ស៊ីហ្គេម៖ អនុប្រធានសហព័ន្ធកីឡាអាស៊ីអាគ្នេយ៍ និងជាអនុប្រធានក្រុមប្រឹក្សាកីឡាអូឡាំពិកអាស៊ី Dato Seri Chaiyapak Siriwat បានប្រាប់ BTV News ថា គ្រួសារកីឡាអាស៊ីអាគ្នេយ៍ ក៏ដូចជាកីឡាជនពិការអាស៊ីអាគ្នេយ៍ពិតជាមានកិត្តិយសខ្លាំងណាស់ដែលព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ស្ដេចសព្វព្រះរាជហឫទ័យប្រោសព្រះរាជប្រទានព្រះអគ្គិកីឡា សម្រាប់ការប្រកួតកីឡាអាស៊ីអាគ្នេយ៍ និងអាស៊ានប៉ារ៉ាហ្គេម ២០២៣ នៅព្រឹកថ្ងៃទី២១ ខែមីនា ឆ្នាំ២០២៣ នៅប្រាសាទអង្គរវត្ត។
លោកបន្តថា “ពិតជាមហាកិត្តិយសសម្រាប់កីឡាអាស៊ីអាគ្នេយ៍ ដែលព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា យាងប្រោសព្រះរាជប្រទានអគ្គិជ័យកីឡា ហើយខ្ញុំពិតជាមានកិត្តិយសខ្លាំងណាស់ ក៏ដូចជាក្រុមប្រឹក្សាកីឡាអាស៊ីអាគ្នេយ៍ទាំងមូល។” លោកបន្ថែមថា ការប្រកួតចំពោះមុខនេះ ក្រុមអត្តពលិកកម្ពុជានឹងធ្វើបានល្អយ៉ាងហោចចំណាត់ថ្នាក់លេខ៣ លេខ៤ រឺលេខ២ ប៉ុន្តែនោះមិនសំខាន់ទេ យើងដូចជាគ្រូសារ យើងប្រកួតក្នុងចំណោមគ្រួសារយើង អត្តពលិកកម្ពុជាជាច្រើនហាត់នៅក្រៅស្រុក តួយ៉ាងដូចនៅប្រទេសថៃ ដូចជាកីឡាហុកគី ខ្លះទៀតនៅម៉ាឡេស៊ី និងប្រទេសផ្សេងៗទៀត។ ហើយសុំកោតសរសើរដល់គណៈកម្មាធិការរៀបចំការប្រកួតដែលបានធ្វើការងារនេះយ៉ាងខ្លាំង។
ឯកឧត្តម ថោង ខុន អនុប្រធានអចិន្ត្រៃយ៍ CAMSOC បានបញ្ជាក់ថា មកដល់ពេលនេះចំនួនប្រតិភូ និងអត្តពលិកចូលរួមប្រកួតមកពី ១០ប្រទេស និងម្ចាស់ផ្ទះកម្ពុជាមានចំនួនជាង ១០,០០០នាក់ ហើយការចូលរួមប្រកួតពីប្រតិភូកីឡាគ្រប់ប្រទេស គ្រប់ប្រភេទកីឡាគឺជាសញ្ញានៃកម្លាំងសាមគ្គីភាព មិត្តភាព និងសហប្រតិបត្តិការល្អក្នុងមហាគ្រួសារចលនាអូឡាំពិកតំបន់ និងជាសក្ខីភាពនៃការគាំទ្រយ៉ាងពេញទំហឹង ក្នុងដំណើរឆ្ពោះទៅជោគជ័យរបស់កម្ពុជាធ្វើជាម្ចាស់ផ្ទះរៀបចំការប្រកួតកីឡា SEA Games-ASEAN Para Games ឆ្នាំ២០២៣៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
