ភ្នំពេញ៖ ភាគីសិង្ហបុរី បានជំរុញឱ្យកម្ពុជា ធ្វើការ​នាំចូលផលិតផល​កសិកម្ម​ឱ្យកាន់​តែច្រើន​ថែមទៀត​ទៅកាន់​ទីផ្សារ​សិង្ហបុរី រួមមាន អង្ករ ម្រេច និងបន្លែសរីរាង្គជាដើម។ ខណៈរដ្ឋាភិបាលនៃប្រទេសទាំងពីរ ប្តេជ្ញាចិត្តក្នុងការពង្រឹង និង​ពង្រីកកិច្ចសហប្រតិបត្តិការ​ពាណិជ្ជកម្ម​រវាងប្រទេសទាំងពីរ។

ស្ថិតនៅប្រទេសឥណ្ឌូនេស៊ី ឯកឧត្តម ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម បានទទួល​ជួប​ពិភាក្សាការងារ​ទ្វេភាគី ដាច់ដោយឡែកមួយជាមួយ ឯកឧត្តម Gan Kim Yong រដ្ឋមន្ត្រីពាណិជ្ជកម្ម និងឧស្សាហកម្មសិង្ហបុរី ក្នុងអំឡុង​កិច្ចប្រជុំ​ចង្អៀតរដ្ឋមន្រ្តីសេដ្ឋកិច្ចអាស៊ានលើកទី២៩ នៅទីក្រុងម៉ាហ្គាឡាំង។

ប្រភពពីក្រសួងពាណិជ្ជកម្ម បានឲ្យដឹងនៅរសៀលថ្ងៃទី២៣ មីនា ឆ្នាំ២០២៣នេះថា នៅក្នុង​ជំនួបនា​ឱកាសនោះ ឯកឧត្តមរដ្ឋមន្រ្តី បានសម្តែងការស្វាគមន៍យ៉ាងកក់ក្តៅជូនចំពោះភាគីសិង្ហបុរី និង​សហការី ព្រមទាំងបាន​ថ្លែងអំណរ​គុណ លើការគាំទ្ររបស់ក្រសួងពាណិជ្ជកម្ម និង​ឧស្សាហកម្មសិង្ហបុរី​ ដល់​កម្ពុជា ក្នុងភាពជាប្រធាន​អាស៊ានរបស់​កម្ពុជាឆ្នាំ២០២២កន្លងទៅ។

ជាការឆ្លើយតប ភាគីសិង្ហបុរី បានបញ្ជាក់ពីការប្តេជ្ញាចិត្តក្នុងការពង្រឹង និងពង្រីក​កិច្ចសហប្រតិបត្តិការ​ពាណិជ្ជកម្ម កម្ពុជា-សិង្ហបុរី ព្រមទាំងគាំទ្រយ៉ាងពេញលេញ ក្នុងការផ្តល់​កិច្ចសហប្រតិបត្តិការយ៉ាងជិតស្និទ្ធ។ នៅក្នុងឱកាសនោះ ឯកឧត្តម បានជំរុញឱ្យភាគីកម្ពុជា នាំចូលផលិតផលកសិកម្មរបស់ខ្លួនឱ្យកាន់តែច្រើនមកកាន់ទីផ្សារសិង្ហបុរី រួមមាន៖ អង្ករ ម្រេច បន្លែសរីរាង្គ ជាដើម។

នៅកិច្ចបញ្ចប់ ភាគីទាំងពីរបានប្តេជ្ញាចិត្តបន្តកិច្ចសហប្រតិបត្តិការពាណិជ្ជកម្ម កម្ពុជា-សិង្ហបុរី​បន្ថែមទៀត និងជាពិសេស​ការសម្រេចបាននូវសមិទ្ធផលអាទិភាពសេដ្ឋកិច្ចនានា ក្រោម​សសរស្ដម្ភ​សហគមន៍​សេដ្ឋកិច្ចអាស៊ាន៕ ដោយ ៖ បូរ៉ាវី