះ ដែល​ច្រើន​ជាង​ ១​លាន​នាក់​នៅ​ក្នុង​សហរដ្ឋអាមេរិក​។ ក្រសួង​ថាមពល​សហរដ្ឋអាមេរិក ជាទី​ភ្នាក់ងារ​មួយ​ក្នុង​ចំណោម​ទីភ្នាក់ងារ​អាមេរិក​ដែល​ស៊ើបអង្កេត​លើ​មហន្តរាយ​នេះ បាន​ធ្វើការ​សន្និដ្ឋាន​កម្រិត​ជំនឿ​ទាប​ថា វីរុស​នេះ​ប្រហែលជា​បាន​ចេញ​មកពី​មន្ទីរ​ពិសោធន៍​មួយ​ ដែល​ស្រប​ជាមួយ​ការវាយតម្លៃ​របស់​ទីភ្នាក់ងារ​ស៊ើបអង្កេត FBI ប៉ុន្តែ​ផ្ទុយ​ពី​ការ​សន្និដ្ឋាន​របស់​ទីភ្នាក់ងារ​ជាច្រើន​ទៀត៕

អត្ថបទ៖ ប៊ុនថន