​អាមេរិក៖ លោក John Kirby ​អ្នកនាំពាក្យ​សន្តិសុខ​ជាតិ​សេត​វិមាន​និយាយ​ថា តួនាទី​របស់​ចិន​លើ​ការ​វាយ​លុក​របស់​រុស្ស៊ី​នៅ​អ៊ុយ​ក្រែ​ន​ពុំ​មែន​អត់​លំអៀង​នោះ​ទេ។

​លោក Kirby បាន​និយាយ​ពី​ដំណើរ​ទស្សនកិច្ច​កាលពី​ពេល​ថ្មីៗ​នេះ​របស់​ប្រធានាធិបតី​ចិន​លោក Xi Jinping ទៅកាន់​ទីក្រុង​ម៉ូស្គូ ហើយ​លោក​និយាយ​ថា បើសិនជា​ចិន​ចង់​ដើរតួ​លក្ខណៈ​ស្ថាបនា​លើ​បញ្ហា​អ៊ុយ​ក្រែ​ន លោក​គួរតែ​ជំរុញ​ឲ្យ​រុស្ស៊ី​បញ្ចប់​សង្គ្រាម​នៅ​ថ្ងៃនេះ។ ​លោក Kirby បាន​និយាយ​ផង​ដែរ​ថា សហរដ្ឋអាមេរិក និង​លោក​ប្រធានាធិបតី Joe Biden នៅតែ​បើកទូលាយ​ច្រក​ប្រាស្រ័យ​ទាក់​ទង​ជាមួយ​ចិន បើ​ទោះ​បី​ជា​មានដំណើរ​ទស្សនកិច្ច​របស់​លោក Xi ​ទៅកាន់​រុស្សី​ក៏ដោយ ហើយ​រដ្ឋាភិបាល​សហរដ្ឋអាមេរិក​នឹង​ស្វែងរក​កិច្ចពិភាក្សា​ជាមួយ​លោក Xi នៅ​ពេល​វេលា​ដ៏​សមស្រប​ណាមួយ។

​គួរ​ឲ្យ​ដឹង​ថា លោក Xi និង​ប្រធានាធិបតី​រុស្ស៊ី​លោក Vladimir Putin ទើបតែ​បាន​ជួប​គ្នា ២​ថ្ងៃ​កាលពី​ថ្ងៃ​អង្គារ ដោយ​មានការ​ផ្ដោះផ្ដង​ពាក្យពេចន៍​មិត្តភាព​យ៉ាង​កក់ក្តៅ​រវាង​ចិន និង​រុស្ស៊ី ហើយ​នឹង​រួមគ្នា​រិះគន់​លោក​ខាងលិច ប៉ុន្តែ​ពុំ​មាន​សញ្ញា​ណាមួយ​នៃ​ការ​រក​ឃើញ​ដំណោះស្រាយ​ការទូត​ ជុំវិញ​បញ្ហា​អ៊ុយ​ក្រែ​ន​នោះ​ឡើយ។ មេដឹកនាំ​ទាំង​២ បាន​ចាត់​ទុក​គ្នា​ថា​ជា​មិត្ត​ល្អ ដោយ​សន្យា​ពង្រឹង​កិច្ច​សហប្រតិបត្តិការ​សេដ្ឋកិច្ច និង​បាន​ចាត់​ទុក​ទំនាក់ទំនង​នៃ​ប្រទេស​ទាំង​២ ​ថា ​ល្អ​បំផុត​ពុំ​ធ្លាប់​ដែល​មាន​ពី​មុន​មក។ ​នៅ​ក្នុង​សេចក្ដីថ្លែងការណ៍​រួម មេដឹកនាំ​ទាំង២ បាន​ចោទប្រកាន់​លោក​ខាង​លិច ទាំង​ទីក្រុង​វ៉ា​ស៊ីន​តោន​ថា បាន​ធ្វើ​ឲ្យ​អន្តរាយ​ដល់​ស្ថិរភាព​សកលលោក ចោទ​អង្គការ​ណា​តូ​ថា ​កំពុង​លូកដៃ​ចូល​តំបន់​អាស៊ី​-​ប៉ាស៊ីហ្វិក៕

អត្ថបទ៖ សារ៉ាត់