ភ្នំពេញ៖ បណ្តាហាងលក់ដូរទំនិញ និងសេវាកម្ម ទាំងក្នុងប្រព័ន្ធសេដ្ឋកិច្ច និងក្រៅប្រព័ន្ធសេដ្ឋកិច្ច មួយចំនួនធំ បានរៀបចំបញ្ជីតារាងរាយនាមមុខទំនិញ សេវាកម្ម អមដោយមានការកំណត់តម្លៃ​ច្បាស់លាស់ ដើម្បីផ្តល់ភាពងាយស្រួល ភាពទាក់ទាញ និងភាពស្មោះត្រង់នៅក្នុងដំណើរ​ការលក់ដូរ។

បណ្តាអាជីវករក្រុងតាខ្មៅ ខេត្តកណ្តាល និងនៅរាជធានីភ្នំពេញ បានថ្លែងប្រាប់BTV នៅថ្ងៃទី២៤ ខែមីនាថា បន្ទាប់ពីទទួលការណែនាំពីមន្ត្រីជំនាញមន្ទីរពាណិជ្ជកម្ម និងមន្ទីរទេសចរណ៍ មក​បណ្តាភោជនីយដ្ឋាន ហាងលក់ទំនិញ និងសេវាកម្មទាំងក្នុង និងក្រៅប្រព័ន្ធសេដ្ឋកិច្ច មួយ​ចំនួនបានរៀបចំបញ្ជីតារាងកំណត់តម្លៃមុខទំនិញ ដើម្បីផ្តល់ភាពងាយឲ្យអតិថិជនងាយស្រួល​ធ្វើសម្រេចចិត្តជ្រើសរើសទិញ ដោយគ្មានការតថ្លៃគ្នា និងការអាក់អន់ចិត្ត។

លោក គឹម សេរីរដ្ឋ ប្រធាននាយកដ្ឋានគ្រប់គ្រងសេវាកម្មស្នាក់នៅទេសចរណ៍ និងម្ហូបអាហារ​នៃក្រសួងទេសចរណ៍​ បានថ្លែងថា នៅពេលនេះ ក្រសួងទេសចរណ៍ និងក្រសួងពាណិជ្ជកម្ម ជំរុញ​មូលដ្ឋានអាជីវកម្មទាំងអស់​ ដោយរាប់គិតចាប់ពីអ្នកលក់ដូរតូចតាច រហូតដល់អ្នកប្រកប​អាជីវកម្មខ្នាតធំនានា ​ត្រូវរៀបចំបញ្ជីតារាងកំណត់តម្លៃមុខទំនិញ​ និងសេវាកម្មនានាច្បាស់លាស់ ដោយគោរពតាមអត្តសញ្ញាណជាតិ សាសនា វប្បធម៌ និងប្រពៃណីទំនៀមទម្លាប់ខ្មែរ។

លោក បញ្ជាក់ថា តាមហាងអាជីវកម្មសេដ្ឋកិច្ចក្នុងប្រព័ន្ធ ប្រសិនបើមិនរៀបចំបញ្ជីតារាងតម្លៃទំនិញ​ជូន​ភ្ញៀវនោះទេ ​អាជីវកម្មនឹងត្រូវប្រឈមការផាកពិន័យ​ ហើយហាងលក់ដូរសេដ្ឋកិច្ចក្រៅប្រព័ន្ធ គឺមិនត្រូវបានផាកពិន័យ ប៉ុន្តែយើងនៅតែទទូចស្នើសុំបណ្តាអ្នកលក់ដូរក្រៅប្រព័ន្ធចូលរួម​រៀបចំតារាងមុខទំនិញដើម្បីភាពទាក់ទាញ។

បច្ចុប្បន្នក្រសួងពាណិជ្ជកម្ម ​និងក្រសួងទេសចរណ៍នាំគ្នាខិតខំជំរុញមូលដ្ឋានអាជីវកម្មនាំគ្នារៀបចំ​តារាង​តម្លៃមុខទំនិញជូនភ្ញៀវមើលនិងជំរុញចលនាប្រឡងប្រណាំង ​អាជីវកម្មស្អាត និងបៃតង ការធ្វើអាជីវកម្ម​ប្រកបដោយភាពវៃឆ្លាតនោះ​ បំណងចង់ធ្វើឲ្យកម្ពុជាមានភាពទាក់ទាញ​ទេសចរ​អន្តរជាតិ​ ក្នុងពេលកម្ពុជារៀបចំប្រកួតកីឡាSEA GAMES២០២៣ និង​សម្រេចគោលដៅ​យុទ្ធនាការឆ្នាំទស្សនាកម្ពុជា២០២៣៕អត្ថបទ ស៊ុម សុខជា