អន្ដរជាតិ៖ លោក Dmitry Medvedev ដែលជាសម្ព័ន្ធមិត្តរបស់លោក Vladimir Putin និយាយនៅថ្ងៃព្រហស្បតិ៍នេះថា ការព្យាយាមណាមួយក្នុងការចាប់ខ្លួនប្រធានាធិបតីរុស្ស៊ី ក្រោយតុលាការព្រហ្មទណ្ឌអន្តរជាតិ (ICC) ចេញដីកាចាប់ខ្លួនប្រមុខវិមានក្រឹមឡាំងរូបនេះ គឺស្មើនឹងការប្រកាសសង្រ្គាមជាមួយរុស្ស៊ី ។  

គួរឲ្យដឹងថា ICC បានចេញដីការចាប់ខ្លួនលោក Putinកាលពីថ្ងៃសុក្រ ដោយចោទរូបលោកពីបទឧក្រិដ្ឋកម្មសង្រ្គាមពីបទបាននិរទេសកុមាររាប់ពាន់នាក់ចេញពីអ៊ុយក្រែន ។ ពួកគេនិយាយថា មានមូលដ្ឋានសមហេតុផលជឿថាលោក Putin ទទួលខុសត្រូវចំពោះឧក្រិដ្ឋសង្រ្គាម ។  

លោក Medvedev ដែលជាអតីតប្រធានាធិបតីរុស្ស៊ី និយាយប្រាប់សារព័ត៌មានរុស្ស៊ីថា ICC ដែលប្រទេសជាច្រើនរួមទាំងរុស្ស៊ី ចិន និងសហរដ្ឋអាមេរិកពុំទទួលស្គាល់នោះ គឺជាតុលាការច្បាប់មួយដែលពុំធ្លាប់ធ្វើរឿងសំខាន់នោះទេ ។ 

លោក Medvedev ដែលមានតួនាទីជាអនុប្រធានក្រុមប្រឹក្សាសន្តិសុខដ៏មានអំណាចរបស់រុស្ស៊ី និយាយថា សាកល្បងគិតមើល ស្ថានភាពបែបនេះ ពុំធ្លាប់ដែលមានទេ ប៉ុន្តែបើមានវិញ ប្រមុខរដ្ឋនុយក្លេអ៊ែរធ្វើដំណើរទៅកាន់ដែនដីមួយដូចជាទៅអាល្លឺម៉ង់ ហើយត្រូវបានគេចាប់ខ្លួន ។  លោកបន្តថា តើនឹងមានអ្វីកើតឡើង? វានឹងក្លាយជាការប្រកាសសង្រ្គាមជាមួយសហព័ន្ធរុស្ស៊ី ៕