ភ្នំពេញ៖ ក្រសួងវប្បធម៌ និងវិចិត្រសិល្បៈ និងអង្គការមរតកវប្បធម៌ខ្មែរ នៅថ្ងៃទី២២ខែមីនានេះ បានចុះអនុស្សារណៈនៃការយោគយល់គ្នា (MOU) ស្តីពីកិច្ចការអភិរក្សសម្បត្តិបេតិកភណ្ឌ ដែលមានរយៈពេល៣ឆ្នាំ ​ពោលចាប់ពីឆ្នាំ២០២៣ដល់២០២៦។

ការចុះMOUនេះ ធ្វើឡើងនៅទីស្តីការក្រសួងវប្បធម៌​ និងវិចិត្រសិល្បៈ ក្រោមអធិបតីភាព​លោកជំទាវ ប៉ែន មុនីមករា រដ្ឋលេខាធិការក្រសួងវប្បធម៌ ​និងវិចិត្រសិល្បៈ ​និងលោក អ៊ុន មណីនីតា នាយកប្រតិបត្តិអង្គការមរតកវប្បធម៌ខ្មែរ។

នៅក្នុងឱកាសនោះលោកជំទាវ ប៉ែន មុនីមករា បានមានប្រសាសន៍ថា ​ការចុះអនុស្សារណៈ នេះ បានចូលរួមចំណែក ​លើកស្ទួយវប្បធម៌ខ្មែរ ​និងការអភិរក្សសម្បត្តិបេតិកភណ្ឌ។ ​លើសពីនេះ លោកជំទាវ ​បានកោតសសើរចំពោះអង្គការមរតកវប្បធម៌ខ្មែរ ដែលកន្លងទៅបាន​ធ្វើការ​បណ្តុះបណ្តាល​ដល់យុវជនជំនាន់ក្រោយឱ្យស្គាល់ពី​តម្លៃវប្បធម៌ខ្មែរ និងផ្សព្វផ្សាយ​វប្បធម៌ខ្មែរ​ទៅបរទេសជាដើម។

ជាមួយគ្នានេះ លោក អ៊ុន មណីនីតា នាយកប្រតិបត្តិអង្គការមរតកវប្បធម៌ខ្មែរ ​បានលើកឡើងដែរថា ការ​ចុះអនុស្សារណៈនេះ ធ្វើឡើង​ស្របតាមគោលដៅ​របស់អង្គការ ​ដែលចង់ពង្រីកការអប់រំ​បេតិកភណ្ឌ​ដល់សិស្សានុសិស្ស និងប្រជាជពលរដ្ឋ ​ទៅតាមតំបន់ដែលមានសម្បត្តិ បានដឹងកាន់​តែច្រើនបន្ថែមទៀតពីសម្បត្តិបេតិកភណ្ឌ។

កន្លងទៅអង្គការមរតវប្បធម៌ខ្មែរ ធ្លាប់​បានរៀបចំកម្មវិធីបណ្តុះបណ្តាលការអប់រំបេតិកភណ្ឌ​ដល់​សិស្សានុសិស្សនៅតំបន់អង្គរ ​និងតំបន់បន្ទាយឆ្មារជាដើម៕ អត្ថបទ៖ទូច សោភ័ណ