​ចិន៖ រដ្ឋាភិបាល​ចិន​បាន​និយាយ​កាលពី​ថ្ងៃ​ព្រហស្បតិ៍​ ទី​២៣​មីនា​ថា ខ្លួន​នឹង​ប្រឆាំង​រាល់​ផែនការ​ដែល​អាច​កើតមាន​ណាមួយ​របស់​សហរដ្ឋអាមេរិក ​បង្ខំ​ឲ្យ​ម្ចាស់​ក្រុមហ៊ុន​បណ្ដាញ​សង្គម TikTok របស់​ចិន​ឲ្យ​លក់​បណ្ដាញ​ផ្ដល់​សេវា​វីដេអូ​ខ្លីៗ ជា​ការ​ប្រឈម​ផ្នែក​សន្តិសុខ ​និង​បាន​ព្រមាន​ថា ចំណាត់​ការ​បែបនេះ​នឹង​ប៉ះពាល់​ទំនុក​ចិត្ត​របស់​វិនិយោគិន​នៅ​សហរដ្ឋអាមេរិក​។

​រដ្ឋាភិបាល​នានា​ព្រួយបារម្ភ​ថា ម្ចាស់​បណ្ដាញ​សង្គម TikTok គឺ​ក្រុមហ៊ុន DyteDance អាច​ផ្ដល់​ប្រវត្តិ​រឿងរ៉ាវ ​ឬ​ទិន្នន័យ​ដទៃ​ទៀត​អំពី​អ្នកប្រើប្រាស់​ទៅ​ឲ្យ​រដ្ឋាភិបាល​ចិន ​ឬ​ជំរុញ​ឧបករណ៍​ឃោសនា និង​ការ​ផ្សព្វផ្សាយ​ព័ត៌មាន​មិន​ពិត​។​ ​សារព័ត៌មាន The Wall Street Journal បាន​រាយការណ៍​ថា​ ក្រុម​អាជ្ញាធរ​អាមេរិក​កំពុង​ពិចារណា​ហាម​បម្រាម​ការប្រើប្រាស់​បណ្ដាញ​សង្គម TikTok ប្រសិនបើ​ក្រុម​ហ៊ុន ByteDance មិន​ព្រម​លក់​។​

TikTok គឺជា​បញ្ហា​មួយ​ក្នុងចំណោម​បញ្ហា​ជាច្រើន ដែល​ជា​ចំណុច​ផ្ដោត​ខ្លាំង​នៃ​ជម្លោះ​រវាង​ប្រទេស​ចិន និង​រដ្ឋាភិបាល​ផ្សេងទៀត​ជុំវិញ​បច្ចេកវិទ្យា និង​សន្តិសុខ ដែល​រំខាន​ដល់​ដំណើរ​ការផលិត​បន្ទះ​អេឡិចត្រូនិក ស្មា​ត​ហ្វូ​ន និង​ឧស្សាហកម្ម​ផ្សេងទៀត​។ ​សភា​របស់​សហរដ្ឋអាមេរិក ចក្រភព​អង់គ្លេស និង​នូ​វែ​ល​សេ​ឡង់​បាន​ហាមឃាត់​ការប្រើប្រាស់ TikTok នៅ​លើ​ទូរស័ព្ទ​ដៃ​ដែល​ចេញ​ដោយ​រដ្ឋាភិបាល​។ ឥណ្ឌា​បាន​ហាមប្រាម​កម្មវិធី TikTok និង​កម្មវិធី​រាប់​សិប​ផ្សេងទៀត​របស់​ចិន រួម​ទាំង WeChat ដោយ​ហេតុផល​សុវត្ថិភាព និង​ឯកជន​ភាព​៕

អត្ថបទ៖ សុខមាន