អន្ដរជាតិ៖ នៅថ្ងៃអង្គារនេះ ប្រធានាធិបតីចិនលោក Xi Jinping បានចាបផ្តើមថ្ងៃទី ២នៃដំណើរទស្សនកិច្ចផ្លូវរដ្ឋរបស់លោកទៅកាន់ទីក្រុងម៉ូស្គូ ជាមួយនឹងការជួបពិភាក្សាការងារជាមួយនាយករដ្ឋមន្រ្តីរុស្ស៊ីលោក Mikhail Mishustin បន្ទាប់ពីមានការជជែកគ្នារយៈពេលជាង ៤ម៉ោងជាមួយលោកប្រធានាធិបតី Vladimir Putin កាលពីរយៈពេល ១ថ្ងៃមុន។

យោងតាមការបញ្ជាក់ពីភាគីប្រទេសទាំង ២បានឲ្យដឹងថា ការវាយលុករបស់រុស្ស៊ីទៅលើអ៊ុយក្រែន គឺជាប្រធានបទសំខាន់សម្រាប់មេដឹកនាំទាំង​២ ក្នុងនោះ លោក Putinនិយាយមុនជំនួបថា លោកត្រៀមខ្លួនរួចរាល់ក្នុងការពិភាគលើគំនិតផ្តួចផ្តើមរបស់ចិនក្នុងការបញ្ចប់សង្រ្គាម​។ 

សារព័ត៌មាន Interfax រាយការណ៍ថា លោក Xi បានអញ្ជើញលោក Putin និងលោក Mishustinផងដែរឲ្យបំពេញទស្សនកិច្ចទៅកាន់ប្រទេសចិន​។ ទោះបីជាយ៉ាងណាក៏ដោយ​សហរដ្ឋអាមេរិក និងសម្ព័ន្ធមិត្តរបស់ខ្លួន បានច្រានចោលសំណើ ដែលលំអៀងទៅខាងរុស្ស៊ី ហើយអ៊ុយក្រែនក៏ដូចគ្នាដែរ​។

គេរំពឹងផងដែរថា លោក Xi នឹងនិយាយជាមួយប្រធានាធិបតីអ៊ុយក្រែនលោក Volodymyr Zelenskiy ជាលើកដំបូង ចាប់តាំងពីការវាយលុករបស់ទីក្រុងម៉ូស្គូ កាលពីខែកុម្ភៈឆ្នាំ២០២២ ក្រោយដំណើរទស្សនកិច្ចរបស់លោកនៅរុស្ស៊ី។

ដំណើរទស្សនកិច្ចរបស់លោក Xiនេះដែរដែលជាដំណើរក្រៅប្រទេសជាលើកដំបូង ចាប់តាំងពីទទួលបានអាណត្តិទី៣ ជាប្រធានាធិបតីចិន កាលពីដើមខែនេះ នឹងបង្ហាញសញ្ញាគាំទ្រលោក Putin ស្របពេលមានកិច្ចប្រឹងប្រែងរបស់សហរដ្ឋអាមេរិក និងសម្ព័ន្ធមិត្តរបស់ពួកគេ ដើម្បីធ្វើឲ្យមេដឹកនាំរូបនេះឯកា ដោយសារតែការវាយលុករបស់ខ្លួន៕