ឥណ្ឌា៖ ប្រជាពលរដ្ឋនៅរដ្ឋ West Bengal របស់ប្រទេសឥណ្ឌាកំពុងបោះឆ្នោត នៅក្នុងដំណាក់កាលចុងក្រោយនៃការបោះឆ្នោត ទោះបីជាមានការកើនឡើងនៃករណីឆ្លងជំងឺ Covid-19 ក៏ដោយ។ គេបានមើលឃើញមនុស្សឈរតម្រង់ជួរគ្នាយ៉ាងវែង នៅខាងក្រៅមណ្ឌលបោះឆ្នោត ដែលបង្កឱ្យមានការព្រួយបារម្ភអំពីការឆ្លងរាលដាល នៃវីរុសកូរ៉ូណាបន្ថែមទៀតស្របពេលមានរលកទី២ ដ៏ខ្លាំងក្លា។
ក្រុមអ្នកជំនាញបារម្ភថា តំបន់ West Bengal អាចជាចំណុចឆ្លងខ្លាំងបន្ទាប់។ ករណីឆ្លងថ្មីបានកើនឡើងចំនួន ១៧.០០០នាក់កាលពីថ្ងៃពុធ ដែលជាកំណត់ត្រាខ្ពស់បំផុតរបស់រដ្ឋនេះ។ ជាសរុបប្រទេសឥណ្ឌាបានរាយការណ៍ថា មានអ្នកឆ្លងថ្មីចំនួន ៣៧៩.២៥៧នាក់កាលពីថ្ងៃព្រហស្បតិ៍ ដែលជាចំនួនសរុបខ្ពស់បំផុតក្នុងរយៈពេលតែ ១ថ្ងៃនៅលើពិភពលោក។ ប្រទេសនេះក៏បានរាយការណ៍ផងដែរថា មានមនុស្សស្លាប់ចំនួន ៣.៦៤៥នាក់ដោយសារវីរុសកូរ៉ូណា ដែលជាកំណត់ត្រាមិនចង់បានមួយទៀត ដែលជាចំនួនអ្នកស្លាប់ខ្ពស់បំផុតក្នុងរយៈពេលតែ ១ថ្ងៃ ចាប់តាំងពីជំងឺរាតត្បាតសកលនេះចាប់ផ្ដើមផ្ទុះ។
រដ្ឋ West Bengal បានឃើញការបោះឆ្នោតចំនួន ៧ដំណាក់កាលរួចហើយ។ រដ្ឋនេះគឺជារដ្ឋមួយក្នុងចំណោមមួយចំនួន ជាទីដែលលោកនាយករដ្ឋមន្ត្រី ណារិន ដ្រាម៉ូឌី មិនមានអាសនៈសភាភាគច្រើន។ មានការរិះគន់ជាច្រើនថា លោកបានបន្តឲ្យមានការជួបជុំទ្រង់ទ្រាយធំនៅទីនោះ ខណៈដែលវីរុសចាប់ផ្ដើមគ្របដណ្ដប់ពេញប្រទេសក៏ដោយ។ អ្នកឆ្លើយឆ្លងព័ត៌មានរបស់សារព័ត៌មាន BBC នៅតំបន់នោះនិយាយថា ការប្រមូលផ្តុំគ្នាធំបំផុតមួយចំនួន រួមទាំងការចូលរួមដោយលោក Modi បានមើលឃើញមនុស្សជាច្រើនមិនពាក់ម៉ាស់ ឬរក្សាគម្លាតសង្គមទេ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
