​អ៊ុយក្រែន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​និយាយ​កាលពី​ថ្ងៃ​ចន្ទ​ថា ការ​ផ្គត់ផ្គង់​គ្រាប់រំសេវ​ពី​សហភាព​អឺរ៉ុប​ដល់​ប្រទេស​អ៊ុយ​ក្រែ​ន បាន​បង្កើន​ទំនុក​ចិត្ត​របស់​លោក​ក្នុង​សង្គ្រាម​។

បណ្តា​ប្រទេស​សហភាព​អឺរ៉ុប​បាន​ព្រមព្រៀងគ្នា​នៅ​ទីក្រុង​ព្រុ​ច​សែ​ល​កាលពី​ថ្ងៃ​ចន្ទ ដើម្បី​រួមគ្នា​ទិញ​គ្រាប់កាំភ្លើង​ធំ​ ១៥៥​មី​លី​ម៉ែត្រ​ចំនួន ​១​លាន​គ្រាប់​សម្រាប់​អ៊ុយ​ក្រែ​ន ខណៈ​ភាគី​ទាំងសងខាង​បាន​បាញ់​គ្រាប់​រាប់ពាន់​គ្រាប់​ក្នុង​មួយថ្ងៃ​។ អាមេរិក​បាន​ប្រកាស​កញ្ចប់​ជំនួយ​យោធា​ចុងក្រោយ​បំផុត​របស់​ខ្លួន​ ដែល​មាន​ទឹកប្រាក់ ៣៥០​លាន​ដុល្លាររួមមាន​ទាំង​គ្រាប់រំសេវ​ជាច្រើន​សម្រាប់​កាំភ្លើង​ធំ​បាញ់​រ៉ុក្កែត HIMARS និង​យាន​ប្រយុទ្ធ​ថ្មើរជើង Bradley រួម​ទាំង​មី​ស៊ី​ល ​HARM អាវុធ​ប្រឆាំង​រថក្រោះ និង​ទូក​នៅ​លើ​ទន្លេ​។​ ​លោក Zelenskiy និយាយ​ថា នោះ​គឺជា​ការ​ផ្គត់ផ្គង់​គ្រាប់រំសេវ​ដោយ​សហភាព​អឺរ៉ុប ជា​វិធានការ​ជា​យុទ្ធសាស្ត្រ​ដែល​កំពុង​បង្កើន​ទំនុក​ចិត្ត​លើ​សាមគ្គីភាព​របស់​យើង និង​ដំណើរ​ឆ្ពោះ​ទៅ​រក​ជ័យជំនះ​លើ​រដ្ឋ​ឈ្លានពាន​។

លោក Vladimir Putin បាន​រៀប​ចំ​ទទួល​មិត្តសម្លាញ់​លោក Xi Jinping សម្រាប់​អាហារ​ពេល​ល្ងាច​នៅ​វិមាន​ក្រឹម​ឡាំង​កាលពី​ថ្ងៃ​ចន្ទ ដោយ​បង្ហាញ​ពី​ទំនាក់ទំនង​របស់​លោក​ជាមួយ​សម្ព័ន្ធមិត្ត​ដ៏​មាន​ឥទ្ធិពល​បំផុត រយៈពេល​ប៉ុន្មាន​ថ្ងៃ​បន្ទាប់ពី​តុលាការ​ព្រហ្មទណ្ឌ​អន្តរជាតិ បាន​ចេញ​ដីកា​ចាប់ខ្លួន​ប្រធានាធិបតី​រុស្ស៊ី​ពី​បទ​ឧក្រិដ្ឋកម្ម​សង្គ្រាម ​នៅ​ក្នុង​ប្រទេស​អ៊ុយ​ក្រែ​ន​។ លោក Zelenskiy ពុំបាន​និយាយ​អំពី​ដំណើរ​ទស្សនកិច្ច​របស់​លោក Xi Jinping នៅ​ក្នុង​សុន្ទរកថា​របស់​លោក​នោះ​ទេ ប៉ុន្តែ​បាន​និយាយ​ថាមាន​ភាព​ចាំបាច់​ក្នុង​ការ​ដាក់ទោស​គឺ​យុត្តិធម៌ ​និង​ស្របច្បាប់​ទាំងស្រុង​ទាក់​ទង​នឹង​ដីកា​ចាប់ខ្លួន​របស់​តុលាការ ICC សម្រាប់​លោក Putin៕

អត្ថបទ៖ ប៊ុនថន