​បាល់ទាត់៖ ​ខ្សែប្រយុទ្ធ​ក្លិប​អារ៉ាប៊ីសាអ៊ូឌីត Al Nassr, Cristiano Ronaldo បានបង្ហាញ​ខ្លួន​ប្រកួត​ទី ១៩៧ ឱ្យ​ក្រុម​ជម្រើសជាតិ​ព័រទុយហ្កាល់​យប់មិញ​ពេល​យកឈ្នះ​លិ​ក​តិ​ន​ស្តា​ញ ៤-០ ក្នុងការ​ប្រកួត​ជម្រុះ Euro 2024​។ ​កីឡាករ​វ័យ ៣៨ឆ្នាំ​រូបនេះ​បាន​ក្លាយជា​កីឡា​ករទី ១ លើ​លោក​ដែល​បង្ហាញខ្លួន​ឱ្យ​ក្រុម​ជម្រើសជាតិ​ច្រើន​បំផុត ១៩៧ប្រកួត​បំបែក​កំណត់ត្រា​ចាស់​របស់​កីឡាករ​គុយវែត Bader Al-Mutawa​។

​​បន្ទាប់ពី ២គ្រាប់​ដំបូង​ធ្វើបាន​ដោយ Joao Cancelo និង Bernado Silva អតីត​កីឡាករ​របស់​ក្រុម​បិសាច​ក្រហម Manchester United រូបនេះ​ក៏​រកបាន​គ្រាប់​ទី ១ របស់ខ្លួន​ដោយ​បាល់ ១១ម៉ែត្រ មុន​រកបាន​គ្រាប់​ទី​ពីរ​របស់ខ្លួន​ដោយ​បាល់ Freekick​។ ​សូមបញ្ជាក់ថា Cristiano Ronaldo ដែល​ឈានចូល​វ័យ ៣៨ឆ្នាំ​កាលពី​ខែ​មុនបានបញ្ជាក់​ក្នុង​សន្និសីទ​សារព័ត៌មាន​មុន​ការប្រកួត​ថា ខ្លួន​មិនដែល​គិត​រឿង​ចូលនិវត្តន៍​ឡើយ តែ​នឹង​ផ្តោតអារម្មណ៍​លើ​ទំព័រ​ថ្មី​ជាមួយ​ក្រុម​ជម្រើសជាតិ​ព័រទុយហ្កាល់ ​ក្រោម​ការដឹកនាំ​របស់​អ្នកចាត់ការ​ថ្មី Roberto Martinez​។​

​​រំលឹក​ដែរ​ថា Ronaldo ត្រូវបាន​អតីត​អ្នកចាត់ការ Fernando Santo ឱ្យ​អង្គុយ​កៅអី​បម្រុង​ពីរ​ប្រកួត​ចុងក្រោយ​របស់​ព័រទុយហ្កាល់​នៅ World Cup 2022 កាតា​ដែល​ធ្លាក់​ត្រឹម​វគ្គ ៨ក្រុម​ចុងក្រោយ​ក្រោម​ស្នាដៃ​ម៉ា​រ៉ុ​ក​៕

​អត្ថបទ​៖​នាង សុភា​វុ​ធ