បាល់ទាត់៖ លោក Akihiro Kato ប្រធានក្លិបបាល់ទាត់អង្គរថាយហ្គឺរបានលើកឡើងថា ចង់ឃើញក្លិបបាល់ទាត់ផ្សេងៗ ចេញពីរាជធានីភ្នំពេញទៅកាន់បណ្ដាខេត្តនានា ដើម្បីជំរុញការអភិវឌ្ឍន៍បាល់ទាត់កម្ពុជាឲ្យកាន់តែរីកចម្រើន។
ការលើកឡើងនេះ បន្ទាប់ពីលោកមើលឃើញបច្ចុប្បន្នបណ្ដាក្លិបភាគច្រើន ប្រមូលផ្ដុំគ្នានៅរាជធានីភ្នំពេញ ទាំងកីឡាផងដែរ។ តែលោកថា ប្រសិនបើក្លិបមួយចំនួនពិចារណាចេញមកអភិវឌ្ឍន៍ ទាំងហេដ្ឋារចនាសម្ព័ន្ធ និងធនធានមនុស្សនៅបណ្ដាខេត្តគឺកាន់តែប្រសើរ ជាក់ស្ដែងដូចក្លិបរបស់ខ្លួនដែលបានចាកចេញពីរាជធានីភ្នំពេញ មកខេត្តសៀមរាប តាំងពីឆ្នាំ២០១៧។
គួរដឹងថា ក្លិបបាល់ទាត់អង្គរថាយហ្គឺរបានបង្កើតឡើងតាំងពីឆ្នាំ២០១៥ នៅរាជធានីភ្នំពេញ មុនប្ដូរមូលដ្ឋានទៅខេត្តសៀមរាបនៅឆ្នាំ២០១៧ រហូតមកដល់បច្ចុប្បន្ន ដោយប្រើប្រាស់កីឡដ្ឋានមួយចំនួនបម្រើឲ្យការប្រកួតរបស់ខ្លួន មុនក្លិបប្រកាសត្រៀមសាងសង់កីឡដ្ឋានផ្ទាល់ខ្លួននាពេលឆាប់ៗខាងមុខ។ នេះគឺជាតំណឹងល្អមួយសម្រាប់អ្នកគាំទ្រនៅខេត្តសៀមរាប តែលោក Akihiro Kato ពុំទាន់បញ្ជាក់លម្អិតពីទីតាំងត្រូវសាងសង់នោះទេ ដោយគ្រាន់តែអះអាងថា ធ្វើដំណើរប្រមាណ ១៥នាទីប៉ុណ្ណោះពីកណ្ដាលក្រុងសៀមរាប៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
