ឥណ្ឌា៖ ខណៈដែលប្រទេសឥណ្ឌាកំពុងរងគ្រោះខ្លាំង ការឆ្លងរាលដាលយ៉ាងឆាប់រហ័សនៃជំងឺរាតត្បាតសកល បុរសមានវិជ្ជមានជំងឺ COVID-19 ម្នាក់បានសំរេចចិត្តរៀបអាពាហ៍ពិពាហ៍។ ពិធីរៀបអាពាហ៍ពិពាហ៍នេះបានធ្វើឡើង នៅក្នុងទីក្រុងរ៉ាតឡាំក្នុង រដ្ឋម៉ាត់យ៉ាប្រទេស។
កូនក្រមុំ និងកូនកំលោះ និងសមាជិកគ្រួសារទាំងអស់បានពាក់ឧបករណ៍ PPE ដែលជាឧបករណ៍ការពារខ្លួន ខណៈដែលលោកអាចារ្យក៏បានពាក់ឧបករណ៍ការពារផងដែរនោះ បានបំពេញកិច្ចដ៏ពិសិដ្ឋ និងធ្វើពិធីមង្គលការតាមប្រពៃណីសាសនាកាលពីថ្ងៃច័ន្ទ។ ពិធីមង្គលការបានធ្វើឡើង បន្ទាប់ពីទទួលបានការអនុញ្ញាតពីរដ្ឋាភិបាល។ យោងទៅតាមលោក Shyam Lal ដែលជាឪពុករបស់កូនកំលោះឲ្យដឹងថា កូនប្រុសរបស់គាត់ត្រូវបានឆ្លងពីរបីថ្ងៃមុនពេលរៀបអាពាហ៍ពិពាហ៍ ប៉ុន្តែមិនមានបង្ហាញរោគសញ្ញាទេ។
ប្រទេសឥណ្ឌាបានបង្កើតកំណត់ត្រាពិភពលោកថ្មីមួយទៀត ក្នុងករណីថ្មីនៃវីរុសកូរ៉ូណាកាលពីថ្ងៃព្រហស្បតិ៍។ ខណៈដែលមានករណីឆ្លងថ្មីចំនួន ៣៧៩.២៥៧នាក់ ឥឡូវនេះប្រទេសឥណ្ឌាបានរាយការណ៍ថា មានចំនួនអ្នកឆ្លងសរុបជាង ១៨លាន ៣សែននាក់ ដែលមានអ្នកឆ្លងច្រើនបំផុតលំដាប់ទី២ បន្ទាប់ពីសហរដ្ឋអាមេរិក៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
