ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសផ្ដល់​វេទិកាឱ្យក្រុមប្រឆាំង​ដែលចង់វាយប្រហារមកលើ ​ឯកឧត្ដម ហ៊ុន ម៉ាណែត ដែលរឿងនេះ​បាន​បំពេញបំណង​សម្ដេចចង់ឱ្យឯកឧត្ដម ហ៊ុន ម៉ាណែត ស្គាល់ក្ដៅ ត្រជាក់ និង​មិន​ទន់ជ្រាយ​សម្រប​សម្រួល​ចុះហត្ថលេខាលើកលែងទោស ​ដល់ក្រុមប្រឆាំងទាំងនោះ​ មុនពេលក្លាយជា​នាយករដ្ឋមន្រ្ដី​នាពេលអនាគត។

សម្តេចតេជោ ហ៊ុន សែន មានប្រសាសន៍ ក្នុងឱកាស​អញ្ជើញ​ជាអធិបតីភាពដ៏ខ្ពង់ខ្ពស់​ក្នុងពិធី​ប្រគល់សញ្ញាបត្រជូនដល់និស្សិតនៃវិទ្យាស្ថានវ៉ាន់ដាចំនួន ៤.៧០៥ នាក់​ នាព្រឹកថ្ងៃទី២២ ខែមីនា ឆ្នាំ២០២៣ ​នៅមជ្ឈមណ្ឌលសន្និបាត និង ពិព័រណ៍កោះពេជ្រ។

សម្តេចតេជោ ហ៊ុន សែន ក៏បានប្រកាសដល់អ្នកវិភាគមួយចំនួនពាក់ព័ន្ធការឡើងផ្កាយ៤ របស់​ឯកឧត្តម ហ៊ុន ម៉ាណែតថា សម្ដេចមិនហៅអស់លោកអ្នកវិភាគទាំងនោះជា «ល្ងង់ទេ» សម្តេចសូម​ហៅថា «ជាបណ្ឌិតខ្វះការយល់ដឹង» ​ពាក់ព័ន្ធនឹង​ឋានន្តរស័ក្តិ​របស់​កងទ័ពនេះ។

សម្ដេចតេជោ ហ៊ុន សែន ​បានរម្លឹក​ទៅកាន់ក្រុមប្រឆាំងថា នៅចាំប្រសាសន៍​សម្ដេចធ្លាប់​បាន​លើកឡើងទេថា «មានសត្រូវដ៏ខ្លាំង ប្រសើជាងមិត្តដែលខ្សោយ និងល្ងង់» ដូច្នេះរឿងវាយ​ប្រហារមកលើឯកឧត្ដម ហ៊ុន ម៉ាណែត​ ពួកអ្នកឯងបានជួយសម្ដេច ដើម្បីពង្រឹងសមត្ថភាព​របស់​ឯកឧត្ដម ហ៊ុន ម៉ាណែត ​ហើយថ្ងៃក្រោយឯកឧត្ដម ហ៊ុន ម៉ាណែត និងមិនទន់ជ្រាយ​លើកដៃ​ចុះហត្ថលេខា​ លើកលែងទោស​ដល់ពួកអ្នកទាំងនោះ។

សម្ដេចតេជោ ​ក៏បានប្រកាសដល់ក្រុមបរទេសកុំយកបញ្ហាសុខសន្ដិភាព​របស់កម្ពុជា​មកលេងសើច កុំយក​ជីវិតមនុស្សមកលេងសើច​ ពីព្រោះបើមាន​បញ្ហាណា​មួយប្រជាពលរដ្ឋកម្ពុជា​ជាអ្នក​រង​គ្រោះ​ ចំណែកបរទេសរត់ទៅ​ប្រទេសគេវិញអស់ ដូច្នេះទើបសម្ដេចត្រូវតែប្រកាសរក្សា​សន្ដិភាព​របស់​កម្ពុជាឱ្យបានទោះក្នុងតម្លៃណាក៏ដោយ៕ អត្ថបទ៖ វ៉ន ដារ៉ា