ស៊ីហ្គេម៖ ព្រះរាជពិធីសុំភ្លើងព្រះអគ្គិអាទិទេពកីឡា និងព្រះរាជពិធីប្រោសព្រះរាជប្រទានព្រះអគ្គិជ័យកីឡា ក៏ដូចជាពិធីដង្ហែនៅប្រាសាទអង្គរវត្ត ខេត្តសៀមរាប បានប្រព្រឹត្ដទៅដោយជោគជ័យ និងទទួលបានការសាទរជាខ្លាំងពីថ្នាក់ដឹកនាំ ប្រជាពលរដ្ឋ និងថ្នាក់ដឹកនាំកីឡាចលនាអូឡាំពិកក្នុងតំបន់ ខណៈអ្នកជំនាញរំពឹងព្រឹត្តិការណ៍ជាប្រវត្តិសាស្ដ្រនេះនឹងក្លាយជាគំរូ និងមរតកដ៏យូរអង្វែងសម្រាប់អ្នកជំនាន់ក្រោយ។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ មានប្រសាសន៍ថា ព្រះរាជពិធីសុំ និងដង្ហែព្រះអគ្គិជ័យកីឡានេះត្រូវបានរៀបចំឡើងយ៉ាងអធិកអធម បំផុត តាមលំនាំព្រឹត្តិការណ៍អូឡាំពិកបុរាណ។ តែអ្វីដែលអស្ចារ្យនោះគឺការរៀបចំនៅទីតាំងដ៏អច្ឆរិយនៃតំបន់អង្គរ ដែលជំរុញឲ្យគុណតម្លៃនៃព្រះរាជពិធីនេះកាន់តែអធិកអធម និងទទួលបានការសរសើរថែមទៀត។ ប្រតិបត្តិករកីឡាឆ្នើមកម្ពុជាដដែលបន្ដថា អ្វីដែលកម្ពុជាបានរៀបចំនេះនឹងត្រូវបានចារទុកជាប្រវត្តិសាស្ដ្រ ពិសេសទុកជាស្នាដៃ និងគំរូមួយសម្រាប់ប្រទេសផ្សេងៗ ពិសេសសម្រាប់ប្រទេសកម្ពុជាផ្ទាល់សម្រាប់យកអនុវត្ត នៅពេលទទួលរៀបចំព្រឹត្តិការណ៍កីឡាអន្ដរជាតិធំៗ ជាក់ស្ដែងការប្រកួតកីឡាអូឡាំពិកយុវជនអាស៊ីឆ្នាំ២០២៩ ជាដើម។
គួរដឹងថា ក្រោយព្រះរាជពិធីសុំព្រះអគ្គិអាទិទេពកីឡា និងព្រះរាជពិធីប្រោសព្រះរាជទានព្រះអគ្គិជ័យកីឡា ក៏ដូចជាពិធីដង្ហែភ្លើងគប់ជុំវិញវង់តូចប្រាសាទអង្គរវត្ត ព្រះអគ្គិជ័យកីឡាត្រូវបានយកទៅរក្សាទុកនៅវត្តរាជបូណ៌មួយយប់ថ្ងៃទី២១ ខែមីនា មុនដង្ហែទៅកាន់បណ្ដាប្រទេសអាស៊ាននៅថ្ងៃទី២២ ខែមីនា ដែលដឹកនាំដោយឯកឧត្តម ហោ សារុន រដ្ឋលេខាធិការក្រសួងទេសចរណ៍ បេសកជនពិសេស ដើម្បីដឹកនាំប្រតិភូ និងដង្ហែព្រះអគ្គិជ័យកីឡាតាមប្រទេសនីមួយៗ ដោយផ្ដើមពីប្រទេសវៀតណាមមុនគេរហូតដល់ប្រទេសឡាវក្រោយគេ មុនត្រឡប់ចូលកម្ពុជាវិញនៅថ្ងៃទី២៧ ខែមេសា ឆ្នាំ២០២៣ ខាងមុខ។ ក្រោយដង្ហែមតាមបណ្ដាប្រទេសអាស៊ាន និងត្រលប់មកកម្ពុជាវិញ ទើបបន្ដដង្ហែព្រះអគ្គិជ័យកីឡាជុំវិញបឹងទន្លេសាប ដោយផ្ដើមពីរាជធានីភ្នំពេញ កំពង់ឆ្នាំង ពោធិសាត់ បាត់ដំបង បន្ទាយមានជ័យ សៀមរាប កំពង់ធំ និងកំពង់ចាម ចាប់ពីថ្ងៃទី២៩ ខែមេសារហូតដល់យប់ថ្ងៃទី០៥ ខែឧសភា ត្រូវដង្ហែចូលពហុកីឡដ្ឋានជាតិមរតកតេជោ ដើម្បីប្រារព្ធពិធីបើកការប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជាតែម្ដង៕ អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
