អន្ដរជាតិ៖ ទាហានសម្ព័ន្ធអង្គការណាតូ ដែលមានមូលដ្ឋាននៅប្រទេសស្លូវ៉ាគី ប្រឈមនឹងការធ្វើតេស្តត្រៀមខ្លួនរបស់ពួកគេ អំឡុងសមយុទ្ធយោធាពហុជាតិ។

ទាហានជិត ២ពាន់នាក់ មកពីប៉ូឡូញ អាល្លឺម៉ង់ ស្លូវេនី ហុងគ្រី សាធារណរដ្ឋឆេក ស្លូវ៉ាគី និងសហរដ្ឋអាមេរិក បានចូលរួមសមយុទ្ធ Slovak Shield ដែលរៀបចំឡើងនៅតំបន់ភាគខាងត្បូងប្រទេសស្លូវ៉ាគី។

ក្រុមមេបញ្ជាការនិយាយថា សមយុទ្ធនេះ មានគោលបំណងធ្វើឲ្យប្រតិបត្តិការចុះសម្រុង និងស៊ីសង្វាក់រវាងសមាជិកអង្គការណាតូដែលបានចូលរួម។

រដ្ឋមន្រ្តីក្រសួងការពារជាតិស្លូវ៉ាគី លោក Jaroslav Nad និយាយថា វានឹងជួយឲ្យកងកម្លាំងអង្គការណាតូ សម្របសម្រួល និងសហប្រតិបត្តិការក្នុងករណីដែលមានការវាយប្រហារទៅលើប្រទេសស្លូវ៉ាគី។

កាលពីសប្តាហ៍មុន ស្លូវ៉ាគី បានក្លាយជាប្រទេសទី២នៃសម្ព័ន្ធមិត្តអ៊ុយក្រែន ផ្តល់យន្តហោះចម្បាំង MIG-29 ដែលទីក្រុងគីវ ជឿថាចាំបាច់ក្នុងទប់ទល់ការវាយលុករយៈពេលជាង ១ឆ្នាំរបស់រុស្ស៊ី៕