ភ្នំពេញ៖ ឯកឧត្តម ប៉ាន សូរស័ក្ដិ រដ្ឋមន្រ្ដីក្រសួងពាណិជ្ជកម្ម និងជារដ្ឋមន្រ្តីសេដ្ឋកិច្ចអាស៊ានសម្រាប់កម្ពុជា (AEM Lead for Cambodia) កាលពីថ្ងៃទី២២ ខែមីនា ឆ្នាំ២០២៣ បានដឹកនាំគណៈប្រតិភូកម្ពុជាចូលរួមកិច្ចប្រជុំ​ចង្អៀតរដ្ឋមន្រ្តី​សេដ្ឋកិច្ចអាស៊ានលើកទី២៩ (The Twenty-Nine ASEAN Economic Ministers’ Retreat– the 29th AEM Retreat) និងកិច្ចប្រជុំពាក់ព័ន្ធ នៅទីក្រុងម៉ាហ្គាឡាំង ប្រទេសឥណ្ឌូនេស៊ី។

ក្រសួងពាណិជ្ជកម្ម នៅរសៀលថ្ងៃទី២៣ ខែមីនានេះបានឲ្យ ប៊ីធីវី ដឹងថា កិច្ចប្រជុំនេះ បានដឹកនាំដោយ ឯកឧត្តមបណ្ឌិត​ Zulkifli Hasan រដ្ឋមន្រ្តីក្រសួងពាណិជ្ជកម្មឥណ្ឌូនេស៊ី ក្នុងនាមប្រធាននៃកិច្ចប្រជុំ​រដ្ឋមន្រ្តីសេដ្ឋកិច្ច​អាស៊ាន​សម្រាប់​ឆ្នាំ២០២៣​ និងមានការចូលរួមដោយរដ្ឋមន្ត្រីសេដ្ឋកិច្ចអាស៊ាននៃប្រទេសសមាជិកទាំងអស់ អគ្គលេខាធិការអាស៊ាន ប្រធាននៃក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់ឆ្នាំ២០២៣ និងតំណាងពាក់ព័ន្ធ និងគណៈប្រតិភូ​នៃប្រទេស​សមាជិកអាស៊ានទាំងអស់ ព្រមទាំងមន្ត្រីលេខាធិការដ្ឋានអាស៊ាន។

នាឱកាសនោះ ឯកឧត្តមរដ្ឋមន្រ្ដី បានបញ្ជាក់ពីការគាំទ្ររបស់កម្ពុជាចំពោះឥណ្ឌូនេស៊ីក្នុងនាម​ជាប្រធាន​កិច្ចប្រជុំ​រដ្ឋមន្រ្តី​សេដ្ឋកិច្ចអាស៊ានសម្រាប់ឆ្នាំ២០២៣ ក្រោមមូលបទ “ASEAN Matters: Epicentrum of Growth” ព្រមទាំង​បានប្ដេជ្ញា​ចិត្ត​គាំទ្រ និងផ្តល់កិច្ចសហការយ៉ាងជិតស្និទ្ធ សំដៅអាចសម្រេចបានសមិទ្ធផលបន្ថែមទៀតក្នុងដំណើរការ​កសាង​សហគមន៍​សេដ្ឋកិច្ចអាស៊ាន។ ជាមួយគ្នានេះ ឯកឧត្តម ក៏បានចូលរួមផ្លាស់ប្តូរយោបល់ក្នុងកិច្ចពិភាក្សា និងបានផ្តល់​បទអន្តរាគមន៍លើរបៀបវារៈសំខាន់ៗ មួយចំនួនផងដែរ។

