ភ្នំពេញ៖ សិស្សានុសិស្សតាមសាលារៀន បច្ចុប្បន្ននេះ បានចាប់ផ្ដើមលេងល្បែងប្រជាប្រិយ យ៉ាង​សប្បាយរីករាយ មុននឹងពិធីបុណ្យចូលឆ្នាំប្រពៃណីជាតិខ្មែរចូលមកដល់។

ទន្ទឹមនឹងការលេងល្បែងប្រជាប្រិយ​ ពួកគេជាយុវជន ​ក៏មានការហាត់សម នូវទម្រង់​សិល្បៈផ្សេង​សម្រាប់សម្ដែងក្នុងព្រឹត្តិការណ៍សង្រ្កាន្ត​ នៅក្នុងវិទ្យាល័យរបស់ខ្លួនផងដែរ។

វិទ្យាល័យជាស៊ីមសាមគ្គី នឹងរៀបចំសង្រ្កាន្តនៅថ្ងៃ២ និងថ្ងៃទី ៣ ខែមេសា ឆ្នាំ ២០២៣ខាងមុខ ក្រោមប្រធានបទ “សង្រ្កាន្តយុវជនដើម្បីវប្បធម៌ ។ មុននឹងកម្មវិធីសង្រ្កាន្តចូលមកដល់ សម្រាប់​សិស្សនៅវិទ្យាល័យ ជាស៊ីមសាមគ្គី ​ក៏បានបន្តតុបតែងលម្អសោភណ្ឌភាពសាលារបស់ខ្លួន ជា​ពិសេសគឺនាំគ្នាលេងល្បែងប្រជាប្រិយរបស់ខ្មែរ ​យ៉ាងសប្បាយរីករាយ។

ទន្ទឹមនឹងការលេងល្បែងប្រជាប្រិយទាំងនេះ ពួកគេជាយុវជន ​ក៏បាននាំគ្នាហ្វឹកហាត់នូវ ការរាំទម្រង់​សិល្បៈខ្មែរ ជាច្រើនដើម្បីសម្ដែងក្នុងព្រឹត្តិការណ៍សង្រ្កាន្តរបស់ខ្លួន ​ក្នុងគោលដៅសំខាន់អភិរក្ស និង​បង្ហាញឱ្យយុវជនបានស្វែងយល់ យកចិត្តទុកដាក់លើអ្វីដែលជាកេរមរតករបស់ខ្មែរ។​ លើសពីនេះ គឺនឹងមានការអញ្ជើញ ព្រឹទ្ធាចារ្យសិល្បៈករ គង់ ណៃ ចូលរួមផងដែរ​។ នេះជាការលើកឡើងរបស់ យុវជន ម៉ៃ សំណាង ជាប្រធានក្រុមការងាររៀបចំសង្រ្កាន្តនៅវិទ្យាល័យជាស៊ីមសាមគ្គី​។

យុវជនប្រធានក្រុមការងារ បញ្ជាក់ថា ​សម្រាប់ចំណុចពិសេសមួយទៀត គឺក្រុមយុវជននៃវិទ្យាល័យ​ជាស៊ីម សាមគ្គី ​បានយកគុនល្បុកតោ បូក​បញ្ចូល​ជាមួយក្បាច់រាំ ​ម៉ាឌីហ្សុន ​បង្កើតជាក្បាច់រាំថ្មី គួរឱ្យ​ចាប់អារម្មណ៍​សម្រាប់បង្ហាញក្នុងព្រឹត្តិការណ៍​សង្រ្កាន្តរបស់ខ្លួនផងដែរ។

យុវជន ជាសិស្សដែលបានចូលរួមរៀបចំ ​និងលេងកំសាន្តល្បែងប្រជាប្រិយរៀងរាល់ថ្ងៃមកនេះ ពេញចិត្ត ​នៅពេលដែលសិស្សនាំគ្នាមកលេងល្បែង​ប្រជាប្រិយបែបនេះ ​និង​មានភាព​ចាំបាច់​ក្នុងការ​ការពារ អភិរក្សថែរក្សា ​សម្បត្តិវប្បធម៌របស់ខ្មែរ​។

ថ្មីៗនេះក្រសួងអប់រំ ​យុវជន និងកីឡា​ ក៏បានចេញសេចក្ដីជូនដំណឹង ដោយលើកទឹកចិត្ត​ឱ្យគ្រប់​គ្រឹះស្ថានសិក្សាទាំងរដ្ឋ ​និងឯកជន​ បង្កបរិយាកាសឱ្យសិស្សលេងកំសាន្តល្បែង​ប្រជាប្រិយ​របស់​ខ្មែរផងដែរ​ ក្នុងកំឡុងពិធីចូលឆ្នាំប្រពៃណីជាតិខ្មែរ។​ ក្រសួងបានហាមប្រាម​ជាដាច់ខាត ក្នុង​ការលេងម្សៅ រឺជះទឹក​ ដែលពុំមែនជារបស់ខ្មែរ៕ អត្ថបទ៖ គឹមហុក