ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសសន៍ថា ការយករូបភាព ព្រះមហាក្សត្រ នៃព្រះរាជាណាចក្រកម្ពុជា ​ទៅផ្សព្វផ្សាយព័ត៌មានមិនពិត គឺមិនមែន​ជាសិទ្ធិបញ្ចេញមតិទេ​ ប៉ុន្ដែជាការមួលបង្កាច់ដោយចេតនា ​ដោយមានចរិតបំផ្លិតបំផ្លាញ ប្រមាថចំពោះអង្គព្រះមហាក្សត្រ និងកិត្តិយសនាយករដ្ឋមន្រ្ដី ដែលករណីនេះ គឺមិនអាចអត់ឱនជាដាច់ខាត។

សម្តេចតេជោ ហ៊ុន សែន មានប្រសាសន៍បែបនេះ​ ក្នុងឱកាស អញ្ជើញជាអធិបតីភាព​ដ៏ខ្ពង់ខ្ពស់​ក្នុងពិធីប្រគល់សញ្ញាបត្រជូនដល់និស្សិតនៃវិទ្យាស្ថានវ៉ាន់ដាចំនួន ​៤.៧០៥ នាក់ ​នាព្រឹកថ្ងៃទី២២ ខែមីនា ​ឆ្នាំ២០២៣ នៅមជ្ឈមណ្ឌលសន្និបាត ​និងពិព័រណ៍កោះពេជ្រ។

សម្ដេចតេជោ បញ្ជាក់ថា ព្រះរាជពិធីប្រោសព្រះរាជទានព្រះអគ្គិជ័យកីឡា ​និងពិធីរត់ភ្លើងគប់កីឡា សម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ ​និងកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ ​នៅប្រាសាទអង្គរវត្ត ក្រោមព្រះរាជាធិបតីព្រះករុណាជាអម្ចាស់ជីវិតលើត្បូង ព្រះបាទ​សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា គឺបាន​ប្រព្រឹត្តិទៅបានល្អខ្លាំងណាស់​ ដោយមានការ​ហែហម​ដោយ​នាយករដ្ឋមន្រ្ដី និងអ្នកមុខអ្នកការ​គ្រប់ជាន់ថ្នាក់ជាច្រើនរូប។

សម្ដេចតេជោ បញ្ជាក់ថា សមត្ថកិច្ចពិតជាបានឃាត់ខ្លួនយុវជន២នាក់ កាលពីល្ងាចថ្ងៃទី២១ ខែមីនា ឆ្នាំ២០២៣នេះ ​បន្ទាប់ពីពួកគេបានយករូបភាព ​អង្គព្រះមហាក្សត្រ ទៅ​ផ្សព្វផ្សាយ​ព័ត៌មាន​មិនពិត​លើបណ្ដាញសង្គមហ្វេសប៊ុក ​ដោយមានចេតនាដ៏អាក្រក់ ​ប្រមាថព្រះសេស្ដាព្រះមហាក្សត្រ និងកិត្តិយស នាយករដ្ឋមន្រ្ដីនៃកម្ពុជា​ ខណៈយុវជនឈ្មោះ​ យឹម ស៊ីណន ​និងឈ្មោះ ហ៊ុន កុសល នេះជាអតីតសកម្មជនក្រុមប្រឆាំង ដែលធ្លាប់ជាប់ពាក់ព័ន្ធនឹងបទល្មើសនាពេលកន្លងមកផងដែរ។

ក្នុងឱកាសនេះសម្ដេចតេជោ ​ហ៊ុន សែន ​ក៏បានបញ្ជាឱ្យទូរទស្សន៍​ទាំង​អស់​ចាក់ឡើងវិញទាំងនូវ​ព្រះរាជពិធីប្រោសព្រះរាជទានព្រះអគ្គិជ័យកីឡា ​និងពិធីរត់ភ្លើងគប់កីឡា សម្រាប់ព្រឹត្តិការណ៍​ប្រកួតកីឡាអាស៊ីអាគ្នេយ៍លើកទី៣២ ​និងកីឡាអាស៊ានប៉ារ៉ាហ្គេមលើកទី១២ ​ឆ្នាំ២០២៣ នៅ​ប្រាសាទអង្គរវត្តផងដែរ ​ដើម្បីឱ្យមហាជនបានទស្សនាឃើញច្បាស់ថែមទៀតចំពោះពិធីនេះ៕

អត្ថបទ៖ វ៉ន ដារ៉ា