ភ្នំពេញ៖ ក្រសួងអប់រំយុវជន និងកីឡាកំពុងអនុវត្តយុទ្ធនាការជាច្រើន​ជំរុញ​គ្រប់វ័យ​ទទួលបាន​បំណិនជីវិត ​និងការអប់រំពេញមួយជីវិត ដើម្បី​អភិវឌ្ឍន៍​សមត្ថភាព​ចំណេះដឹង និង​ជំនាញការងារនានា។

ក្នុងពិធីប្រគល់ពានរង្វាន់ការអប់រំពេញមួយជីវិត​ ប្រចាំសកលវិទ្យាល័យភូមិន្ទភ្នំពេញ ​នៅថ្ងៃទី២២ ខែមីនានេះ ​ឯកឧត្តម ណុះ ស្លេះ រដ្ឋលេខាធិការក្រសួងអប់រំយុវជន ​និងកីឡា​ បានថ្លែងថា បច្ចុប្បន្ន​ក្រសួងអប់រំកំពុងអនុវត្តយុទ្ធនាការជាច្រើនជំរុញគ្រប់វ័យ​ទទួល​បាន​បំណិនជីវិត និង​ការអប់រំពេញ​មួយជីវិត ​ដើម្បី​អភិវឌ្ឍន៍​សមត្ថភាពចំណេះដឹង ​និងជំនាញការងារនានា។

ឯកឧត្តម បន្តថា តាមរយៈការអនុវត្តយុទ្ធនាការ​ប្រឡង​ប្រណាំង​សំណេរ​តែង​សេចក្តី ដែល​រៀបចំ​ដោយដេប៉ាតឺម៉ង​ការអប់រំពេញមួយជីវិត​ នៃ​សកលវិទ្យាល័យភូមិន្ទភ្នំពេញ ទាក់ទាញ​មហាជន​ចូលរួមមានកើនឡើង ​ជាពិសេសក្នុងចំណោមសិស្សមក​ពីបណ្តាសាលារៀន​ជាង ១០០វិទ្យាល័យ និងបានកើនរហូតដល់១៤ខេត្តរាជធានីចូលរួម ក្នុងនោះ ក៏មានមនុស្សវ័យចាស់​ចូលរួមផងដែរ។

សិស្សជាប់​ជយលាភី​លេខ១​ សំណេរតែងសេចក្តីទូទាំង​ប្រទេស​ បានថ្លែងថា ​ការប្រឡង​សំណេរ​តែង​សេចក្តីនេះ ​គឺបានធ្វើឲ្យគេទទួល​បាន​បទពិសោធន៍ ​ចំណេះដឹងបំណិន​ជីវិតក្រៅ​កម្មវិធី​សិក្សា​របស់សាលារៀនជាច្រើន​ និងបានធ្វើឲ្យគេយល់ដឹងពីការវិវត្តការរីកចំរើន​ជាច្រើនរបស់កម្ពុជា ក្រោមម្លប់សន្តិភាពបច្ចុប្បន្ន។

ពិធីប្រគល់ពានរង្វាន់ការអប់រំពេញមួយជីវិត​ ប្រចាំសកលវិទ្យាល័យភូមិន្ទភ្នំពេញ ក៏មានរៀបចំ​ព្រឹត្តិការណ៍តាំងពិព័រណ៍​ការងារ អមដោយមានការជ្រើសរើសបុគ្គលិក ពី​តាមបណ្តាស្ថាប័ន​ក្រុមហ៊ុនជាង២០ ​និងផ្តល់ឱកាសការងារជាង ១០០០កន្លែងផងដែរ៕ អត្ថបទស៊ុម សុខជា