ក្រិក៖ កម្មករក្រិករាប់រយនាក់បានប្រមូលផ្ដុំគ្នានៅស្ថានទូតបារាំង ក្នុងរដ្ឋធានីអាតែនកាលពីថ្ងៃព្រហស្បតិ៍ ទី២៣មីនា ដែលត្រូវបានចូលរួមដោយជនជាតិបារាំងកំពុងរស់នៅក្នុងប្រទេសក្រិក ដើម្បីបង្ហាញការគាំទ្រសម្រាប់ការធ្វើកូដកម្មរបស់ក្រុមកម្មករ នៅក្នុងប្រទេសបារាំងជុំវិញច្បាប់កំណែទម្រង់។
ការប្រមូលផ្ដុំគ្នាដែលបានទាក់ទាញក្រុមកម្មករមកពីសហជីពផ្សេងៗ ត្រូវបានរៀបចំដោយ PAME ដែលជាចលនាពលករនៃគណបក្សកុម្មុយនីស្តក្រិក។ ក្រុមអ្នកគាំទ្រ PAME ក៏បានធ្វើដំណើរទៅកាន់ប្រទេសបារាំងផងដែរកាលពីថ្ងៃព្រហស្បតិ៍ ដើម្បីចូលរួមក្បួនកូដកម្ម។ ប្រធានសហជីពនៅកំពង់ផែ Piraeus លោក Markos Bekris បាននិយាយថា យើងកំពុងបង្ហាញសាមគ្គីភាព និងការគាំទ្រដល់បងប្អូនរបស់យើងជាកម្មករនៅក្នុងប្រទេសបារាំង ដែលនៅពេលនេះកំពុងតាក់តែងប្រវត្តិសាស្ត្រដោយការតវ៉ា និងចាត់វិធានការដែលមានក្នុងដៃប្រឆាំងនឹងគោលនយោបាយរបស់លោក Macron និងភាគច្រើនរបស់សហភាពអឺរ៉ុប ដែលចង់បានវណ្ណៈកម្មករ និងមនុស្សរស់នៅដោយគ្មានសិទ្ធិសេរីភាព។
ក្រុមអ្នកតវ៉ាបានស្រែកច្រៀង និងកាន់បដាសរសេរថា ជ័យជម្នះសម្រាប់កម្មករបារាំង។ រថយន្តនគរបាលជាច្រើនគ្រឿងបានឡោមព័ទ្ធបរិវេណខាងមុខស្ថានទូត ដែលបានឆ្លងផ្លូវពីអគាររដ្ឋសភារបស់ប្រទេសនេះ ខណៈនគរបាលពង្រាយកម្លាំងការពារសណ្ដាប់ធ្នាប់៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
