កំពង់ធំ ៖ ក្រុមការងារថ្នាក់ជាតិចុះមូលដ្ឋានស្រុកសណ្តាន់ ខេត្តកំពង់ធំ កាលពីថ្ងៃទី២២ ខែមីនា ឆ្នាំ២០២៣ បានបើកការដ្ឋានសាងសង់ផ្លូវគ្រួសក្រហមប្រវែង៥.៤៨០ម៉ែត្រ ឆ្លងកាត់៣ភូមិ គឺភូមិចេក១ស្ទង ភូមិវាលស្នាយ និងភូមិត្របែក និងស្តាប្រឡាយទឹកប្រវែង៧.៣១៤ ម៉ែត្រ ជូនប្រជាពលរដ្ឋរស់នៅឃុំមានជ័យ។

ក្នុងពិធីបើកការដ្ឋានសាងសង់ផ្លូវ និងស្តាប្រឡាយនេះ ធ្វើឡើងក្រោមវត្តមានឯកឧត្តមវេជ្ជបណ្ឌិត តូច យ៉ាន អនុប្រធានក្រុមការងារថ្នាក់ជាតិចុះមូលដ្ឋានស្រុកសណ្តាន់ ខេត្តកំពង់ធំ និងជាប្រធានក្រុមការងារថ្នាក់ជាតិចុះមូលដ្ឋានឃុំមានជ័យ តំណាងឯកឧត្តម លេង ផាលី រដ្ឋលេខាធិការក្រសួងផែនការ និងជាប្រធានក្រុមការងារថ្នាក់ជាតិចុះមូលដ្ឋានស្រុកសណ្តាន់ និងលោក ស ប៉ាហូ ប្រធានគម្រោង និងជានាយកខុទ្ធកាល័យសាលាខេត្តកំពង់ធំ, លោក ស៊ិន វណ្ណវុឌ្ឍ អភិបាលស្រុកសណ្តាន់ លោក ស៊ូ ធឿន មេឃុំមានជ័យ លោក-លោកស្រី អភិបាលរង មន្រ្តីសាលាស្រុក មន្ត្រីរដ្ឋបាលឃុំជាច្រើននាក់រួម និងប្រជាពលរដ្ឋ៣ភូមិ សរុបចំនួន២០៧នាក់។

ឯកឧត្តមវេជ្ជបណ្ឌិត តូច យ៉ាន បានថ្លែងនូវការសប្បាយរីករាយជាមួយប្រជាពលរដ្ឋ ដែលទទួលបានសមិទ្ធិផលថ្មី គឺផ្លូវក្រាលគ្រួសក្រហម ជាង៥គីឡូម៉ែត្រនាពេលនេះ ជាសមទ្ធិផល និងការអភិវឌ្ឍន៍ក្រោមការដឹកនាំរបស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តែងតែគិតគូរយកចិត្តទុក្ខជាទីបំផុត ចំពោះសុខទុក្ខរបស់ប្រជាពលរដ្ឋទូទាំងប្រទេស និងសំណូមពរបងប្អូន ប្រជាពលរដ្ឋទាំងអស់ ជួយថែរក្សា ការពារ និងជួយជួសជុលផ្លូវវិញបណ្តើរកុំអោយក្លាយជាថ្លុកក្របីដេកហើយ បាននាំគ្នាស្រែករករដ្ឋាភិបាល ស្រែករកជំនួយថ្នល់ថ្មីទៀត។ ក្រោយពីសំណេះសំណាលសួរសុខទុក្ខបងប្អូនប្រជាពលរដ្ឋយើងរួចហើយនោះ ឯកឧត្តមវេជ្ជបណ្ឌិត តូច យ៉ាន បានឯកភាពលើសំណើរលោកនាយកសាលា លោកមេឃុំ ដែលបានស្នើសុំខ្លោងទ្វារសាលាបឋមសិក្សា វាលស្នាយ នៅក្នុងភូមិវាលស្នាយ ឃុំមានជ័យ ដែលមាន៖

១៖ក្លោងទ្វារសាលាបឋមសិក្សាតំលៃស្មើនិង ១២ ០០០ ០០០ រៀល ( 3000 $)

២៖ឧបត្ថម្ភ រដ្ឋបាលឃុំមានជ័យ ៥០០ ០០០រៀល

៣៖ឧបត្ថម្ភនគរបាលរដ្ឋបាលឃុំមានជ័យ ២០០ ០០០ រៀល

៤៖ឧបត្ថម្ភសមាគមនារីឃុំ ២០០ ០០០ រៀល

៥៖ជូនសិស្សរាំរបាំបាចផ្កា នៅអនុវិទ្យាល័យ ប៊ុន រ៉ានីហ៊ុនសែន មានជ័យ៣នាក់១៥០០០០រៀល ។

សរុបទាំងអស់ ១៣ ០៥០ ០០០ រៀល(ដប់បីលានសូន្យសែនប្រាំម៉ឺនរៀលគត់) ។

តមកឯកឧត្តម វេជ្ជបណ្ឌិត តូច យ៉ាន រួមនិងក្រុមការងារ បានចុះសិក្សាទីតាំងដែលក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី នឹងចុះពិនិត្យ ពិគ្រោះ ព្យាបាលជំងឺជូនប្រជាពលរដ្ឋ ក្មេង ចាស់ ប្រុស ស្រី ដោយឥតគិតថ្លៃ និងចាក់វ៉ាក់សាំងបង្ការជំងឺកូវីដ-១៩ ចាប់ពីដូសទី១ រហូតដល់ដូសជំរុញទី៦ នាថ្ងៃទី៣០ ខែមីនា ឆ្នាំ២០២៣ខាងមុខនេះ នៅក្នុងអនុវិទ្យាល័យ ប៊ុន រ៉ានី ហ៊ុនសែន មានជ័យ ឃុំមានជ័យ ស្រុកសណ្តាន់ ខេត្តកំពង់ធំផងដែរ៕ អត្ថបទ ÷ រដ្ឋា