​អ៊ីស្រាអែល៖ ប្រជាជន​អ៊ីស្រាអែល​បាន​ចេញ​ដើរ​ធ្វើបាតុកម្ម​តាម​ផ្លូវ​នៅ​ទីក្រុង Bnei Brak កាលពី​ថ្ងៃ​ព្រហស្បតិ៍ ដោយ​តវ៉ា​ប្រឆាំង​នឹង​ការកែទម្រង់​ប្រព័ន្ធ​តុលាការ​របស់​រដ្ឋាភិបាល ដោយ​បាន​បង្កើន​យុទ្ធនាការ​រយៈពេល​ជាច្រើន​ខែ​ ដើម្បី​បង្ហាញ​ការមិន​យល់ព្រម​ចំពោះ​ការផ្លាស់ប្តូរ​នេះ​។

រូបភាព​ពី​យាន​ដ្រូ​ន​បាន​បង្ហាញ​ក្រុម​បាតុករ​រាប់ពាន់នាក់​ដើរ​ដង្ហែ​ក្នុង​ទីក្រុង ដែល​មួយ​ចំនួន​កំពុង​កាន់​រូប​ចម្លង​ដ៏​ធំ​នៃ​ការប្រកាស​ឯករាជ្យ​រប​ស់​ប្រទេស​។ រដ្ឋាភិបាល​របស់​លោក Netanyahu ដែល​រួមមាន​ផ្នែក​សាសនា ​និង​ជាតិនិយម​ជ្រុល ត្រូវ​បាន​គាំទ្រ​យ៉ាង​ទូលំទូលាយ​ដោយ​សហគមន៍​និកាយ​អូ​ថូ​ដុក​ (Orthodox) របស់​ទីក្រុង Bnei Brak​។ ការ​តវ៉ា​បាន​កើន​ឡើង​ចាប់​តាំង​ពី​ដើម​ឆ្នាំ​មក នៅ​ពេល​ដែល​រដ្ឋាភិបាល​ស្តាំនិយម​របស់​នាយករដ្ឋ​មន្ត្រី​លោក Benjamin Netanyahu បាន​បង្ហាញ​ច្បាប់​ថ្មី​ដែល​នឹង​កំណត់​អំណាច​របស់​តុលាការ​កំពូល​។​ ​ផែនការ​នេះ​បាន​បង្ក​ឲ្យ​មាន​ក្តីបារម្ភ​ដល់​ស្ថានភាព​លទ្ធិប្រជាធិបតេយ្យ​របស់​​អ៊ីស្រាអែល​ទាំង​ក្នុង ​និង​ក្រៅប្រទេស​។ ក្រុម​ទាហាន​បម្រុង​ក៏បាន​ចូលរួម​ការ​តវ៉ា​នេះ ហើយ​មន្ត្រី​ជាន់ខ្ពស់​នៅ​ក្រសួង​ហិរញ្ញវត្ថុ​បាន​ព្រមាន​ក្នុង​សប្តាហ៍​នេះ ​អំពី​ការ​ធ្លាក់​ចុះ​សេដ្ឋកិច្ច​។

ក្នុង​ពេល​ជាមួយ​គ្នា​នេះ​ដែរ​លោក Netanyahu បាន​ជំរុញ​ឆ្ពោះ​ទៅ​មុខ​នូវ​ច្បាប់​នេះ ដែល​រួមមាន​សេចក្តី​ស្នើ​ច្បាប់​នានា ដើម្បី​ផ្តល់​ឱ្យ​រដ្ឋាភិបាល​នូវ​អំណាច​ក្នុង​ការ​សម្រេចចិត្ត​ជ្រើស​រើស​ចៅក្រម និង​កំណត់​អំណាច​របស់​តុលាការ​ក្នុង​ការ​ប្រឆាំង​ច្បាប់​នេះ​។ លោក Netanyahu ស្ថិត​នៅ​ក្នុង​ការ​កាត់​ទោស​ពី​បទ​ចោទប្រកាន់​អំពើពុករលួយ​ ដែល​លោក​បាន​បដិសេធ​ដោយ​និយាយ​ថា ​ការ​ផ្លាស់ប្តូរ​ប្រព័ន្ធ​តុលាការ​គឺ​ត្រូវការ​ដើម្បី​ស្ដារ​ឡើងវិញ​តុល្យភាព ​រវាង​ផ្នែក​ផ្សេងៗ​របស់​រដ្ឋាភិបាល​។ អ្នក​រិះគន់​និយាយ​ថា វា​នឹង​ធ្វើ​ឱ្យ​លទ្ធិប្រជាធិបតេយ្យ​របស់​​អ៊ីស្រាអែល​ចុះ​ខ្សោយ និង​ប្រគល់​អំណាច​ដែល​ពុំ​អាច​គ្រប់គ្រង​បាន​ទៅឱ្យ​រដ្ឋាភិបាល​៕

អត្ថបទ៖ ប៊ុនថន