អាមេរិក៖ អង្គការសហប្រជាជាតិបានបើកសន្និសីទលើកដំបូងរបស់ខ្លួន ស្តីពីសន្តិសុខទឹកក្នុងរយៈពេលជិតកន្លះសតវត្សមកនេះកាលពីថ្ងៃពុធ ទី២២ ខែមីនា ដោយមានការស្នើសុំដល់រដ្ឋាភិបាលនានា ឱ្យគ្រប់គ្រងកាន់តែប្រសើរនូវធនធានរួមរបស់មនុស្សជាតិ។
អង្គការសហប្រជាជាតិបាននិយាយថា មួយភាគបួននៃចំនួនប្រជាជនពិភពលោកពឹងផ្អែកលើទឹកបរិភោគដែលពុំមានសុវត្ថិភាព ខណៈពាក់កណ្តាលខ្វះអនាម័យជាមូលដ្ឋាន។ ទន្ទឹមនឹងនេះជិតបីភាគបួននៃគ្រោះមហន្តរាយនាពេលថ្មីៗនេះទាក់ទងទៅនឹងទឹក។ សន្និសីទរយៈពេល ៣ថ្ងៃដែលបានចាប់ផ្តើមកាលពីថ្ងៃពុធនៅទីក្រុងញូវយ៉ក ពុំមានគោលបំណងបង្កើតកិច្ចព្រមព្រៀងដែលកើតចេញពីកិច្ចប្រជុំ ស្តីពីអាកាសធាតុនៅទីក្រុងប៉ារីសក្នុង ២០១៥ ឬស្តីពីការការពារធម្មជាតិនៅទីក្រុងម៉ុងរ៉េអាល់ក្នុងឆ្នាំ២០២២ នោះទេ។ ឯកអគ្គរដ្ឋទូតអាមេរិកប្រចាំនៅអង្គការសហប្រជាជាតិលោកស្រី Linda Thomas-Greenfield បាននិយាយថា លោកស្រីមានមោទនភាពក្នុងការប្រកាសថា សហរដ្ឋអាមេរិកនឹងផ្តល់ប្រាក់ចំនួន ៤៩ពាន់លានដុល្លារឈានឆ្ពោះទៅរកទឹកស្មើភាព ធន់នឹងបម្រែបម្រួលអាកាសធាតុ និងការវិនិយោគអនាម័យនៅប្រទេស និងជុំវិញពិភពលោក។
លោកស្រីនិយាយថា ថវិកានេះនឹងជួយបង្កើតការងារ ទប់ស្កាត់ជម្លោះ ការពារសុខភាពសាធារណៈ កាត់បន្ថយហានិភ័យនៃគ្រោះទុរ្ភិក្ស និងភាពអត់ឃ្លាន និងអាចឱ្យយើងឆ្លើយតបទៅនឹងបម្រែបម្រួលអាកាសធាតុ និងគ្រោះមហន្តរាយធម្មជាតិ។ លោកស្រីពុំបានប្រាប់ឱ្យច្បាស់ថា តើថវិកាត្រូវចំណាយពេលណា ឬនៅទីណានោះទេ។ អ្នកវិទ្យាសាស្ត្រ សេដ្ឋវិទូ និងអ្នកជំនាញខាងគោលនយោបាយបានប្រមូលផ្តុំគ្នាជាក្រុម ដោយរដ្ឋាភិបាលប្រទេសហូឡង់នៅក្នុងគណៈកម្មការសកលស្តីពីសេដ្ឋកិច្ចទឹក បានផ្តល់ការណែនាំឱ្យបញ្ឈប់ផ្តល់ថវិកា ៧០០លានដុល្លារក្នុងផ្នែកកសិកម្ម និងការឧបត្ថម្ភធនបម្រុងសម្រាប់ទឹក ដែលខ្លួននិយាយថា វាប៉ះពាល់ដល់បរិស្ថាន។ វាក៏គាំទ្រដល់ភាពជាដៃគូរវាងស្ថាប័នហិរញ្ញវត្ថុអភិវឌ្ឍន៍ និងអ្នកវិនិយោគឯកជនដើម្បីធ្វើឲ្យប្រសើរប្រព័ន្ធទឹក៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
