ភ្នំពេញ ៖ តាមរយៈកិច្ចសហប្រតិបត្តិការមេគង្គ-ឡានឆាង កម្ពុជាបាន​ទទួល​អត្ថប្រយោជន៍​យ៉ាង​ច្រើន​សន្ធឹកសន្ធាប់​ពី​គម្រោង​ចំនួន៨០ ក្រោម​មូលនិធិ​ពិសេស​មេគង្គ-ឡានឆាង ដែល​មាន​ទឹក​ប្រាក់​ប្រមាណ៣១លានដុល្លារអាមេរិក។ នេះតាមការឲ្យដឹងរបស់ក្រសួងការបរទេស និង​សហប្រតិបត្តិការអន្តរជាតិ។

នៅក្នុងសេចក្ដីប្រកាសព័ត៌មាន ក្នុង​ឱកាសអបអរសាទរ “ទិវាសប្តាហ៍នៃ​កិច្ចសហប្រតិបត្តិការមេគង្គ-ឡានឆាង ឆ្នាំ២០២៣” នៅរសៀលថ្ងៃ២២ ខែមីនានេះ​ក្រសួងការបរទេស និងសហប្រតិបត្តិការ​អន្តរជាតិ បានលើកឡើងថា វិសាលភាពនៃសកម្មភាពកិច្ចសហប្រតិបត្តិការមេគង្គ-ឡានឆាង គឺ​មាន​ភាពចម្រុះ និងគ្របដណ្តប់​លើវិស័យ​អាទិភាព​ជាច្រើនរាប់ចាប់តាំងពីវិស័យអភិវឌ្ឍន៍ជនបទ ការ​កាត់​បន្ថយភាពក្រីក្រ ធនធានទឹក កសិកម្ម ការតភ្ជាប់ផ្លូវអាកាស សុខភាព ការអប់រំ ទេសចរណ៍ ការ​អភិរក្សបេតិកភណ្ឌវប្បធម៌ រហូតដល់ការពង្រឹងភាពអង់អាចដល់ស្ត្រី ក្នុង​ចំណោម​វិស័យ​អាទិភាព​ដទៃទៀត។

ទាក់ទិនទិវាសប្តាហ៍នៃកិច្ចសហប្រតិបត្តិការមេគង្គ-ឡានឆាង ឆ្នាំ២០២៣ ក្រសួងការងារ បាន​បញ្ជាក់​ថា ព្រឹត្តិការណ៍​នេះ បង្ហាញឱ្យឃើញច្បាស់នូវសមិទ្ធិផល និងកិច្ចសហប្រតិបត្តិការ​ដ៏​ល្អ​របស់​មេគង្គ-ឡានឆាង សម្រាប់ប្រជាជន​នៅ​ក្នុងតំបន់នេះ ដើម្បីបន្តទទួលបានអត្ថប្រយោជន៍សង្គម-សេដ្ឋកិច្ច ពីមូលនិធិពិសេសមេគង្គ-ឡានឆាង ជាមួយ​នឹង​ឥទ្ធិពល​វិជ្ជមាន​ជា​ច្រើន​នៅ​តែ​បន្តរាប់​ទសវត្សរ៍ខាងមុខ។ ទិវាមួយនេះ ដើរតួជានិមិត្តសញ្ញា និង​ស្មារតីនៃ​ភាព​ជោគជ័យ​​​ដ៏អស្ចារ្យ​នៃកិច្ចសហការដ៏រឹងមាំរបស់យើងក្រោមក្របខណ្ឌ នៃកិច្ចសហប្រតិបត្តិការមេគង្គ-ឡានឆាង និង​បង្ហាញពីស្មារតីពិត នៃកិច្ចសហប្រតិបត្តិការល្អលើគ្រប់វិស័យ មិនកំណត់ត្រឹមតែវិស័យវប្បធម៌ និងមិត្តភាព​ប្រពៃណី​ប៉ុណ្ណោះ​ទេ ក្នុងគោលបំណងដើម្បីជំរុញសមាហរណកម្មអនុតំបន់ ក៏ដូចសម្រេចឱ្យបាននូវចក្ខុវិស័យ​របស់​មេដឹកនាំ​របស់យើង ក្នុងការកសាង​សហគមន៍​នៃ​អនាគត​រួមគ្នាប្រកបដោយសន្តិភាព និងវិបុលភាពក្នុងចំណោម​ប្រទេស​មេគង្គ-ឡានឆាង ដូចដែល​បាន​ចែង​នៅក្នុងសេចក្តីប្រកាសសាន់យ៉ាឆ្នាំ២០១៦។

សូមបញ្ជាក់ថា ទិវាសប្តាហ៍នៃកិច្ចសហប្រតិបត្តិការមេគង្គ-ឡានឆាង ឆ្នាំ២០២៣ រៀបចំឡើងនៅ​រាជធានីភ្នំពេញ ដោយក្រសួងការបរទេស និងសហប្រតិបត្តិការអន្តរជាតិ ដែល​ប្រព្រឹត្ត​ទៅក្រោម​អធិបតីភាពរបស់ ឯកឧត្ដម​បណ្ឌិតសភាចារ្យ សុក ស៊ីផាន់ណា ទីប្រឹក្សាជាន់ខ្ពស់​នៃ​រាជរដ្ឋាភិបាល​កម្ពុជា និងជាប្រធានលេខាធិការដ្ឋាន​ជាតិ​មេគង្គ-ឡានឆាង ដោយមានការចូលរួមពីថ្នាក់ដឹកនាំ ព្រមទាំងមន្ត្រីរាជការនៃក្រសួងការបរទេស តំណាងស្ថានទូត នៃបណ្ដាប្រទេសមេគង្គ-ឡានឆាង សមាជិកលេខាធិការដ្ឋានជាតិមេគង្គ-ឡានឆាង តំណាងក្រសួង/ស្ថាប័នពាក់ព័ន្ធ រួមទាំង​សាស្ត្រាចារ្យ និងនិស្សិតមកពីបណ្ដាសាកលវិទ្យាល័យ សរុបចំនួនប្រមាណ ២៥០រូប​ ចំពោះប្រទេស​មេគង្គ-ឡានឆាង រួមមាន៖កម្ពុជា ចិន ឡាវ មីយ៉ាន់ម៉ា ថៃ និងប្រទេសវៀតណាម៕ អត្ថបទ ៖ បូរ៉ាវី