​បាល់ទាត់៖ ​ក្រុម​អង់គ្លេស​ពីរ​ដែល​នៅសល់​ក្នុង​វគ្គ ៤ក្រុម​ចុងក្រោយ Europa League, Manchester United និង Arsenal មាន​ជោគ​វាសនា​ខុសគ្នា​ក្នុង​ជើង​ទី១ វគ្គ​ពាក់កណ្តាល​ផ្តាច់ព្រ័ត្រ​។

​​Manchester United មានឱកាស​ច្រើន​ក្នុង​ការ​ឈានឡើង​វគ្គ​ផ្តាច់ព្រ័ត្រ​ ក្រោយ​ជ័យជំនះ​ធំធេង​លើ​ក្រុម​ភ្ញៀវ​អ៊ីតាលី AS Roma ដល់​ទៅ ៦-២​។ Bruno Fernandes​ និង Edinson Cavani​ រកបាន​ម្នាក់​ពីរ​គ្រាប់ ​ខណៈដែល Paul Pogba​ និង Mason Green wood រកបាន​ម្នាក់​មួយគ្រា​ប់​។ ​​ចំណែកឯ Roma ពីរ​គ្រាប់​របស់​ពួកគេ​រកបាន​ដោយ Lorenzo Pellegrini និង Edin Dzeko ដែលជា​គ្រាប់​ក្រៅ ២​គ្រាប់​ដ៏​មាន​សារសំខាន់​សល់​ក្តីសង្ឃឹម​តិចតួច ​ប្រសិន​ពួកគេ​អាចធ្វើ​អភិ​និ​ហា​បាន​នៅ​ទឹកដី​អ៊ីតាលី​ជើង​ទី២​។ ​​៦-២ នេះ​ក៏​រំលឹក​ដល់​អតីតកាល​ឆ្នាំ​២០០៧ ដែរ​ដោយ​នៅពេលនោះ Manchester United បាន​យកឈ្នះ Roma ៧-១ ទឹកដី Old Trafford នេះ​ដូចគ្នា​នៅ UEFA Champions League ដោយ​នៅពេលនោះ​អ្នកចាត់ការ Ole Gunnar Solskjaer ​នៅ​ជា​កីឡាករ​។

​​ងាក​មក​មួយ​ប្រកួត​ទៀត​ក្រុម​ Arsenal មានជោគ​វាសនា​ខុសពី Manchester United ដោយបាន​រង​បរាជ័យ​នៅ​ទឹកដី Villarreal ២-១​។ ​​ក្រុម​ម្ចាស់ផ្ទះ​អេ​ស្ប៉ា​ញ​ចាប់ផ្តើម​ការប្រកួត​បាន​ល្អ ​ដោយ​រកបាន​ពីរ​គ្រាប់​នាំមុខ​ដោយ Manu Trigueros ​នាទី​ទី៥ និង Raul Albiol ​នាទី​ទី២៩​។ Arsenal កាន់តែ​លំបាក​នៅ​វគ្គ​ទី២ នៅពេល Dani Ceballos ត្រូវបាន​បណ្តេញចេញ​ក្រោយ​ទទួល​កាត​លឿង​ទី២ នៅ​នាទី​ទី៥៧ តែក្រុម​របស់លោក Mikel Arteta ​ក៏​តាម​បាន​មួយ​គ្រាប់​វិញ​ដោយ​បាល់ ១១ម៉ែត្រ​របស់ Nicolas Pepe មុនពេល​ដែល Villarreal បាត់បង់​កីឡាករ​ម្នាក់​ដែរ​គឺ Etienne Capoue ​ទទួលបាន​កាត​លឿង​ទី២​។

​មួយ​គ្រាប់​ក្រៅ​ដី​ក៏​ជា​ក្តីសង្ឃឹម​ខ្លះ​សំរាប់ Arsenal ផងដែរ​ក្នុងការ​វាយបក​យកឈ្នះ​វិញ​នៅ​ទឹក​ដី Emirate សប្តាហ៍​ក្រោយ​។​ ​​Villarreal មាន​ប្រវត្តិ​លេង​វគ្គ​ចាញ់​ធ្លា​ក់នៅ​អឺរ៉ុប ១៦លើកចុងក្រោយ​ក្នុងនោះ​មាន ១៥លើក​ដែល​ឈ្នះ​ជើង​ទី១ ហើយបន្ត​ឡើង​ជុំ​បន្ត និង​មាន​តែមួយ​លើក​ប៉ុណ្ណោះ​ដែល​ឈ្នះ​ជើង​ទី១ ហើយ​ធ្លាក់​វិញ​ពោលគឺ​នៅ​ឆ្នាំ២០១៦ ដែល​ឈ្នះ Liverpool ជើង​ទី១ តែ​ចាញ់​ជើង​ទី២៕

អត្ថបទ​៖​នាង សុភា​វុ​ធ