​ចិន៖ នាយក​ប្រតិបត្តិ​ក្រុមហ៊ុន TikTok លោក Shou Zi Chew នឹង​ប្រាប់​សមាជិកសភា​អំពី​ App ​ចែករំលែក​វីដេអូ​កម្សាន្ត​ខ្លីៗ​គ្រប់គ្រង​ដោយ​ចិន ដែលមាន​អ្នក​ចូល​ប្រើប្រាស់​ពលរដ្ឋ​អាមេរិក​ជាង ១៥០​លាន​នាក់​ថា​ មិន​ធ្លាប់​ចែក​រំលែក​ទិន្នន័យ​របស់​អ្នកប្រើប្រាស់​អាមេរិកជាមួយ​រដ្ឋាភិបាល​ចិន​នោះ​ទេ ក្នុង​ពេល​មានការ​កើន​ឡើង​ការព្រួយបារម្ភ​អំពី​សន្តិសុខ​ជាតិ​របស់​សហរដ្ឋអាមេរិក​។

លោក Chew នឹង​ផ្តល់​សក្ខីកម្ម​នៅ​ថ្ងៃ​ព្រហស្បតិ៍​ថា ក្រុមហ៊ុន TikTok ពុំដែល​បាន​ចែករំលែក ឬ​ទទួលបាន​សំណើ​ឱ្យ​ចែករំលែក​ទិន្នន័យ​អ្នកប្រើប្រាស់​អាមេរិកជាមួយ​រដ្ឋាភិបាល​ចិន​នោះទេ ​ស្របពេល​មានការ​ព្រួយបារម្ភ​កាន់តែខ្លាំង​ផ្នែក​សន្តិសុខ​ជាតិ​សហរដ្ឋអាមេរិក​។ ក្រុមហ៊ុន TikTok ក៏​នឹងមិន​ទទួលយក​សំណើ​បែបនេះ​ដែរ ប្រសិនបើ​គេ​ធ្លាប់​មានការ​ស្នើឡើង​នោះ​។ លោក​បាន​និយាយថា ក្រុមហ៊ុនមេ​របស់ TikTok គឺ​ក្រុមហ៊ុន ByteDance ពុំមែន​ជា​កម្មសិទ្ធិ ឬ​ត្រូវបាន​គ្រប់គ្រង​ដោយ​រដ្ឋាភិបាល ឬ​អង្គភាព​រដ្ឋ​ណាមួយ​ឡើយ​។ លោក Chew នឹង​និយាយ​ទៅកាន់​គណៈកម្មាធិការ​នេះ​ថា លោក​សូមបញ្ជាក់​រឿងនេះ​ឱ្យ​ច្បាស់លាស់​ថា ក្រុមហ៊ុន ByteDance ពុំមែន​ជា​ភ្នាក់ងារ​របស់​ប្រទេស​ចិន ឬ​ប្រទេស​ណាមួយ​ផ្សេងទៀត​នោះទេ​។

អ្នក​រិះគន់​ក្រុមហ៊ុន TikTok បារម្ភ​ថា ​ទិន្នន័យ​អ្នកប្រើប្រាស់​របស់​សហរ​ដ្ឋ​អាមេរិក អាច​បញ្ជូន​ទៅកាន់​រដ្ឋា​ភិ​បាល​ចិនតាមរយៈ​កម្មវិធី​នេះ ហើយ​បាន​ជំរុញឱ្យមាន​ការអំពាវនាវ​កាន់តែ​ច្រើនឡើង​ ដើម្បី​ហាមឃាត់​កម្មវិធី​ដោយ​សមា​ជិក​សភា​សហរ​ដ្ឋ​អាមេរិក​។ កាលពី​សប្តាហ៍​មុន ក្រុមហ៊ុន ​TikTok បាន​និយាយថា ​រដ្ឋបាលរបស់លោក Biden បានទាម​ទារ​ឱ្យ​ម្ចាស់​ជា​ជន​ជាតិចិន​របស់ខ្លួន​លក់​ភាគហ៊ុន​របស់​ពួកគេ​នៅក្នុង​កម្មវិធី​នោះ បើ​ពុំនោះ​ទេវា​អាច​ប្រឈម​នឹង​ការដាក់​បម្រាម​របស់​ស​ហ​រដ្ឋ​អាមេរិក​។ ក្រុមហ៊ុន TikTok បាន​និយាយថា ​ក្រុមហ៊ុន​បាន​ចំណាយ​ប្រា​ក់ជាង ១.៥ពាន់​លាន​ដុល្លារ លើ​អ្វីដែល​ក្រុមហ៊ុន​ហៅថា​ ជា​កិច្ចខិតខំ​ផ្នែក​សុវត្ថិភាព​ទិន្នន័យ​យ៉ាង​ហ្មត់ចត់​ក្រោម​ឈ្មោះ «Project Texas» ។ លោក Chew និយាយថា ​នៅពេលដែល​ដំណើរការ​នេះ​ត្រូវបាន​បញ្ចប់ ទិន្នន័យ​របស់​សហរ​ដ្ឋ​អាមេរិក​ដែល​ត្រូវបាន​ការពារ​ទាំងអស់ ​នឹង​ស្ថិតនៅក្រោម​ការការពារ​របស់​ច្បាប់​សហរដ្ឋអាមេរិក និង​ស្ថិតក្រោម​ការគ្រប់គ្រងរ​បស់​ក្រុម​សន្តិសុខ​ដឹកនាំ​ដោយ​សហរដ្ឋអាមេរិក​៕

អត្ថបទ៖ ប៊ុនថន