​កូឡុំប៊ី៖ យោង​តាម​មេបញ្ជាការ​យោធា​បាន​និយាយថា កងកម្លាំងប្រដាប់អាវុធ និង​នគរបាល​ប្រទេស​កូ​ឡុំ​ប៊ីបាន​ត្រៀមខ្លួន​ដើម្បី​ប្រឈមមុខ និង​ឆ្លើយតប​ចំពោះ​ការកើនឡើង​ការវាយប្រហារ​ដោយ​ក្រុម ក្លាន ដែល​ហ្កូ​ល​ហ្វូ ​(Clan del Golfo) បន្ទាប់ពី​ការសម្រេច​របស់​រដ្ឋាភិបាល​ក្នុងការ​ផ្អាក​បទ​ឈប់​បាញ់​ទ្វេភាគី​ ជាមួយ​ក្រុម​ប្រដាប់អាវុធ​ខុសច្បាប់​។

ប្រធានាធិបតីលោក ហ្គាស​តា​វ៉ូ ប៉េ​ត្រូ​ (Gustavo Petro) កាលពី​ថ្ងៃអាទិត្យបាន​ផ្អាក​បទ​ឈប់​បាញ់​ទ្វេភាគី​ដែល​បាន​ព្រមព្រៀង​ជាមួយ​ក្រុម Clan del Golfo ជា​ក្រុម​ជន​អន្ធពាល​ឧក្រិដ្ឋកម្ម​ធំ​បំផុត​របស់​ប្រទេស បន្ទាប់ពី​ក្រុម​នេះ​បាន​ដុត​រថយន្ត​ច្រើន​គ្រឿង ​និង​វាយប្រហារ​មកលើ​នគរបាលដោយ​កាំភ្លើងនៅ​ភាគ​ពាយព្យ​ប្រទេស ​ក្នុងពេល​មានការ​តវ៉ា​រយៈពេល​ ៣​សប្តាហ៍​ដោយ​ក្រុមកម្មករ​អណ្តូងរ៉ែ​ ដែល​បាន​ប្រឆាំង​ទៅនឹង​ប្រតិបត្តិការ​យោធា​លើ​ការជីក​យក​រ៉ែ​មាស​ដោយ​ខុសច្បាប់​។ បទ​ឈប់​បាញ់គឺជា​ផ្នែក​មួយ​នៃ​កិច្ចខិតខំ​ប្រឹងប្រែង​រប​ស់លោក​ប្រធានាធិបតី Petro ដែល​បាន​ចូលកាន់​តំណែង​កាលពី​ជាង ​៧​ខែ​កន្លងទៅនេះ ជា​មេដឹកនាំ​ឆ្វេងនិយម​ដំបូង​គេ​ក្នុង​ប្រវត្តិសាស្ត្រ​របស់​ប្រទេស ក្នុងការ​បញ្ចប់​ជម្លោះ​ប្រដាប់អាវុធ​ផ្ទៃក្នុង​ជិត ​៦​ទសវត្សរ៍ ដែល​បាន​បណ្តាល​ឲ្យ​មនុស្ស​ជាង ៤៥០,០០០នាក់​ស្លាប់​។ រដ្ឋាភិបាល​បាន​ចោទប្រកាន់​ក្រុម​បក្សសម្ព័ន្ធ​ពី​ការវាយប្រហារ​ ដែល​បាន​បណ្តាល​ឲ្យ​មានការ​បិទផ្លូវ និង​ការខ្វះខាត​ស្បៀងអាហារ និង​ប្រេងឥន្ធនៈ​នៅក្នុង​ក្រុង​យ៉ាងហោចណាស់​ចំនួន​១២​។ ឧ​ត្ត​ម​សេនីយ៍លោក ហេ​ល​ឌ័​រ ហ្វឺ​ណាន ជី​រ៉ា​ល​ដូ​ (Helder Fernan Giraldo) បាន​និយាយថា យើងបានរៀបចំ​សម្រាប់​ការកើនឡើង​នៃ​សកម្មភាព​ភេរវកម្ម​មកលើ​ជន​ស៊ីវិល ដោយ​ក្រុម​ប្រដាប់អាវុធ​ដែល​បានរៀបចំ​ទុក ​សម្រាប់​ការវាយប្រហារ​មកលើ​ក​ង​កម្លាំង​សាធារណៈ មកលើ​ហេដ្ឋារចនាសម្ព័ន្ធ​សេដ្ឋកិច្ចសំខាន់ៗ​របស់​ប្រទេស​។ ​ទន្ទឹមនឹងនេះ គណៈកម្មាធិការ​កាកបាទ​ក្រហម​អន្តរជាតិ ​(ICRC) បាន​សម្តែង​ការព្រួយបារម្ភ​ដោយបាន​និយាយថា ការប៉ះទង្គិច​គ្នា​រវាង​ក្រុម​ប្រដាប់អាវុធ​ខុសច្បាប់​របស់​ប្រទេស​កូ​ឡុំ​ប៊ី បានធ្វើឱ្យ​ស្ថានភាព​មនុស្សធម៌​របស់​ប្រទេស​នេះ​កាន់តែ​អាក្រក់​កាលពី​ឆ្នាំមុន ដោយ​ជន​ស៊ីវិល​ត្រូវ​ផ្លាស់ប្តូរ​ទីលំនៅ​ដោយ​បង្ខំ និង​រស់នៅក្នុង​បរិវេ​ណ​មាន​ដែន​កំណត់៕

អត្ថបទ៖ ប៊ុនថន