ព្រៃវែង៖ បច្ចុប្បន្នតំបន់រមណីយដ្ឋានទួលព័ទ្ធតាឡីបឹងស្នេហ៍ ក្នុងខេត្តព្រៃវែង កំពុងមាន​សត្វបក្សី​រស់នៅជាច្រើនប្រភេទ ដែលមានប្រមាណ ២០ម៉ឺនក្បាល និងកំពុងដើរតួនាទីជាតំបន់​ទេសចរណ៍​ដ៏ទាក់ទាញ របស់ខេត្ត ហើយក៏មានការចាប់​អារម្មណ៍​ពីវិស័យឯកជន ដោយគ្រោង​នឹង​បង្កើតទៅជារមណីយដ្ឋានធម្មជាតិ ។

ក្នុង​សន្និសីទសារព័ត៌មានស្តីពី​ភាពជោគជ័យ រយៈពេល៥ឆ្នាំ​ របស់រដ្ឋបាលខេត្តព្រៃវែង ​នៅថ្ងៃទី ២២ ខែមីនានេះ ឯកឧត្តម ជា សុមេធី អភិបាលខេត្តព្រៃវែង ​មានប្រសាសន៍ថា ​ក្រោយពីរដ្ឋបាលខេត្ត បាន​សហការជាមួយអន្តរក្រសួង ដឹកនាំដោយក្រសួងបរិស្ថាន គឺ​បានបង្កើតតំបន់ប្រើប្រាស់​ច្រើន​យ៉ាង ទួលព័ទ្ធតាឡីបឹងស្នេហ៍ ​ដែលមានទំហំចំនួនជាង ៣៥០០ហិកតា តាមរយៈ​អនុក្រឹត្យ​របស់រាជរដ្ឋាភិបាល ​ហើយរមណីយដ្ឋាននេះ​ ត្រូវបានកែលម្អ ​ផ្សព្វផ្សាយដើម្បីទាក់ទាញ​ភ្ញៀវទេសចរ​ជាតិ និងអន្តរជាតិ ​ចូលទស្សនា ​បានច្រើនកុះករ ។

ឯកឧត្តម បានបន្តថា បច្ចុប្បន្ន រមណីយដ្ឋាន​ទួលព័ទ្ធតាឡីបឹងស្នេហ៍​ មានសត្វបក្សី ចំនួន៤៩ ប្រភេទ កំពុងរស់នៅ​ ដែលមានប្រមាណពី១៥ ទៅ២០ម៉ឺនក្បាល​ ដោយ​តំបន់​ប្រើប្រាស់​ច្រើន​យ៉ាង​ បឹងស្នេហ៍នេះ ​ជាប្រភពដ៏សំខាន់ ពុំចេះរីងស្ងួត​គ្រប់រដូវ ​និងមានភាពទាក់ទាញយ៉ាងខ្លាំង​ដល់​ការវិនិយោគ ផ្នែកវិស័យទេសចរណ៍ ដោយមានបណ្ដាក្រុមហ៊ុនមួយចំនួនកំពុងសិក្សា ដើម្បី​បង្កើតជាតំបន់ទេសចរណ៍ ធម្មជាតិ ​ដែលរដ្ឋបាលខេត្តកំពុងពិនិត្យសិក្សាលើគម្រោងទាំងនោះ ។

ឯកឧត្តម ​បានឱ្យដឹងដែរថា ខេត្តព្រៃវែង ​មានរមណីយដ្ឋានប្រវត្តិសាស្ត្រ ចំនួន១កន្លែង​ គឺ​រមណីយដ្ឋាន​ប្រវត្តិសាស្ត្រនគរភ្នំ ស្ថិតក្នុងស្រុកបាភ្នំ, ក្រៅពីរមណីយដ្ឋានធម្មជាតិ ទួលព័ទ្ធតាឡី​បឹងស្នេហ៍ មានរមណីយដ្ឋាន​ធម្មជាតិ ចំនួន២ទៀត ​គឺរមណីយដ្ឋានស្ទឹងចារ នៅក្នុងស្រុកកំចាយមារ និងរមណីយដ្ឋានដីដុះ នៅក្នុងស្រុកពាមជរ ។ ​ក្រៅពីនេះ មានរមណីយដ្ឋានវប្បធម៌​ ចំនួន៣កន្លែង គឺ​រមណីដ្ឋានទួលបារាយ អណ្ដែត ​ទួលអស់លោកប្រធាតុ ក្នុងក្រុងព្រៃវែង និងរមណីយដ្ឋាន​ប្រាសាទ​ព្រៃដើមស្រុក​ ក្នុងស្រុងស៊ីធរ កណ្ដាល ។

ឯកឧត្តម ជា សុមេធី ​បានបញ្ជាក់ថា ក្នុងរយៈពេល៥ឆ្នាំនេះ ខេត្តព្រៃវែង ​ទទួលបានភ្ញៀវទេសចរ ជិត​២លាននាក់​ ក្នុងនោះមានភ្ញៀវអន្តរជាតិ​ ចំនួនជាង​១៤ម៉ឺននាក់ ទៅទស្សនាកម្សាន្ត​តាមតំបន់រមណីយដ្ឋាននានា ៕អត្ថបទ៖ បាន សុខរិទ្ធិ