អ៊ូហ្គង់ដា៖ សភារបស់ប្រទេសអ៊ូហ្គង់ដាបានអនុម័តសេចក្តីស្នើច្បាប់ ដែលនឹងដាក់ទោសអ្នកទាំងឡាយណាដែលកំណត់ថាជាភេទទី៣ ឬអ្នកមានសម្ព័ន្ធផ្លូវភេទដូចគ្នា។ បុគ្គលទាំងនេះអាចប្រឈមមុខនឹងការជាប់ពន្ធនាគាររយៈពេលវែង ប្រសិនបើសេចក្តីស្នើច្បាប់ត្រូវបានចុះហត្ថលេខាចូលជាច្បាប់ដោយប្រធានាធិបតីលោក Yoweri Museveni។
នៅក្រោមច្បាប់ដែលបានស្នើឡើង មិត្តភ័ក្តិ ក្រុមគ្រួសារ និងសមាជិករបស់សហគមន៍នឹងមានកាតព្វកិច្ចរាយការណ៍ បុគ្គលដែលមានទំនាក់ទំនងភេទដូចគ្នាមកកាន់អាជ្ញាធរ។ ការស្រឡាញ់ភេទដូចគ្នាគឺខុសច្បាប់រួចទៅហើយនៅក្នុងប្រទេសអាហ្វ្រិកខាងកើត។ ប៉ុន្តែច្បាប់នេះមានបំណងពង្រីក និងដាក់ទោសមនុស្សដោយផ្អែកលើមូលដ្ឋានអត្តសញ្ញាណផ្លូវភេទរបស់ពួកគេ។ សេចក្តីស្នើច្បាប់ដែលត្រូវបានតាក់តែងជាលើកដំបូងកាលពីដើមខែនេះ ត្រូវបានអនុម័តដោយមានការគាំទ្រយ៉ាងទូលំទូលាយនៅក្នុងសភា របស់ប្រទេសអ៊ូហ្គង់ដាកាលពីថ្ងៃអង្គារ។ ពេលនេះវានឹងទៅដល់ប្រធានាធិបតីលោក Museveni ដែលអាចជ្រើសរើសប្រើប្រាស់សិទ្ធវេតូរបស់លោក និងរក្សាទំនាក់ទំនងល្អជាមួយម្ចាស់ជំនួយ និងវិនិយោគិនប្រទេសលោកខាងលិច ឬត្រូវចុះហត្ថលេខានៅលើច្បាប់នេះ។ សេចក្តីស្នើច្បាប់ក៏ចែងថា បុគ្គលដែលត្រូវបានកាត់ទោសពីបទតុបតែង ឬជួញដូរកុមារក្នុងគោលបំណងចូលរួមក្នុងសកម្មភាពស្រឡាញ់ភេទដូចគ្នា ក៏ប្រឈមមុខនឹងការជាប់ពន្ធនាគារអស់មួយជីវិត។
បុគ្គល ឬស្ថាប័នដែលគាំទ្រ ឬផ្តល់មូលនិធិដល់សកម្មភាព ឬអង្គការសិទ្ធិអ្នកស្រឡាញ់ភេទដូចគ្នា ឬបោះពុម្ពផ្សាយ និងចែកចាយសម្ភារៈ និងនិពន្ធអត្ថបទដែលគាំទ្រអ្នកស្រឡាញ់ភេទដូចគ្នាក៏ប្រឈមមុខនឹងការកាត់ទោស និងជាប់ពន្ធនាគារផងដែរ។ កាលពីឆ្នាំ២០១៤ តុលាការធម្មនុញ្ញរបស់ប្រទេសអ៊ូហ្គង់ដា បានចាត់ទុកជាមោឃៈនូវច្បាប់ស្រដៀងគ្នានេះ ដែលបានពង្រឹងច្បាប់ប្រឆាំងសហគមន៍អ្នកស្រឡាញ់ភេទដូចគ្នា។ តុលាការបានចេញសម្រេចថា ច្បាប់នេះត្រូវបានលុបចោល ព្រោះវាត្រូវបានសភាអនុម័តដោយសភា ដោយគ្មានការគាំទ្រក្នុងកិច្ចប្រជុំដែលត្រូវការ ហើយច្បាប់នេះត្រូវបានថ្កោលទោសយ៉ាងទូលំទូលាយដោយបណ្តាប្រទេសលោកខាងលិច។ ទំនាក់ទំនងស្រលាញ់ភេទដូចគ្នាត្រូវបានហាមឃាត់ក្នុងប្រទេសអាហ្វ្រិកប្រហែល ៣០ប្រទេស ដែលមនុស្សជាច្រើនគោរពតម្លៃសង្គម និងសាសនា៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