ឯកឧត្តមរដ្ឋមន្រ្ដី បានបញ្ជាក់ថា ជាលទ្ធផលកិច្ចប្រជុំដ៏មានសារៈសំខាន់ទាំងពីរ ទទួលបានលទ្ធផល មានដូចជា ១)កិច្ចប្រជុំពិគ្រោះយោបល់រវាងរដ្ឋមន្ត្រីសេដ្ឋកិច្ចអាស៊ាន និងក្រុមប្រឹក្សាពិគ្រោះយោបល់ធុរកិច្ចអាស៊ាន៖ តំណាងក្រុមប្រឹក្សាពិគ្រោះយោបល់ធុរកិច្ចអាស៊ាននៃប្រទេសនីមួយៗបានធ្វើបទបង្ហាញសង្ខេបជូនរដ្ឋមន្រ្តីសេដ្ឋកិច្ចអាស៊ាន អំពីគម្រោងអាទិភាព និងគំនិតផ្តួចផ្តើមរបស់ខ្លួនសម្រាប់ឆ្នាំ២០២៣។ អង្គប្រជុំ បានគូសបញ្ជាក់ផងដែរ អំពីសារៈសំខាន់ក្នុងការពង្រឹងយន្តការទំនាក់ទំនងរវាងក្រុមការងារអន្តរវិស័យអាស៊ានជាមួយនឹងវិស័យឯកជន ដើម្បីធានាបាននូវប្រសិទ្ធភាពក្នុងការអនុវត្តគំនិតផ្តួចផ្តើម និងកិច្ចការនានារបស់អាស៊ាន។ ២)កិច្ចប្រជុំចង្អៀតថ្នាក់រដ្ឋមន្រ្តីសេដ្ឋកិច្ចអាស៊ានលើកទី២៩៖ អង្គប្រជុំបានផ្លាស់ប្តូរមតិយោបល់យ៉ាងផុសផុលលើរបៀបវារៈសំខាន់ៗរបស់សហគមន៍សេដ្ឋកិច្ចអាស៊ាន រួមមាន៖ កិច្ចការដែលត្រូវបន្តតាមដានស្របតាមអនុសាសន៍ និងការណែនាំរបស់ថ្នាក់ដឹកនាំអាស៊ាន ក្នុងកិច្ចប្រជុំ​កំពូលអាស៊ានលើកទី៤០ និងទី៤១ ដែលបានប្រព្រឹត្តទៅកាលពីខែវិចិ្ឆកា ឆ្នាំ២០២២ នារាជធានីភ្នំពេញ, សមិទ្ធផលអាទិភាពសេដ្ឋកិច្ចក្រោមភាពជាប្រធានអាស៊ានរបស់ឥណ្ឌូនេស៊ីសម្រាប់ឆ្នាំ២០២៣, ការងារ​អាទិភាពប្រចាំឆ្នាំ២០២៣ របស់ក្រុមការងារអន្តរវិស័យ, អនុសាសន៍របស់ក្រុមការងារជាន់ខ្ពស់ ស្តីពី​សមាហរណកម្មសេដ្ឋកិច្ចអាស៊ាន, របាយការណ៍ និងបច្ចុប្បន្នភាពនៃការចរចា​ដំទ្បើង​កម្រិតកិច្ចព្រមព្រៀង​ពាណិជ្ជកម្មទំនិញអាស៊ាន (ATIGA Upgrade), អាទិភាពនៃការចរចាកិច្ចព្រមព្រៀងពាណិជ្ជកម្មសេរី, ការអនុវត្តកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ (RCEP), ការអនុវត្តផែនការសហគមន៍សេដ្ឋកិច្ចអាស៊ានឆ្នាំ ២០២៥ និងបញ្ហាផ្សេងៗ។

តាមក្រសួងពាណិជ្ជកម្ម បានបញ្ជាក់ថា អង្គប្រជុំនេះ ក៏មានការអញ្ជើញចូលរួមពី រដ្ឋមន្រ្តីទេសចរណ៍ ពាណិជ្ជកម្ម និងឧស្សហកម្មនៃសាធារណរដ្ឋប្រជាធិបតេយ្យទីម័រខាងកើត ក្នុងនាមជាសមាជិកសង្កេតការណ៍ បន្ទាប់ពីថ្នាក់ដឹកនាំ​កំពូលនៃសមាជិកអាស៊ានទាំងអស់បានឯកភាពគ្នាជាគោលការណ៍ អនុញ្ញាតជូនសាធារណរដ្ឋប្រជាធិបតេយ្យ​ទីម័រខាងកើតចូលរួមជាសមាជិកសង្កេតការណ៍នៃអាស៊ាន ក្នុងកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធ ដែលបានប្រព្រឹត្តទៅនៅថ្ងៃទី១០-១៣ ខែវិច្ឆិកា ឆ្នាំ២០២២ នៅរាជធានីភ្នំពេញ ប្រទេសកម្ពុជា៕ ដោយ ៖ បូរ៉ាវី