ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានស្នើទៅដល់ប្រទេសដែលប្រើភាសាបារាំង សូមបន្តចូលរួមជួយអភិវឌ្ឍន៍ប្រទេសកម្ពុជា ឲ្យកាន់តែមានភាពរីកចម្រើន ។
ការស្នើនេះ ធ្វើឡើងក្នុងទិវាអន្តរជាតិហ្វ្រង់កូហ្វូនី ឆ្នាំ២០២៣ ក្រោមប្រធានបទ “៣២១លាននៃអ្នកនិយាយភាសាបារាំង រាប់ពាន់លាននៃអត្ថន័យវប្បធម៌” កាលពីរសៀលថ្ងៃទី២២ ខែមីនា ឆ្នាំ២០២៣ នាវិទ្យាស្ថានបច្ចេកវិទ្យាកម្ពុជា (តិចណូ) ដោយមានការអញ្ជើញចូលរមពីឯកឧត្តម Jacques PELLET ឯកអគ្គរដ្ឋទូតសាធារណៈរដ្ឋបារាំងប្រចាំនៅកម្ពុជាផងដែរ ។
ឯកឧត្តមបណ្ឌិតសភាចារ្យ មានប្រសាសន៍ថា ប្រទេសប្រើភាសាបារាំង នាពេលកន្លងមក បានផ្ដល់នូវជំនួយជាច្រើន ដើម្បីជួយអភិវឌ្ឍន៍ក្នុងប្រទេសកម្ពុជា ក្នុងនោះមានវិស័យអប់រំផងដែរ ដែលមានទាំងការសាងសង់នូវអគារសិក្សា ផ្ដល់សម្ភារសិក្សា និងការផ្ដល់នូវអាហារូបករណ៍ជាដើម ។
ឯកឧត្តមប បានបន្តថា ទន្ទឹមនេះ ក្នុងនាមរាជរដ្ឋាភិបាល សូមលើកទឹកចិត្តដល់ប្រទេសដៃគូអភិវឌ្ឍន៍នានា ដែលប្រើភាសាបារាំងបន្តចូលរួមអភិវឌ្ឍន៍ប្រទេសកម្ពុជា ក្នុងនោះមានវិស័យ អប់រំ និងវិស័យផ្សេងៗទៀត ។
ជាមួយនេះ ឯកឧត្តមរដ្ឋមន្ត្រី បានលើកទឹកចិត្តឱ្យសិស្សានុសិស្ស ខិតខំសិក្សាភាសាបារាំង ដើម្បីពង្រឹងសមត្ថភាពបន្ថែមលើចំណេះ និងជំនាញដែលកំពុងសិក្សា ហើយនាំយកចំណេះដឹងទាំងអស់នោះ មកចូលរួមអភិវឌ្ឍន៍ប្រទេស ជាមួយរាជរដ្ឋាភិបាល ឲ្យកាន់តែមានភាពរីកចម្រើនលើគ្រប់វិស័យបន្ថែមទៀត ។
គួររំលឹកថា អង្គការអន្តរជាតិហ្វ្រង់កូហ្វូនី ត្រូវបានបង្កើតឡើង នៅថ្ងៃទី២០ ខែមីនា ឆ្នាំ១៩៧០ ក្រោមកិច្ចផ្ដួចផ្ដើមរបស់ស្ថាបនិក នៃអង្គការននេះ រួមមាន លោក ឡេអូប៉ូល សេដាសង់ហ្គ័រ អតីតប្រធានាធិបតីសេណេហ្កាល់ លោក អេប៊ីប បួហ្គីបា អតីតប្រធានាធិបតីទុយនេស៊ី លោក អាមានី ឌីយ៉ូរី អតីតប្រធានាធិបតីនីហ្សេ និងព្រះបរមរតនកោដ្ឋ ព្រះបាទនរោត្តម សីហនុ ហើយនៅក្នុងឆ្នាំ១៩៩១ ប្រទេសកម្ពុជាបានចូលជាសមាជិក នៃអង្គការអន្តរជាតិនេះ ៕អត្ថបទ បាន សុខរិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
