អ៊ុយក្រែន៖ ស្នូរគ្រាប់កាំភ្លើងធំបានបន្លឺឡើងចេញពីខ្សែត្រៀមមុខនៅទីក្រុង Chasiv Yar ភាគខាងលិចទីក្រុង Bakhmut របស់ប្រទេសអ៊ុយក្រែន ហើយប្រជាពលរដ្ឋរស់នៅក្នុងភូមិ Kalynivka ចាប់ផ្តើមជម្លៀសខ្លួនចេញពីផ្ទះសម្បែងរបស់ពួកគេ។
នៅចន្លោះប្លុកអគារនៅទីក្រុង Chasiv Yar ប្រជាពលរដ្ឋចាស់ៗបានតម្រង់ជួរទទួលទឹក និងចំណីអាហារដែលផ្តល់ជូនដោយក្រុមសេវាកម្មសង្គ្រោះបន្ទាន់រដ្ឋ។ ក្រុមមន្ត្រីសេវាកម្មសង្គ្រោះបន្ទាន់រដ្ឋបានដើរគោះទ្វារតាមផ្ទះ ដើម្បីសុំឲ្យមនុស្សចាស់ និងមនុស្សមានពិការភាពនៅទីក្រុង Chasiv Yar និងភូមិក្បែរៗនោះឲ្យត្រៀមខ្លួនជម្លៀសចេញពីទីក្រុង ដែលស្ថិតនៅចម្ងាយ ១៧គីឡូម៉ែត្រពីទីក្រុងសមរភូមិមុខ Bakhmut មួយនេះ។ រដ្ឋបាលយោធាទីក្រុង Chasiv Yar និយាយថា ការជម្លៀសកុមារចេញពីទីក្រុងបានបញ្ចប់កាលពីថ្ងៃអាទិត្យកន្លងទៅ។
ឧត្ដមសេនីយ៍ជាន់ខ្ពស់មួយរូបរបស់អ៊ុយក្រែននិយាយថា កងកម្លាំងពួកយើងបានព្យាយាមរុញច្រានការរុលចូលរបស់រុស្ស៊ីទៅកណ្តាលទីក្រុង Bakhmut ប៉ុន្តែស្ថានភាពនៅក្នុង និងជុំវិញទីក្រុងនៅតែតានតឹងដដែល។ សូមបញ្ជាក់ថា សង្គ្រាមរយៈពេលជាច្រើនខែដណ្ដើមគ្រប់គ្រងទីក្រុង Bakhmut ស្ថិតក្នុងចំណោមការបង្ហូរឈាមខ្លាំងក្លាបំផុត នៃសង្គ្រាមរយៈពេលជិត ១៣ខែរបស់រុស្ស៊ីនៅអ៊ុយក្រែន៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
